RUTI 3 - WE NU GALE 1995

Ruti nɛa 'da Buzɛ do tũ

¹ Mbe ngba soe kpo, nɛ Noemi tɔ̃ hã Ruti na: “Be 'daa, ma wia na mi fa wi wili hã mɔ, takɔ mɔ ɔ do yangga nu tɔa 'da a.

² Kɔ mɔ zélé! Mɔ ĩ ti Buzɛ, kɛ mɔ dɛa toe do owuko wi tonɔ 'da a ni. Mi tɔ́a dɛ hã mɔ ia na, a a wi na 'da lɛ. Kɔ gɛ̃a wese gɛ, nɛ a nɛ sɛ we zɛ kpalɛnɔ 'da a tɛ fala a 'dafa we zɛ do ma ni.

³ Ní a mɔ fɔ́lɔ́ tɛ mɔ, nɛ mɔ fɛlɛ nɔ yɔmbɛ, nɛ mɔ hé'dé dia tuli 'da mɔ, kɔ mɔ nɛ́ tɛ fala a zɛ do kpalɛ ni. Mɔ hɔ i mɔ, nɛ mɔ tɛ hɔ̀ dɛ 'da a do ti gɔ. Mɔ 'bɔ gbaa, hã a nyɔngɔ mɔ, kɔ a nɔ dɔ̀ do'do sɛ nɛ de.

⁴ Kɔ a nɛ we ɔ nù, nɛ mɔ sókó fala nɛ, nɛ mɔ nɛ dɛ di ni. Mɔ hɔ dɛ ngɔ a ni, nɛ mɔ fó tulu ɔi tɛ nyanga a dɛ 'do, nɛ mɔ ɔ nù dɛ kɛ zã nyanga a ni. Kɔ lɛ zɔ tabi a tɔ̃ sɛ hã mɔ na ge nde? Nɛ mɔ dɛ kɛ a tɔ̃ sɛ hã mɔ ni vɛ̃.”

⁵ Nɛ Ruti gese hã Noemi na: “Mi dɛ sɛ kɛ mɔ tɔ̃a hã mi ni vɛ̃.”

⁶ Ruti nɛa tɛ fala zɛ kpalɛ 'da Buzɛ i, nɛ a dɛ kpasaa ɔ nɛ kɛ kɛfɛ a tɔ̃a hã a ni.

⁷ Buzɛ nyɔngɔ mɛ, nɛ a nɔ dɔ̃ɛ do'do, nɛ a kpa yangga, nɛ a la, nɛ a ɔ nù tɛ kɛ zã gili gbãlã kpalɛ 'da a. 'Do nɛ, nɛ Ruti tɛa gɛɔ, nɛ a kɔlɔ do a, nɛ a fo tulu ɔi tɛ nyanga a dɛ 'do, nɛ a ɔ dɛ kɛ zã nyanga a ni.

⁸ Ma hɔa sanga zɛ, nɛ Buzɛ tunu gbitiwili, kɔ a nɛ ba zu a ngɔ, nɛ nde wuko a kɛ zã nyanga a gɛ.

⁹ Nɛ a aka wuke na: “Wi a mɔ wio nde?” Nɛ a gese na: “Wi a mi Ruti, wi dɛa toe 'da mɔ. Mɔ a wi nu fɛlɛ kula 'da wili mi kɛ a fia zi ia ni, kɔ ma wia na, mɔ fɔmɔ mi. Fala kɛ ma we li mɔ nde, nɛ mɔ ba mi.”

¹⁰ Nɛ Buzɛ tɔ̃ hã a na: “Be 'daa, e kɔ NWA wele nu a tɛ mɔ. Mɛ mɔ dɛa sɔɛ gɛ, ma be dia sila 'da mɔ dɛ 'da nu fɛlɛ kula 'da wili mɔ, nɛ ma nɛa 'bɔ ngɔ kɛ mɔ tɛ dɛ do kɛfɛ mɔ ni. Mɔ wia sɔ we fa wi wili kɔ be zagbãlãnɔ, wele kɛ a a wi kpamɔ tabi wi sã, takɔ mɔ ba a do wili mɔ, nɛ nde mɔ dɛ̃ ma gɔ.

¹¹ Kɔ be 'daa, mɔ tɛ ɔ̃ do linggamɔ gɔ. Ɔ nɛ kɛ winɔ vɛ̃ wa ba mɔ do dĩ ni, ní a mi dɛ sɛ kɛ mɔ aka ni vɛ̃.

¹² Mi a nu fɛlɛ kula 'da wili mɔ gbãlã we, nɛ mi wia we fɔmɔ mɔ. Nɛ nde mɔ 'bɔ do mbe wi na mɔ wili mɔ kpo, kɛ a kɔlɔ do a dɔ̃ɔ we la mi ni boe.

¹³ Kɔ ma wia na tũi gɛ, mɔ 'bana dɛ dɛ, kɔ bindɛ do titole, nɛ lɛ zɔ sɛ, tabi wele ki ni a kɔ̃ sɛ we fɔmɔ mɔ nde. Fala a kɔ̃, nɛ a ba sɛ mɔ. Kɔ fala a kɔ̃̀ gɔ, nɛ mi kana tɛ mi do zu li NWA na, mi dɛ sɛ kɛ ma wia na, mi dɛ we mɔ ni. Kɔ mɔ ɔ́ nù, kɔ lɛ 'bɔ́ bindɛ sɛ.”

¹⁴ Fala 'bana mbĩi, nɛ Ruti kulu ngɔ na, dɔ wa ĩ́ ti ɛ gɔ, we kɛ Buzɛ tɔ̃a na: “Dɔ wele ĩ́ na, wuke gɛ tɛa tɛ fala zɛ kpalɛ nga gɔ.”

¹⁵ Ruti kulu ngɔ, nɛ Buzɛ tɔ̃ hã a na: “Mɔ hɔlɔ tulu gɛ̃ɛ 'da mɔ, kɔ mɔ 'bé nu nɛ.” A hɔlɔ, nɛ a 'be nu nɛ, nɛ Buzɛ a gbãlã kpalɛ kilo 'bu nɛ mɔlɔ kɔ nɛ, nɛ a gala a we e ma zu 'baka a, nɛ Ruti si dɛ le i.

¹⁶ Ruti si, nɛ a hɔ 'da kɛfɛ a i, nɛ kɛfɛ a aka a na: “Be 'daa, mɔ hɔa i mɔ, nɛ ma la nɛ nde?” Nɛ a tɔ̃a kɛnɔ wi wili ni dɛa we a ni vɛ̃.

¹⁷ Nɛ a 'bɔ na: “A hã 'bɔ gbãlã kpalɛ kilo 'bu nɛ mɔlɛ gɛ vɛ̃ hã mi, we kɛ a kɔ̃̀ na, mi si dɛ 'da mɔ nga do wila kɔ̃ mi iko gɔ.”

¹⁸ Nɛ Noemi tɔ̃ na: “Be 'daa, mɔ dúngú fio, kɔ mɔ 'bɔ gbaa na, mɔ ĩ ti kɛ ma nɛ la do mɔ ni. Mi ĩ na, sila Buzɛ ma yɛkɛ sɛ gbaa na, a 'dafa wenɔ ni vɛ̃ sɔɛ gɛ.”