RUTI 2 - WE NU GALE 1995

Ruti dɔlɔ kpalɛ kɔ fɔɛ 'da Buzɛ

¹ Noemi zi do mbe wi na mɔ wili a Elimelɛkɛ boe, li a a Buzɛ. A zi a wi dĩ, nɛ a do kpamɔ wena.

² Nɛ mbe ngba soe kpo, nɛ Ruti aka Noemi na: “Mɔ kɔ̃, nɛ mɔ hã wala hã mi, kɔ mi nɛ we dɔlɔ mbe kpalɛ kɛ ma ala 'do owi sɛlɛ kpalɛnɔ ngɔ fɔnɔ i ni. Mi dɔlɔ sɛ kɔ fɔɛ 'da wele kɛ a kɔ̃ sɛ we be dia zã hã mi ni.” Nɛ Noemi kɔ̃, nɛ a na: “Ma wia, be 'daa, mɔ nɛ́.”

³ Nɛ Ruti la, nɛ a le kɔ mbe fɔ di ni we dɔlɔ kpalɛ 'do Owi sɛlɛ kpalɛnɔ. Ĩ na, mɛ zi a dia 'dɔkɔlɔ mɔ́ a, we kɛ fɔɛ a lia kɔ nɛ ni, mɛ a kɛ 'da Buzɛ, wi na 'da Elimelɛkɛ.

⁴ Olo nɛ la sĩ, nɛ Buzɛ yolo Bɛtleɛmɛ i, nɛ a hɔ. Nɛ a fana Owi dɛa tonɔ na: “NWA dúngú do nɛ!” Nɛ wi dɛa tonɔ wa gese tɛ mɛ 'bɔ na: “NWA wélé nu a tɛ mɔ!”

⁵ 'Do balɛ ni, nɛ Buzɛ zɔ Ruti, nɛ a aka wi ngɔ owi sɛlɛ kpalɛnɔ na: “Be zɔnga gɛ a wio nde?”

⁶ Nɛ wi ni gese na: “A a boko Moabɛ, kɛ Noemi yula do a tɛ Moabɛ i gɛ a ni.

⁷ Kɔ a aka mi we dɔlɔ kpalɛ kɛ ma ala 'do owi sɛlɛ kpalɛnɔ ni. A tɛa sɔ do titole, nɛ a dɛa toe gbaa, a ɔ̀mɔ̀ tɛ̃ a ngboo gɔ.”

⁸ Buzɛ nɛa we zele ni, nɛ a tɔ̃ hã Ruti na: “Be 'daa, mɔ zélé mi sɛ! Mɔ tɛ là we dɔlɔ kpalɛ kɔ gele fɔ gɔ. Mɔ 'báná dɛ dɛ, kɔ mɔ dɛ toe fala nɛ kpo do owuko wi tonɔ 'da mi.

⁹ Mɔ soko fala winɔ wa sɛlɛ do kpalɛ ni do dia nɛ, nɛ mɔ nɛ 'do wukonɔ, kɔ mɔ dɔlɔ kpalɛ ma ala olo wa ni. Mɔ ĩ́ na, mi hã nu mi hã owi dɛa tonɔ 'da mi na, wa tɛ tùlù mɔ gɔ. Fala wɔ lì ba mɔ, nɛ mɔ nɛ́, nɛ mɔ nɔ́ lì wa sua ma kɔ kpananɔ ni.”

¹⁰ Ruti nɛa we zele ni, nɛ a gu nu ti Buzɛ, nɛ a tɔ̃ hã a na: “Gulu kɛ mɔ lingga do mi, nɛ mɔ be dia zã hã mi, kɛ mi a gele wi ni we ge nde?”

¹¹ Nɛ Buzɛ na: “Wa tɔ́a tɛlɛ tɛ kɛ mɔ dɛ do kɛfɛ mɔ wuko, yolo do kɛ wili mɔ fia nɛ ni hã mi. Mi ĩ na, mɔ la baa mɔ, do naa mɔ, do nù kɛ ma kua mɔ ni, we dungu do winɔ kɛ mɔ ĩ̀ zi ti wa dati gɔ.

¹² E kɔ NWA Gale 'da lɛ obe Israɛlɛ si olo dia mɛ kɛ mɔ dɛa ni. E kɔ a hã dia mɔ hã mɔ wena olo kɛnɔ vɛ̃ mɔ dɛa ni, we kɛ mɔ tɛa dɛ 'da a na, a amba zu mɔ.”

¹³ Nɛ Ruti gese na: “Nwa, mɔ bia kɔ̃a zã dɛ 'da mi wena. Mɔ wila we dɛa na hã mi, nɛ ma nganda sila mi wena. Nɛ nde mɛ ni, mi wè kɔ̃ do wuko wi tonɔ 'da mɔ gɔ, wa nɛa ngɔ mi wena.”

¹⁴ Ma hɔa fala nyɔngɔmɛ, nɛ Buzɛ tɔ̃ hã Ruti na: “Tɛ́, kɔ mɔ nyɔ́ngɔ́ mɛ do lɛ! Mɔ gbíní mapa, nɛ mɔ dĩ́ do lì kpoe!” Nɛ Ruti nɛa, nɛ a dungu nù do Owi sɛlɛ kpalɛnɔ ni, nɛ Buzɛ hã mbe hana kpalɛ hã a. Nɛ a nyɔngɔ, nɛ zã a hɛ̃, nɛ tala nɛ 'bana.

¹⁵ 'Do nɛ, nɛ a kpolo tɛ̃ a we dɔlɔ kpalɛ, nɛ Buzɛ ba nu a hã Owi dɛa tonɔ 'da a na: “Nɛ lá Ruti, kɔ a dɔlɔ kpalɛ sanga olã kɛnɔ wa ɛnzɛ ni, nɛ nɛ tɛ dala do a gɔ.

¹⁶ Nɛ gbɔ́tɔ́ 'bɔ mbe kɛnɔ kɔ lã nɛ, nɛ nɛ lá dɛ nù ni, takɔ a kala ma, nɛ nɛ tɛ kɔ́'dɔ́ a gɔ.”

¹⁷ Ruti dɔlɔ kpalɛ kɔ fɔɛ 'da Buzɛ gbaa nɛ wese gɛ̃ a dɛ tɛ nɛ. Ɔ nɛ kɛ wese gɛ̃a ia ni, nɛ a zɛa kpalɛ kɛ a dɔlɔ ni do te, takɔ gbãlã nɛ ala. Nɛ a ngɛmɛ gbãlã nɛ, nɛ ma dunu be sanggi kpo.

¹⁸ Nɛ a si do nɛ, nɛ a be gbãlã kpalɛ kɛ a kpa ni hã kɛfɛ a. A si 'bɔ do tala nyɔngɔmɔ kɛ a nyɔngɔ safɔ i ni, nɛ a hã ma hã a.

¹⁹ Nɛ Noemi aka a na: “Mɔ dɔlɔ kpalɛ sɔɛ gɛ i do nde? Mɔ dɛa toe kɔ fɔɛ 'da wio nde? E kɔ Gale wele nu a tɛ wi dɛa dia mɛ do mɔ gɛ!” Nɛ Ruti gese hã Noemi na, ɛ dɛa toe kɔ fɔɛ 'da mbe wi wili kpo, li a a Buzɛ.

²⁰ Noemi nɛa we zele ni, nɛ a he mɔ do yangga na: “NWA Gale 'bana be kɔ̃a zã 'da a hã owinɔ vɛ̃, owanɔ wa 'bana nza, do wanɔ wa fia ia ni! E kɔ a wele nu a tɛ Buzɛ.” Nɛ Noemi tɔ̃ 'bɔ na: “Buzɛ a wi na tɛ lɛ ngboo, a kɔ winɔ kɛ ma wia na, wa fɔmɔ lɛ ni.”

²¹ Nɛ Ruti na: “Buzɛ tɔ̃a hã mi na, mi 'báná dɔlɔ kpalɛ 'do Owi tonɔ 'da a gbaa na kpalɛ e dɛ nza.”

²² Nɛ Noemi tɔ̃ hã Ruti na: “Be 'daa, ma a dia, mɔ 'báná we dɛ toe fala nɛ kpo do owuko wi dɛa tonɔ 'da Buzɛ. Mɔ nɛ sɔ kɔ fɔ mɔ́ gele wi, nɛ mɔ kpa sɔ zɛlɛ tɛ.”

²³ Ma kɛ Ruti nɛa zi we dɛ toe fala nɛ kpo do owuko wi tonɔ 'da Buzɛ gbaa, nɛ ma hɔa ndɔti kala kpalɛ dɛ nza. A 'bana zi ɔ fala nɛ kpo do kɛfɛ a.