RUTI 1 - WE NU GALE 1995

Nu fɛlɛ Elimelɛkɛ wa kpa ngamɔ

¹ Zɛ́ do 'da fala kɛ Owi kpe dati obe Israɛlɛ, wa zɔ zi mɔ tɛ wa ni, nɛ gba wɔ tia zi ngɔ nùi ni. Nɛ mbe wele kpo kɔ le Bɛtleɛmɛ, tɛ ngɔ nu Yuda, a zɔa ní, nɛ a kulu ngɔ do wuke 'da a, do bulu benɔ 'da a bɔa, nɛ wa la dɛ ngɔ nù Moabɛ, we kɛ dia nù mi do kpalɛ i mɔ boe.

² Li wi ni a Elimelɛkɛ, nɛ li wuke 'da a a Noemi, nɛ li bulu benɔ 'da wa bɔa ni a, Maloni do Kilioni. Wa zi a wi nu fɛlɛ Efrata, tɛ kɔ le Bɛtleɛmɛ. Wa hɔa tɛ Moabɛ, nɛ wa ɔ dɛ di ni.

³ 'Do nɛ, nɛ Elimelɛkɛ fia, nɛ Noemi 'bana do bulu benɔ 'da a bɔa ni.

⁴ Nɛ bulu benɔ ni wa kala oboko Moabɛ. Li mbe wuke kpo a Ɔrpa, nɛ li mbee nɛ a Ruti. Ma ɔa olo nɛ ɔ nɛ sabɛlɛ 'bu ni,

⁵ nɛ Maloni do Kilioni wa fe 'bɔ. Nɛ Noemi 'bana do sã olo wili a do benɔ 'da a.

Ruti si do Noemi dɛ tɛ Bɛtleɛmɛ

^6-7 Ma ɔa ni gbaa, nɛ Noemi zele na, NWA ĩ 'bako hã winɔ 'da a obe Israɛlɛ, nɛ a hã odia kpalɛ hã wa. Kɔ a nɛa we zele ni, nɛ a 'dafa tɛ̃ a we si dɛ ngɔ nù Yuda i, fala nɛ kpo do okondukanɔ 'da a. Wa kulu ngɔ, kɔ wa nɛa we hɔ sanga wala i,

⁸ nɛ Noemi tɔ̃ hã okondukanɔ 'da a na: “Benɔ 'daa, nɛ sí, wele do wele dɛ 'da naa a. E kɔ NWA be dia zã hã nɛ, ɔ nɛ kɛ nɛ bia zi hã mi, do wanɔ wa fia ni!

⁹ Nɛ a gálá nɛ we ba mbé wili, nɛ nɛ dungu do yangga nu tɔa wili ni.” A tɔ̃a ni do'do, nɛ a 'be wa dɛ tɛ̃ a, takɔ wa gɔnɔ sanga tɛ ngba wa. Okondukanɔ 'da a wa nɛa we zɔ ni, nɛ wa hia nganda wena,

¹⁰ nɛ wa tɔ̃ hã a na: “Lɛ kpóló sɛ tɛ lɛ gɔ. Lɛ kɔ̃a we si do mɔ dɛ kɔ le 'da mɔ.”

¹¹ Nɛ Noemi tɔ̃ hã wa na: “Benɔ 'daa, nɛ sí. Nɛ kɔ̃a we si do mi we ge nde? Nɛ ĩ na, mi dɛa gbɛlɛ do'do, nɛ mi wè tɛ ko 'bɔ mbé obulu be na, nɛ ba wa gɔ.

¹² Nɛ lá mi, kɔ nɛ si kpa. Mi wè 'bɔ do ba mbé wili gɔ, we kɛ mi dɛ gbɛlɛ wena. Kɔ gɛnɛ kɔ mi tɔ̃ sɔ na: ‘Mi wia tɛ ko nɛ, kɔ tũi gɛ mi ba wili, kɔ lɛ ko obulu be do a’, nɛ ma gala sɔ nɛ nde?

¹³ Nɛ nɛ gɛ, nɛ 'bɔ sɔ 'da wa gbaa na wa gã, hã nɛ ba wa nde? Nɛ bá sɔ gele wili gɔ nde? Gɔ, benɔ 'daa, ma wé sɛ gɔ! Wi kɛ Gale hã ngamɔ hã a, wi a mi. Ma kɛ mi kɔ̃̀ na, nɛ kpa 'bɔ kpo zɛlɛ tɛ ni gɔ.”

¹⁴ Okondukanɔ 'da a wa nɛa we zele ni, nɛ wa hia 'bɔ ni gbaa, kɔ ma nɛa we e nɛ, nɛ Ɔrpa 'be Noemi dɛ tɛ̃ a, nɛ a si. Nɛ nde Ruti kɔ̃̀ we la kɛfɛ ɛ gɔ.

¹⁵ Nɛ Noemi tɔ̃ hã Ruti na: “Mɔ zɔ́ nya mɔ Ɔrpa si dɛ 'da Owele a, do 'da galenɔ wa dɔnggɔ wa ni ia. Mɔ sí tɛ mɛ 'bɔ dɛ 'da Owele mɔ, nɛ́ kɛ a si ni.”

¹⁶ Nɛ Ruti gese hã Noemi na: “Mɔ tɛ tɔ̃̀ hã mi na, mi la mɔ, hã mi si gɔ, we kɛ mi kɔ̃a na: Fala mɔ nɛ la nɛ ni, mi la nɛ tɛ mɛ 'bɔ. Fala mɔ nɛ ɔ nɛ ni, mi ɔ nɛ tɛ mɛ 'bɔ. Winɔ kɔ le 'da mɔ, wa sɛ tɛ mɛ 'bɔ a winɔ 'da mi. Gale kɛ mɔ dɔnggɔ a ni, mi dɔnggɔ sɛ tɛ mɛ 'bɔ a.

¹⁷ Fala mɔ nɛ fe nɛ ni, nɛ mi fe sɛ tɛ mɛ 'bɔ, nɛ wa mi mi dɛ di ni. Mi zonggo tɛ mi na, tati a fio a nɛ gɔnɔ sɛ sanga lɛ do mɔ. Kɔ ni gɔ, nɛ Gale fɔmbɔ mi.”

¹⁸ Noemi nɛa we zɔ na, Ruti kɔ̃a tɛ mɛ fai we si do a ni, nɛ a wèlè 'bɔ mbé we gɔ.

¹⁹ Nɛ wa nɛa bɔa nɛ ni gbaa, nɛ wa hɔ kɔ le Bɛtleɛmɛ. Wa nɛa we le dɛ Bɛtleɛmɛ i, nɛ ogba dɔa wele wa gɔnɔ dati wa. Nɛ owukonɔ wa aka na: “Wi gɛ a Noemi nde?”

²⁰ Nɛ a gese hã wa na: “Nɛ tɛ sà li mi na Noemi, nɛ́ kɛ mi a wi yangga gɔ. Nɛ sá li mi na Mara, we kɛ mi a wi 'bako. Gale kɛ a do nganda vɛ̃, a hã 'bako hã mi wena.

²¹ Mi zi do omɔ wena, nɛ mi kulu zi ngɔ, nɛ mi la do ma, hã nɛ zɔ sɔɛ gɛ, mi si do wila kɔ̃ mi iko. Nɛ tɛ sà 'bɔ li mi na Noemi gɔ, we kɛ NWA kɛ a do nganda vɛ̃, a siki 'do a hã mi, nɛ a hã 'bako hã mi.”

²² Kulu ngɔɛ 'da Noemi ngɔ nù Moabɛ, takɔ a si le 'da a Bɛtleɛmɛ, ma dɛa zi tɛ̃ ɛ ni. A si zi do konduka 'da a Ruti, kɛ a a boko Moabɛ ni, nɛ wa hɔa kɔ le Bɛtleɛmɛ do 'da fala kɛ wa ndua nyanga kala kpalɛ li nɛ a ɔrzɛ li fɔnɔ dɛ nza ni.