ROMA 9 - WE NU GALE 1995

Polo tɔ̃ we 'da owinɔ kɛ Gale saka wa ni

¹ We mi tɔ̃ ma hã nɛ gɛ, mɛ a gbãlã we, mi 'bílí bɛlɛ gɔ, we kɛ mi a wi 'da Kristo. Nɛ kɔ sila mi ngboo, kɛ Hi Wi Santo ɔ kɔ nɛ ni, ma ĩ 'bɔ na, mi tɔ̃ gbãlã we. Gbãlã we ni, mɛ a kɛ na:

² Mi do gã 'bako, nɛ sila mi zɛlɛ fai,

³ we duzu onya mi kɛ lɛ do wa tɔkɔ kpo ni. Ɔ do kɛ Gale fɔmbɔ sɔ mi, nɛ sanga tɛ ngba lɛ gɔnɔ do Kristo, takɔ ma gala onya mi, nɛ mi kɔ̃ sɔ gɛnɛ nɛ.

⁴ Wa a obe Israɛlɛ, nɛ Gale saka zɛ́ wa na, wa ɔ obenɔ 'da a, nɛ a bia dɔ̃lɔ̃ li 'da a hã wa. A gba tɔkɔ do wa, nɛ a hã mbulanɔ 'da a hã wa, nɛ a bia tɛlɛ tɛ kɛ wa wia tɛ dɔnggɔ do a ni hã wa. Nɛ a kpua 'bɔ mbulu hã wa dɛlɛ wena.

⁵ Wa a obe zã okpasa baa lɛ, nɛ Kristo hɔa wele, nɛ wa kua a kɔ nu fɛlɛ wa. Nɛ Kristo ni, a a Gale kɛ a ngɔ mɛnɔ vɛ. E kɔ lɛ dɔnggɔ a kɔ sabɛlɛ do sabɛlɛ! Amɛ.

⁶ Nɛ nde mi tɔ̃̀ na, mbulunɔ kɛ Gale kpua ma hã wa ni ma dɛa bɛlɛ gɔ. Mba gɔ, sanga obe zã Israɛlɛ vɛ́ ni, ombe wa a winɔ 'da Gale gɔ.

⁷ Nɛ sanga obe zã Abrahama vɛ ni, ombe wa a obenɔ 'da a gɔ. We duzu kɛ Gale tɔ̃a zɛ́ hã Abrahama na: “Ongbongbo benɔ 'da mɔ, wi sɛ tati a obe zã Izaka.”

⁸ Ma kɔ̃a we tɔ̃ na, benɔ vɛ́ kɛ Abrahama kua zɛ́ wa ni, wa a benɔ kɛ Gale kpua mbulu hã wa ni gɔ. Nɛ nde wi tati a obenɔ kɛ Abrahama kua wa olo mbuli kɛ Gale kpua hã a ni, wa a wa hɔa ngbongbo benɔ 'da a li Gale.

⁹ Gale kpua zɛ́ mbuli hã Abrahama na: “Sabɛlɛ 'do gɛ, do kpo tũi gɛ, nɛ mi hɔ sɛ 'bɔ 'da mɔ gɛ, nɛ nde Sara kua bulu be.”

¹⁰ Nɛ tati a ki ni iko gɔ, nɛ nde Rebɛka ba zi zã obe dã do yaa lɛ Izaka zu a kpo ni.

^11-12 Nɛ gɛnɛ kɔ benɔ bɔa ni wa 'bana zi dɛ kɔ zã naa wa i, nɛ nde Gale saka zɛ́ mbe sanga wa bɔa ni ia. Nɛ dati kɛ Rebɛka tɛ kò wa, kɔ wa ĩ ti dia mɔ do 'dã mɔ gɔ ni, nɛ nde Gale tɔ̃a zɛ́ hã Rebɛka na: “Kuti be a dɛ sɛ to hã be 'do.” Kɔ Gale dɛa zɛ́ na mɛ ni we be na, a saka winɔ 'da a ɔ nɛ kɛ zã a kɔ̃a ni, nɛ nde mɛ a we duzu dɛa mɔ tɛ wi kɛ a saka a ni gɔ.

¹³ Ma ɔ nɛ kɛ wa kɔma kɔ 'Buki 'da Gale na: “Mi kɔ̃a zi gɛnɛ Yakɔbɔ, nɛ mi bɛ gɛnɛ Ezau” ni.

¹⁴ Kɔ lɛ nɛ tɔ̃ 'bɔ na ge nde? Gale dɛ́ mɔ do bɔlɔ nɛ gɔ nde? Ma ni gɔ.

¹⁵ Gale tɔ̃a hã Mɔizɛ na: “Mi ĩ 'bako hã wi kɛ mi kɔ̃a we ĩ 'bako hã a ni, nɛ mi be dia zã hã wi kɛ mi kɔ̃a we be dia zã hã a ni.”

¹⁶ Ma be na, Gale sàkà wele we duzu linggamɛ, tabi dɛa mɔ tɛ̃ a gɔ. Nɛ nde a saka wele we 'bakoe a dɛ hã a ni.

¹⁷ Wa kɔma kɔ 'Buki 'da Gale na, Gale tɔ̃a hã nwa ngɔ nù Ezipeto na: “Mi ia zi mɔ do nwa, takɔ do wala 'da mɔ, nɛ mi be ngawi 'da mi hã winɔ, nɛ sako dɔ̃lɔ̃ li 'da mi yɛ'bɛ ngɔ nù gɛ vɛ.”

¹⁸ Na mɛ ni, Gale ĩ 'bako hã wi kɛ a kɔ̃a we ĩ 'bako hã a ni, nɛ a nganda zu wi kɛ a kɔ̃a we nganda zu a ni.

Gale dɛ mɛ kɛ zã a kɔ̃a

¹⁹ Mbe gɔ, nɛ mɔ tɔ̃ sɛ hã mi na: “Ma ɔ na mɛ ni, nɛ gulu kɛ Gale kɔ'dɔ 'bɔ wele we ge nde? Mba gɔ, wi wia we bɛ̃ gɛnɛ mɛ kɛ Gale kɔ̃a we dɛ nɛ ni a wio nde?”

²⁰ Mɔ, wi kɛ mɔ kɔ'dɔ Gale ni, mɔ a wio nde? Kpana wia we aka wi kɛ a 'bua ma ni na: “Gulu kɛ mɔ 'bua mi ní we ge nde” nde?

²¹ Wi 'bo kpana wè tɛ dɛ do gili nɛ́ kɛ zã a kɔ̃a ni gɔ nde? Do kpo gili ni, a wia we 'bo do dia kpana mɔ dɔ, nɛ mbee nɛ we 'bo do kpana dɛ gele to iko.

²² Kɔ ma tɛ mɛ 'bɔ na mɛ ni we Gale. A kɔ̃a zi we be mãlã 'da a, do ngawi 'da a. Nɛ a kunu zi sila a ngɔ 'dã mɛnɔ 'da winɔ kɛ wa nɔ̃lɔ̃ zi zã a, nɛ wa wia do fio ni.

²³ A dɛa na mɛ ni, takɔ a be gã dɔ̃lɔ̃ li 'da a hã owinɔ kɛ a ĩ 'bako hã wa, nɛ a saka zɛ́ wa belee na, wa kpa dɔ̃lɔ̃ li ni.

²⁴ Owinɔ ni wi a lɛ, kɛ a sa mɔ hã lɛ sanga Oyudanɔ, do sanga ogele winɔ vɛ̃ ni.

²⁵ Ma ɔ nɛ kɛ Oze kɔma kɔ 'buki 'da a na: “Owinɔ kɛ wa zɛ́ a winɔ 'da mi gɔ ni, mi sa sɛ li wa na, winɔ 'da mi. Nɛ gele nu kɔnggɔnɔ kɛ mi kɔ̃̀ zɛ́ gɛnɛ wa gɔ ni, mi kɔ̃ sɛ gɛnɛ wa wena.

²⁶ Nɛ dɛ kpo kpo kɔ lenɔ kɛ wa tɔ̃ zɛ́ hã winɔ na, wa a winɔ 'da Gale gɔ ni, wa sa sɛ 'bɔ li wa na, owinɔ 'da Gale, wele kpasi.”

²⁷ Nɛ Ezai tɔ̃a 'bɔ si ngɔ obe Israɛlɛ na: “Gɛnɛ kɔ obe Israɛlɛ wa dɛlɛ sɔ ɔ nɛ kɛnzɛ nu gba lì, nɛ nde owanɔ wa nɛ kpasa sɛ ni, wa dɛ́lɛ́ sɛ gɔ.

²⁸ We duzu kɛ ma 'bànà nyɛlɛ gɔ, takɔ Gale 'bili we 'da owinɔ ngɔ nù gɛ vɛ́ fala kpo.”

²⁹ Nɛ ma ɔ 'bɔ nɛ kpo kɛ Ezai tɔ̃a zɛ́ dati na: “Fala kɛ Nwa ngɔ mɔ nyanga nza vɛ̃ là sɔ mbe tala obe zã lɛ hã lɛ gɔ, nɛ lɛ kumu sɔ vɛ́, ɔ nɛ kɛ 'da winɔ tɛ Sodɔmɛ do Gomɔrɛ” ni.

Polo sambala Gale we Oyudanɔ

³⁰ Kɔ lɛ nɛ tɔ̃ na ge nde? Lɛ wia tɛ tɔ̃ na, owinɔ kɛ wa a Oyuda gɔ, nɛ wa fà we hɔ owi bɔlɔ zu li Gale gɔ ni, Gale dɛa na, wa hɔ owi bɔlɔ zu li a, we kɛ wa kɔ̃a zu li Yezu Kristo.

³¹ Nɛ nde obe Israɛlɛ wa fa zi mbula kɛ ma wia na wa dɛ, hã wa hɔ wi bɔlɔ zu li Gale ni, nɛ nde wa kpà ma gɔ.

³² Gulu kɛ wa kpà gɔ we ge nde? Gulu nɛ we kɛ wa lingga zi na, lo kpasa sɛ do wala dɛ mbula, nɛ wa lènggè do kɔ̃ zu li Yezu Kristo gɔ. Kɔ wa kɔa zu nyanga wa do ta kɔ do nyanga winɔ,

³³ kɛ wa kɔma we nɛ kɔ 'Buki 'da Gale na: “Nɛ zɔ́, mi ia ta kɔ le Sioni, mɛ a ta kɛ owinɔ wa kɔ do nyanga wa, nɛ wa te ni. Nɛ nde wi kɛ a kɔ̃ zu li a ni, a kpá sɛ sape gɔ.”