ROMA 8 - WE NU GALE 1995

Kpasi kɛ ma yula kɔ Hi Wi 'da Gale

¹ Kɔ ngangga ni, Gale a 'bílí sɛ 'bɔ 'dã we dɛ zu winɔ kɛ wa mba kpo do Yezu Kristo ia ni gɔ.

² Mba gɔ, ngawi 'da Hi Wi Santo, kɛ a hã kpasi hã mi do wala 'da Yezu Kristo ni, gɔnɔ zu mi kɔ ngawi 'da 'dã mɛ kɛ ma kã mi dɛ fi fio ni.

³ Mbula kɛ Mɔizɛ kɔma ni, ma wè zi tɛ kpasa wele gɔ, we duzu kɛ winɔ wa zi do ngawi we dɛ ma vɛ̃ bina. Nɛ nde Gale dɛa mɔ kɛ mbula wè tɛ dɛ ma gɔ ni. A tumba Be 'da a ngboo dɛ ngɔ nù gɛ, nɛ a ba kifi tɛ wele, kɛ a a wi dɛ 'dã mɔ ni, nɛ a kala 'dã mɛnɔ 'da winɔ dɛ zu a, nɛ a fe we nɛ. Na mɛ ni, a gbɛa ngawi 'da 'dã mɔ kɔ kifi tɛ lɛ.

⁴ Gale dɛa ni, takɔ lɛ hɔ wi dɛ bɔlɔ zu dɛa mɔ, ɔ nɛ kɛ mbula tɔ̃a ni. Mba gɔ, lɛ 'bànà 'bɔ tɛ yɛnggɛ ɔ nɛ kɛ 'dã mɔ kɔ kifi tɛ lɛ tombo do lɛ ni gɔ, nɛ nde lɛ yɛnggɛ do ngawi 'da Hi Wi.

⁵ Mba gɔ, owinɔ kɛ kifi tɛ wa a nwa ngɔ wa ni, wa fa mɛ kɛ kifi tɛ wa dɛ wɔ tɛ nɛ ni. Nɛ owanɔ kɛ Hi Wi a nwa ngɔ wa ni, wa fa mɛ kɛ Hi Wi kɔ̃a ni.

⁶ Wi kɛ a fa mɛ kɛ kifi tɛ a dɛ wɔ tɛ nɛ ni, a sɔkpɔ sɛ do fio. Nɛ wele kɛ a fa mɛ kɛ Hi Wi kɔ̃a ni, a sɔkpɔ sɛ do kpasi kɛ ma é sɛ gɔ ni, nɛ ma hã sɛ dungu fio hã a.

⁷ Mba gɔ, wi kɛ a fa mɛ kɛ kifi tɛ a do wɔ nɛ ni, a a wi sɛnɛ Gale, we duzu kɛ a dɛ́ mbulanɔ 'da Gale gɔ, nɛ a 'bɔ do ngawi dɛ ma bina.

⁸ Nɛ mɛ a gbãlã we na, winɔ kɛ wa dɛ mɔ kɛ 'dã wɔ kɔ kifi tɛ wa tombo wa we nɛ ni, wa wè tɛ hã yangga hã Gale gɔ.

⁹ Nɛ nde kɛ 'da nɛ, nɛ tɛ yɛ̀nggɛ̀ ɔ nɛ kɛ 'dã wɔ kɔ kifi tɛ nɛ tombo do nɛ ni gɔ. Nɛ nde nɛ yɛnggɛ ɔ nɛ kɛ zã Hi Wi kɔ̃a ni, we kɛ Hi Wi 'da Gale kɔ nɛ boe. Kɔ wi kɛ Hi Wi 'da Kristo kɔ a bina ni, nɛ nde wi ni a wi 'da Kristo gɔ.

¹⁰ Mba gɔ, fala kɛ Kristo kɔ nɛ boe, nɛ kifi tɛ nɛ ma fe we 'dã mɔ kpaa, nɛ nde Hi Wi a hã kpasi hã nɛ, we kɛ nɛ hɔa wi bɔlɔ zu fi Gale ia.

¹¹ Kɔ fala kɛ Hi Wi 'da Gale, kɛ a tunu zi Yezu kɔ fio ni, ɔ kɔ sila nɛ, nɛ Gale kɛ a tunu zi Yezu Kristo kɔ fie ni, a kpasa sɛ kifi tɛ nɛ kɛ ma fe sɛ ni. A dɛ sɛ ma do wala 'da Hi Wi 'da a kɛ a ɔ kɔ sila nɛ ni.

¹² Kɔ onyae, we duzu ma, lɛ do ku'da zu lɛ boe. Nɛ nde mɛ a ku'da 'dã mɛ kɛ wɔ kɔ kifi tɛ lɛ tombo lɛ we nɛ ni gɔ.

¹³ Mba gɔ, fala kɛ nɛ dɛ 'dã mɔ kɛ wɔ kɔ kifi tɛ nɛ tombo nɛ we nɛ ni, nɛ nɛ fe sɛ. Kɔ fala kɛ nɛ bɛ̃ gɛnɛ 'dã wɔ kɔ kifi tɛ nɛ do wala ngawi 'da Hi Wi 'da Gale, nɛ nɛ kpasa sɛ.

¹⁴ Mba gɔ, owinɔ kɛ Hi Wi 'da Gale kã wa fi dungi 'da wa ni, wa a benɔ 'da Gale.

¹⁵ Nɛ Hi Wi kɛ nɛ kpa zi a ni dɛ̃ na, nɛ hɔ ngbá mɔ́ wele do kɛ na, nɛ 'bana tɛ dɛ kifi gɔ, nɛ nde a dɛa na, nɛ hɔ obenɔ 'da Gale. Nɛ do ngawi 'da Hi Wi ni, lɛ sa mɔ hã Gale na: “Baa lɛ!”

¹⁶ Nɛ Hi Wi 'da Gale ngboo tɔ̃ dɛ kɔ sila lɛ na, lɛ a obenɔ 'da Gale.

¹⁷ Hã fala kɛ lɛ a benɔ 'da Gale, nɛ lɛ kpa sɛ 'bɔ dia mɛnɔ kɛ a usu ma hã obenɔ 'da a ni. Lɛ kpa sɛ ma fala nɛ kpo do Kristo. Mba gɔ, fala kɛ lɛ kpa zɛlɛ tɛ fala nɛ kpo do Kristo, nɛ lɛ sɛ tɛ mɛ 'bɔ do a kpo kɔ dɔ̃lɔ̃ fi 'da a.

Gale a hã sɛ dɔ̃lɔ̃ li hã benɔ 'da a

¹⁸ Mi zɔ na, dɔ̃lɔ̃ fi kɛ Gale nɛ hã sɛ ma hã lɛ do ngba soe 'do gɛ ni, ma nɛa ngɔ ngamɛnɔ kɛ lɛ tɛ zɔ ma ngangga gɛ ni wena.

¹⁹ Mɛnɔ nyanga nza gɛ vɛ kɛ Gale dɛa ni, ma do wɔ wena we zɔ ngba soe kɛ Gale nɛ hã do dɔ̃lɔ̃ fi hã obenɔ 'da a ni.

²⁰ Mba gɔ, ma wia zi na, omɛnɔ kɛ Gale dɛa ni, ma hɔ mɔ yala iko. Nɛ nde mɛnɔ ni ma hɔ̀ mɔ yala do ĩ tɛ ɛ gɔ, wi a Gale a a kɔ̃a zi na mɛ ni. Nɛ nde mɛnɔ ni gbini zã ɛ na, ma kpasa sɛ.

²¹ We kɛ kɔ̃ tũ nɛ ma hɔ sɛ, nɛ Gale a kpasa sɛ tɛ mɛ 'bɔ omɛnɔ nyanga nza gɛ na, dɔ ma 'dángá gɔ, nɛ ma kpa sɛ dɔ̃lɔ̃ fi ɔ nɛ kɛ benɔ 'da Gale wa kpa ni. Nɛ wa sɛ 'bɔ ti mbula bina.

²² Lɛ ĩ na, mɛnɔ vɛ́ kɛ Gale dɛa ni, ma tɛ bi tɛ ɛ ngangga gɛ nganda wena, ɔ nɛ wuko kɛ zɛlɛ kula to a tua ni.

²³ Nɛ mɛ tati a ogele mɛnɔ ngɔ nù gɛ iko gɔ, nɛ nde lɛ winɔ, kɛ Gale hã Hi Wi 'da a hã lɛ nɛ́ mbe nu dia mɛnɔ a hã sɛ hã lɛ do 'do ni, lɛ bi tɛ mɛ 'bɔ tɛ lɛ wena. Nɛ lɛ 'bɔ na, Gale kifi lɛ do obenɔ 'da a, nɛ a kpasa kifi tɛ lɛ vɛ.

²⁴ Gale kpasa lɛ ia, nɛ nde lɛ tɛ zɔ̀ kpasi ni gɔ, nɛ lɛ gbini 'bɔ zã lɛ na, mbe ngba soe kpo, nɛ lɛ zɔ sɛ ma. Mɔ kɛ wele zɔa ma ia ni, a 'bɔ́ 'bɔ 'da nɛ 'bɔa gɔ. We kɛ a wè tɛ 'bɔ 'da mɔ kɛ a kpa ma ia ni gɔ.

²⁵ Nɛ nde lɛ, lɛ gbini zã lɛ do mɔ kɛ lɛ tɛ zɔ̀ ma gɔ ni, nɛ lɛ 'bɔ 'da ma do kpã sila ngboo.

²⁶ Nɛ Hi Wi 'da Gale tɛ mɛ 'bɔ tɛ gala lɛ 'da fala kɛ lɛ mbɔkɔ ni. Mba gɔ, lɛ ĩ̀ ti sambala Gale do tɛlɛ tɛ kɛ ma wia ngboo ni gɔ. Nɛ nde Hi Wi tɛ sambala Gale we duzu lɛ, do tɛlɛ tɛ ala nu wi kɛ lɛ wè tɛ ala nɛ gɔ ni.

²⁷ Nɛ Gale kɛ a ĩ ti linggamɔ zã wele vɛ ni, a ĩ ti mɛ kɛ Hi Wi kɔ̃a we aka a we nɛ ni. Mba gɔ, Hi Wi aka Gale we duzu Owi kɔ̃a wenɔ ɔ nɛ kɛ zã Gale kɔ̃a ni.

²⁸ Lɛ ĩ na, Gale dɛ na, omɛnɔ vɛ ma sɔkpɔ do dia nɛ we owinɔ kɛ wa kɔ̃a gɛnɛ a, nɛ a saka wa ɔ nɛ kɛ a 'dafa zɛ́ do kɔ sila a ni.

²⁹ Mba gɔ, a ĩ ti wa zɛ́ belee, nɛ a saka zɛ́ wa na, wa we kɔ̃ do Be 'da a Kristo, nɛ Be 'da a ni, a ɔ kuti be sanga ogba dɛlɛ nya a.

³⁰ Nɛ winɔ kɛ Gale saka zɛ́ wa ni, a sa zi 'bɔ mɔ hã wa na, wa hɔ owinɔ 'da a. Nɛ owinɔ kɛ a sa mɔ hã wa ni, a dɛ na, wa hɔ Owi bɔlɔ zu fi a, nɛ owinɔ kɛ a dɛa na, wa hɔ wi bɔlɔ zu ni, a hã 'bɔ dɔ̃lɔ̃ fi hã wa.

Gale kɔ̃ gɛnɛ lɛ wena

³¹ Kɔ lɛ nɛ tɔ̃ 'bɔ na ge nde? Fala kɛ Gale 'do lɛ boe, nɛ wi nɛ sɛnɛ lɛ a wio nde?

³² Gale kɛ a bè zi zu Be 'da a ngboo ni hã lɛ gɔ, nɛ a 'dɔlɔ a we lɛ vɛ̃ ni, a hã́ sɛ tɛ mɛ 'bɔ mɛnɔ hã lɛ fala nɛ kpo do Be 'da a gɔ nde?

³³ Wi nɛ da sɛ winɔ kɛ Gale saka wa ni a wio nde? Gale do tɛ̃ a ngboo dɛa na, wa hɔ Owi bɔlɔ zu li a.

³⁴ Wi wia we 'bili 'dã we dɛ zu wa a a wio nde? Mba gɔ, Yezu Kristo fia, nɛ a tunu 'bɔ kɔ fio, nɛ a dungu tɛ ngɔ ngawili kɔ̃ Gale tɛ aka a we lɛ.

³⁵ Nɛ wi nɛ gɔnɔ sanga tɛ ngba lɛ do Kristo kɛ a kɔ̃a lɛ ni a wio nde? Mɛ tabi a ngamɔ, 'bako, zɛlɛ tɛ, wɔ, sã, fɛna fio, tabi fio nde? Mɔ kpo bina.

³⁶ Ma ɔ nɛ kɛ wa kɔma kɔ 'Buki 'da Gale na: “Nɛ nde we duzu mɔ Gale, ma hã owele wa a lɛ, we gbɛ lɛ tũ kpo kpo, nɛ wa dɛ do lɛ ɔ nɛ kɛ wa dɛ do obatanɔ, fala kɛ wa nɛ we gbɛ wa ni.”

³⁷ Nɛ nde kɔ mɛnɔ ni vɛ́, lɛ nɛ ngɔ ma nɛa fai, we ngawi 'da Kristo, kɛ a kɔ̃a gɛnɛ lɛ ni.

³⁸ Mba gɔ, mi ĩ ngboo na, mɔ kpo wè tɛ gɔnɔ sanga tɛ ngba lɛ do kɔ̃a zã 'da a Gale gɔ. Gɛnɛ kɔ lɛ fe, tabi lɛ 'bana nza, gɛnɛ kɔ anzɛnɔ, tabi Onwanɔ, tabi ongawi mɛnɔ tɛ li nza i, gɛnɛ kɔ mɛnɔ ma la ngangga gɛ, do kɛnɔ ma tɛ sɛ do 'do ni, ma wè tɛ dɛ mɔ do lɛ gɔ.

³⁹ Gɛnɛ kɔ ngawi mɛnɔ fi nza ngɔ i, tabi kɛnɔ ti nù 'da fionɔ i, nɛ nde mɔ kpo wé sɛ we gɔnɔ sanga tɛ ngba lɛ do kɔ̃a zã 'da Gale kɛ ma bia tɛ ɛ do wala 'da Nwa 'da lɛ Yezu Kristo ni gɔ.