ROMA 7 - WE NU GALE 1995

Mbula 'da Mɔizɛ do ngawi ngɔ wi Kristo bina

¹ Onyae, nɛ a owinɔ kɛ nɛ ĩ ti mbula ĩ. Nɛ ĩ̀ na, mbula do ngawi tati a we wi kɛ a 'bana nza ni iko gɔ nde?

² Ma ɔ nɛ mbula ngɔ wuko mɔ́ wili ni. Mbula ni tɔ̃a na, fala kɛ wili a tɛ fè gɔ, nɛ nde a wè tɛ la a gɔ. Kɔ fala kɛ wili a fe ia, nɛ nde a 'bɔ ti mbula ba ngba wi bina.

³ Kɔ fala kɛ wi wili 'bana nza, hã wuke la a, kɔ a ba gele wili, nɛ nde a yɛnggɛ vĩ zu yɛli do gele wi wili ni. Hã fala kɛ wili a fe, nɛ nde a hɔa nza ti mbula ia. Kɔ fala kɛ a ba mbé wili, nɛ nde a yɛ̀nggɛ̀ vĩ zu yɛli gɔ.

⁴ Nɛ nde onyae, ma tɛ mɛ 'bɔ na mɛ ni we nɛ. 'Da fala kɛ Yezu Kristo fia zi ni, nɛ nɛ fia do a fala nɛ kpo. Nɛ nɛ hɔa nza ti mbula 'da Mɔizɛ, nɛ nɛ hɔa winɔ 'da Kristo kɛ Gale tunu zi a kɔ fio ni. Kɔ we duzu ki ni, ma wia na, lɛ dɛ́ de mɔ hã Gale.

⁵ Mba gɔ, 'da fala lɛ 'bana zi tɛ dɛ mɛ kɛ 'dã wɔ kɔ kifi tɛ lɛ tombo lɛ we dɛ ma ni, nɛ mbula gala zi 'dã wɛ ni, nɛ ma dɛ to kɔ kifi tɛ lɛ, nɛ lɛ zi tɛ dɛ 'dã mɔ kɛ ma kã lɛ dɛ fi fio ni.

⁶ Kɔ ngangga ni, we mɛnɔ kɛ ma zɔa mbula, nɛ ma ɛnzɛ zi lɛ nɛ́ ngbá ni, lɛ ɔ dati nɛ nɛ́ kɛ lɛ fi fia ni, nɛ lɛ hɔa nza ti mbula ni ia. Nɛ lɛ wè 'bɔ tɛ dɛ to hã Gale do ã mbula kɛ Mɔizɛ kɔma zɛ́ ma ni gɔ, nɛ nde lɛ dɛ to hã Gale do mbé hã zã kɛ Hi Wi Santo be ma ni.

Mbula ma be 'dã mɔ hã wele

⁷ Kɔ ní, nɛ lɛ nɛ tɔ̃ na ge nde? Mbula mɛ a 'dã mɔ nde? Ma ni gɔ. Nɛ nde mbula a bia 'dã mɔ hã mi. Mba gɔ, mbula tɛ tɔ̃̀ sɔ na: “Mɔ tɛ è sila mɔ ngɔ mɔ mɔ́ ngba mɔ gɔ” ni gɔ, nɛ nde mi ĩ́ sɔ na, e sila wi ngɔ mɔ mɔ́ ngba wi mɛ a 'dã mɔ gɔ.

⁸ Kɔ we duzu mbula, ma kɛ 'dã mɔ kua 'dã wɔ kpi do kpi kɔ kifi tɛ wi. Mba gɔ, fo sɔ mbula bina, nɛ nde 'dã mɔ sɔ do ngawi bina.

⁹ Zɛ́ dati kɛ na, mbula tɛ hɔ̀ gɔ ni, nɛ nde mi zi do kpasi boe. Kɔ mbula nɛa we hɔ nɛ, nɛ 'dã mɔ kpa ngawi,

¹⁰ nɛ mi hɔa nɛ́ wi kɛ a fi fia ni. Mbula kɛ Gale hã zɛ́ we kpasa wele ni, ma kã mi dɛ fi fio.

¹¹ We kɛ mbula hã wala hã 'dã mɔ na, ma ɔlɔ mi we dɛ 'dã mɔ, nɛ ma gbɛ mi.

¹² Mbula 'da Mɔizɛ ma yula 'da Gale, nɛ wenɔ vɛ kɛ mbula be ni, ma yula 'da Gale, nɛ ma a bɔlɔ, nɛ ma a dia.

¹³ Kɔ ní nɛ nde, mɛ kɛ ma a dia ni, ma wia tɛ gbɛ mi nde? Ma ni gɔ. Mɛ ma gbɛa mi ni, mɛ a mbula gɔ, mɛ a 'dã mɔ. Mbula a dia mɔ, nɛ 'dã mɔ ba dia mɛ ni, nɛ ma gbɛ do mi. Na mɛ ni, mbula bia tɛlɛ tɛ 'dã mɔ dɛ wila fala, nɛ ma bia na, 'dã mɔ 'danga nɛa ngɔ mɔ vɛ̃.

Wele hɔa ngbá 'da 'dã mɔ

¹⁴ Lɛ ĩ na, mbula ma yula 'da Hi Wi 'da Gale, nɛ nde mi a wele, nɛ kifi tɛ mi a nù iko, nɛ wa bia gole mi, nɛ mi hɔa ngbá 'da 'dã mɔ.

¹⁵ Mɛnɔ kɛ mi dɛ ma ni, mi ĩ̀ gulu nɛ gɔ. Dia mɔ kɛ mi kɔ̃a we dɛ nɛ ni, mi dɛ́ gɔ. Nɛ nde mɛ mi sɛnɛ ma sɛna ni, sɛ nɛ mi dɛ de.

¹⁶ Kɔ nɛ́ kɛ mɛ mi dɛ ma mɛ a mɔ kɛ mi sɛna ni, ma be na, mi kɔ̃a gɛnɛ mbula, nɛ mi ĩ na, ma a dia.

¹⁷ Nɛ ma be 'bɔ na, mi a mi dɛ́ mɛ ni gɔ, nɛ nde 'dã mɛ kɔ mi ni hã dɛ ma.

¹⁸ We duzu kɛ mi ĩ na, dia mɔ kɔ mi, kɛ mi a wele, nɛ kifi tɛ mi a nù iko ni bina. Mba gɔ, gɛnɛ kɔ mi kɔ̃ we dɛ dia mɔ, nɛ nde mi do ngawi we dɛ ma bina.

¹⁹ Dia mɛ kɛ mi kɔ̃a we dɛ ma ni, mi dɛ́ ma gɔ, nɛ 'dã mɛ kɛ mi kɔ̃̀ ma gɔ ni, nɛ mi dɛ ma.

²⁰ Kɔ 'da fala mi dɛ 'dã mɛnɔ kɛ zã mi kɔ̃̀ we dɛ ma gɔ ni, nɛ nde wi a mi gɔ, mɛ a 'dã mɛ kɔ mi ni hã dɛ ma.

²¹ Ma kɛ mi zɔ fai na, mɛ ma dɛ tɛ ɛ kɔ mi mɛ a kɛ gɛ: Fala kɛ mi kɔ̃ we dɛ dia mɔ, nɛ nde mi do ngawi we dɛ ma bina, nɛ mi dɛ tɛ mɛ a 'dã mɔ iko.

²² Mba gɔ, mi do yangga dɛ mbula 'da Gale kɔ sila mi wena,

²³ nɛ nde mi zɔa na, mbé gele mbula kɔ kifi tɛ mi boe, nɛ ma bi bolo do mbula 'da Gale kɛ mi kɔ̃a ma do sila mi ni. Nɛ gele mbula ni ɛnzɛ mi nɛ́ ngbá 'da 'dã mɛ kɔ kifi tɛ mi ni.

^24-25 Na mɛ ni, mi zɔa na, kɔ sila mi dɔnggɔ mbula 'da Gale dɔngga, nɛ nde kifi tɛ mi a ti ngbá 'da 'dã mɔ. Gbãlã we, mi a wi 'bako ngboo! Kɔ wi nɛ fo mi ti ngbá 'da kifi tɛ wi kɛ ma tombo mi dɛ fi fie gɛ ni, wi a wio nde? Mi hã iɔ̃nae hã Gale kɛ a kpasa mi do wala 'da Nwa 'da lɛ Yezu Kristo ni.