ROMA 6 - WE NU GALE 1995

Lɛ fĩa we 'dã mɔ, nɛ lɛ kpasa we duzu Yezu Kristo

¹ Kɔ ma ɔ na mɛ ni, nɛ lɛ nɛ tɔ̃ na ge nde? Lɛ 'báná tɛ dɛ 'dã mɔ, takɔ Gale be dia zã 'da a hã lɛ dɛ dati fai nde?

² Ma na mɛ ni gɔ! Mba gɔ, we mɛnɔ vɛ kɛ ma zɔa 'dã mɔ ni, nɛ nde lɛ ɔ nɛ fio ni. Kɔ na mɛ ni, nɛ lɛ nɛ dɛ fala dɛ 'dã mɔ fai nɛ nde?

³ Nɛ ĩ de wena na, lɛ kpa zi batisimɔ, takɔ lɛ mba kpo do Kristo. Lɛ kpa zi batisimɔ ni, we be na, lɛ fia fala nɛ kpo do a.

⁴ Batisimɔ 'da lɛ ma be na, lɛ fia, nɛ wa mi lɛ fala nɛ kpo do Kristo, takɔ tɛlɛ tɛ dungu nza 'da lɛ ma kifi, nɛ lɛ ɔ do mbé kpasi ɔ nɛ kɛ 'da Yezu Kristo, kɛ Gale tunu zi a kɔ fio do ngawi 'da a ni.

⁵ Mba gɔ, ɔ nɛ kɛ lɛ a wele kpo do Kristo, tɛ kɛ lɛ fia ɔ nɛ a ni, na mɛ ni, lɛ sɛ 'bɔ a wele kpo do a, tɛ kɛ lɛ tunu sɛ kɔ fio, ɔ nɛ kɛ a tunu zi ni.

⁶ Lɛ ĩ na, Gale gbɛa ã dungi 'da lɛ zi ni ngɔ finda te fala nɛ kpo do Kristo, takɔ 'dã dɛa mɔ tɛ lɛ ma sɔkpɔ, nɛ lɛ tɛ ɔ̀ 'bɔ ngbá 'da 'dã mɔ gɔ.

⁷ We duzu kɛ wele fe, nɛ nde a fua tɛ̃ a kɔ ngbá 'da 'dã mɔ ia.

⁸ Kɔ fala kɛ lɛ kɔ̃ na, lɛ fia fala nɛ kpo do Kristo, nɛ lɛ kɔ̃ tɛ mɛ 'bɔ na, lɛ sɛ do kpasi fala nɛ kpo do a.

⁹ Mba gɔ, lɛ ĩ na, 'do kɛ Kristo tunu kɔ fio ni, a fé sɛ 'bɔ mbé nɛ gɔ, nɛ fio 'bɔ do ngawi ngɔ a bina.

¹⁰ A fia zi we 'dã mɛ 'da owinɔ fala kpo ia, a fé sɛ 'bɔ mbé nɛ gɔ. Nɛ ɔ nɛ kɛ a tunu kɔ fio ia ni, a ia kpasi 'da a hã Gale.

¹¹ Ma tɛ mɛ 'bɔ na mɛ ni, we duzu nɛ. We mɛnɔ vɛ kɛ ma zɔa 'dã mɔ ni, nɛ ɔ nɛ fio ni. Nɛ nɛ ia kpasi 'da nɛ hã Gale, we kɛ nɛ mba kpo do Yezu Kristo.

¹² Kɔ ma wè na, 'dã mɔ dungu 'bɔ nwa ngɔ kifi tɛ nɛ, kɛ ma fe sɛ ni, nɛ nɛ nɛ 'dɔkɔlɔ 'dã wɔ kɔ kifi tɛ nɛ gɔ.

¹³ Nɛ tɛ hã̀ tɛ nɛ we dɛ 'dã mɔ gɔ, nɛ nɛ tɛ è kifi tɛ nɛ fi wala dɛ 'dã mɔ gɔ. Nɛ nde ɔ nɛ kɛ Gale kpasa nɛ kɔ fio ia ni, nɛ hã́ tɛ nɛ vɛ we dɛ to hã a, nɛ é kifi tɛ nɛ fi wala dɛ bɔlɔ zu dɛa mɔ.

¹⁴ Mba gɔ, 'dã mɔ wè tɛ dungu 'bɔ nwa ngɔ nɛ gɔ. We kɛ nɛ 'bɔ ti mbula bina, nɛ nde mɛ a dia zã 'da Gale hã ma dungu nwa ngɔ nɛ.

Lɛ bá tɛ lɛ we dɛ bɔlɔ zu dɛa mɔ

¹⁵ Kɔ nɛ́ kɛ lɛ 'bɔ ti mbula bina, nɛ dia zã 'da Gale dungu nwa ngɔ lɛ ni, ní a lɛ dɛ 'bɔ 'dã mɔ nde? Ma ni gɔ!

¹⁶ Nɛ ĩ́ de wena na, 'da fala kɛ nɛ hã tɛ nɛ hã wele, we dɛ mbula 'da a, nɛ nde nɛ hɔa ngbá 'da wi ni ia. Na mɛ ni, fala kɛ nɛ hã tɛ nɛ we dɛ 'dã mɔ, nɛ nɛ hɔ sɛ ngbá 'da 'dã mɔ, nɛ ma kã sɛ nɛ dɛ li fio. Kɔ fala kɛ nɛ hã tɛ nɛ hã Gale, kɔ nɛ zele a, nɛ a dɛ sɛ na, nɛ hɔ Owi bɔlɔ zu li a.

¹⁷ Kɔ lɛ hã iɔ̃nae hã Gale! We kɛ zi dati, nɛ zi a ngbá 'da 'dã mɔ, nɛ nde ngangga gɛ, nɛ zila gbãlã we wenɔ 'da Gale kɛ wa bia hã nɛ ni, nɛ nɛ dɛ ma do sila nɛ kpo.

¹⁸ Nɛ hɔa nza ti ngbá 'da 'dã mɔ, nɛ nɛ ba tɛ nɛ we dɛ bɔlɔ zu dɛa mɔ.

¹⁹ (Mi tɔ̃ ɔ nɛ kɛ winɔ vɛ wa wia tɛ tɔ̃ nɛ ni, sɛ a ma lia nɛ de, we kɛ hã zã nɛ gã̀ gɔ.) Zi dati, nɛ hã zi tɛ nɛ vɛ̃ we dɛ mɔ sape, do gele 'dã mɛnɔ kpi do kpi, kɛ ma dè li Gale gɔ ni. Kɔ ma wia tɛ mɛ 'bɔ na, ngangga gɛ, nɛ hã tɛ nɛ vɛ we dɛ mɔ kɛ ma a bɔlɔ ni, takɔ nɛ ɔ winɔ 'da Gale ngboo.

²⁰ 'Da fala kɛ nɛ zi a ngbá 'da 'dã mɔ ni, nɛ nde mɔ kpo hɛ̃́lɛ̃́ zi nɛ we dɛ mbulanɔ 'da Gale gɔ.

²¹ Kɔ mɛ nɛ kpa zi olo 'dã mɛnɔ, kɛ sape olo nɛ ba li nɛ sɔɛ gɛ ni a ge nde? Mɔ olo nɛ a fio iko.

²² Kɔ ngangga ni, nɛ hɔa nza kɔ ngbá 'da 'dã mɔ, nɛ nɛ hɔa wi dɛa tonɔ 'da Gale. Nɛ mɛ nɛ kpa do nɛ ni, mɛ a kɛ na, nɛ hã tɛ nɛ vɛ hã Gale, nɛ ma dɛa na, nɛ kpa kpasi kɛ ma é sɛ gɔ ni.

²³ Mba gɔ, si olo 'dã mɔ mɛ a fio. Nɛ nde dia mɛ kɛ Gale hã ma do dia sila iko ni, mɛ a kpasi kɛ ma é sɛ gɔ, kɛ lɛ kpa ma do wala kɛ lɛ mba kpo do Nwa 'da lɛ Yezu Kristo ni.