ROMA 4 - WE NU GALE 1995

Kɔ̃a we 'da Abrahama

¹ Kɔ lɛ nɛ tɔ̃ we 'da yaa lɛ Abrahama, kɛ a kua lɛ ni na ge nde?

² A hɔa zɛ́ wi bɔlɔ zu li Gale we mɛnɔ a dɛa ni nde? Ma ɔ sɔ na mɛ ni, nɛ a wia sɔ we dɔnggɔ tɛ a. Nɛ nde gulu kɛ na Abrahama dɔnggɔ tɛ a li Gale ni bina.

³ Mba gɔ, wa kɔma kɔ 'Buki 'da Gale na: “Abrahama kɔ̃a zi zu li Gale, nɛ we duzu kɔ̃a we 'da a, Gale ba a na, a a wi bɔlɔ zu.”

⁴ Ma ɔ nɛ wi dɛa to kɛ a kpa mbili olo dɛa toe 'da a ni. Nwa ngɔ a hã̀ mbili ni hã a we dia kɔ sila 'da a iko gɔ, nɛ nde a hã ma hã a, we kɛ a dɛa to we nɛ dɛa.

⁵ Nɛ nde Gale dɛ́ na mɛ ni gɔ. Mba gɔ, fala kɛ wele dɛ̀ to dɛa gɔ, kɔ a kɔ̃ zu li Gale kɛ a dɛ na, 'dã wi hɔ wi bɔlɔ zu ni, nɛ Gale a kpasa sɛ a. Nɛ a zɔ sɛ a li a na, a hɔa wi bɔlɔ zu we duzu kɔ̃a we 'da a.

⁶ 'Da fala Davidi ɔngbɔ zi dia 'dɔkɔlɔ 'da wi kɛ Gale zɔa a do wi bɔlɔ zu, we kɔ̃a we 'da a, gɛnɛ kɔ a dɛ̀ to we nɛ dɛa gɔ ni, nɛ a tɔ̃a 'bɔ kpo we ni na:

⁷ “Yangga do wi kɛ Gale fo ku'da 'dã mɔ zu a, nɛ a ele 'dã mɛ a dɛa ni.

⁸ Yangga do wi kɛ Nwa lénggé do 'dã mɛnɔ 'da a gɔ ni.”

⁹ Yangga a tɔ̃ nɛ ni, ma tati a we Oyudanɔ iko nde? Ɔ̃ ɔ̃, ma tɛ mɛ 'bɔ we ogele winɔ vɛ̃. Lɛ tɔ̃a na: “Gale ba zi Abrahama na, a a wi bɔlɔ zu, we kɛ Abrahama kɔ̃a zi zu li a.”

¹⁰ Mɛ ni ma dɛa zi tɛ̃ ɛ ní dati kɛ na Abrahama nɛ gaza, tabi do 'do nɛ nde? Ma dɛa zi tɛ̃ ɛ do dati nɛ.

¹¹ Nɛ 'do nɛ, sɛ a Gale ba nu ɛ hã a na, a nɛ gaza de. Nɛ gaza ni, ma bia na Abrahama hɔa wi bɔlɔ zu li Gale we kɔ̃a we 'da a, kɛ a zi do ma dati hã nɛ gaza ni. Kɔ we duzu ma, Abrahama hɔa baa owinɔ vɛ̃ kɛ wa nɛ̀ gaza gɔ, nɛ nde wa kɔ̃a zu li Gale, nɛ Gale ba wa na, wa a Owi bɔlɔ zu ni.

¹² Nɛ Abrahama 'bɔ a baa Oyudanɔ. A a baa wa, we kɛ wa a gaza ni iko gɔ, nɛ nde we kɛ wa kɔ̃a 'bɔ zu li Gale, ɔ nɛ kɛ Abrahama kɔ̃a zɛ́ dati kɛ na a nɛ gaza ni.

Gale kpua mbulu hã owinɔ wa kɔ̃a a ni

¹³ Gale kpua zi mbulu hã Abrahama do obe zã a na, a hã sɛ nùi gɛ hã wa do mɔ́ wa. Gale kpò zi mbuli ni ní, we duzu kɛ na Abrahama dɛa zi mbula gɔ, nɛ nde a kpua ma, we kɛ Abrahama kɔ̃a zi zu li a. Ma kɛ Gale ba a na, a wi bɔlɔ zu li a ni.

¹⁴ Kɔ Gale hã sɔ dia mɛ ni hã owinɔ wa dɛ mbula ni iko, nɛ kɔ̃a we sɔ do gulu nɛ bina, nɛ́ mbuli kɛ Gale kpua ni, ma ɔ sɔ 'bɔ yala.

¹⁵ Mba gɔ, mbula kɛ Gale hã ma hã winɔ ni, ma dɛ na, zã Gale nɔ̃lɔ̃ dɛ tɛ wa, we kɛ wa dɛ̀ mbula ni gɔ. Kɔ fala kɛ mbula bina, nɛ nde wi gbini mbula tɛ mɛ 'bɔ bina.

¹⁶ Kɔ we duzu ma, winɔ wa kpa sɛ dia mɛnɔ kɛ Gale kpua zɛ́ mbulu nɛ ni, do wala kɔ̃a we. Nɛ ma be na Gale kpua mbuli ni do dia zã 'da a iko. Nɛ ma we duzu obe zã Abrahama vɛ̀. Nɛ a kpò ma tati a hã owinɔ wa dɛ mbula ni iko gɔ, nɛ nde ma we winɔ vɛ kɛ wa kɔ̃a Gale, ɔ nɛ kɛ Abrahama kɔ̃a zɛ́ ni. We kɛ Abrahama a baa lɛ wi kɔ̃a wenɔ vɛ́.

¹⁷ Ma ɔ nɛ kɛ wa kɔma kɔ 'Buki 'da Gale na: “Mi ia mɔ do baa ogba gili nu kɔnggɔ winɔ.” Ma kɛ Abrahama a baa lɛ li Gale, kɛ a kɔ̃a zɛ́ zu li a ni. Wi a Gale kɛ a tunu ofionɔ, nɛ a ba nu a, nɛ mɔ kɛ ma zɛ́ bina ni, ma dɛ tɛ ɛ.

¹⁸ Abrahama 'bana zɛ́ tɛ kɔ̃ gɛnɛ Gale fai. Gɛnɛ kɔ Owele wa lingga na, a wè wi ko sɛ be gɔ, nɛ nde a tɛ gbini zã a do Gale na, ɛ ko sɛ be iko. Nɛ we duzu ma, ma kɛ a hɔa “baa ogba gili nu kɔnggɔ winɔ,” ɔ nɛ kɛ Gale tɔ̃a zɛ́ hã a na: “Obe zã mɔ wa dɛlɛ sɛ wena” ni.

¹⁹ Gɛnɛ kɔ Abrahama kɔla zɛ́ do sabɛlɛ kama, nɛ Sara la 'bɔ li kula do'do, nɛ wa 'bànà 'bɔ do ngawi kɔ kiti tɛ wa gɔ, nɛ nde Abrahama lènggè zi nɛ gɔ, nɛ kɔ̃a we 'da a mbɔ̀kɔ̀ gɔ.

²⁰ A bà zi kafi mbuli kɛ Gale kpua hã a ni gɔ. Nɛ kɔ̃a we a kɔ̃a do Gale ni, ma hã zi ngawi hã a, nɛ a ma ngɔ dɔnggɔ Gale.

²¹ A kɔ̃a zɛ́ do kɔ sila a vɛ́ na, do ngbongbo nɛ, Gale do ngawi we dɛ mbuli kɛ a kpua ni.

²² Nɛ we duzu kɔ̃a we 'da Abrahama, ma kɛ “Gale ba zɛ́ Abrahama na, a a wi bɔlɔ zu” ni.

²³ Nɛ nde we wa kɔma kɔ 'Buki 'da Gale na: “Gale ba zɛ́ Abrahama na, a a wi bɔlɔ zu” ni, wa kɔ̀mɔ̀ zɛ́ ma ĩ ta nɛ we duzu Abrahama zu a kpo iko gɔ.

²⁴ Wa kɔma zɛ́ we ni we duzu lɛ, kɛ lɛ kɔ̃a zu li Gale ni. We kɛ Gale ba tɛ mɛ 'bɔ lɛ na, lɛ a owi bɔlɔ zu, we duzu kɔ̃a we 'da lɛ. Mba gɔ, lɛ kɔ̃a Gale kɛ a tunu zi Nwa 'da lɛ Yezu kɔ fio ni.

²⁵ Yezu ni hã zi tɛ̃ a, nɛ wa gbɛa a ngɔ finda te we duzu 'dã mɛnɔ 'da lɛ, nɛ Gale tunu a kɔ fio, takɔ a ba lɛ na, lɛ a Owi bɔlɔ zu li a.