ROMA 3 - WE NU GALE 1995

¹ Kɔ ma ɔ na mɛ ni, nɛ Oyudanɔ wa nɛa ngɔ ogele nu fɛlɛ kulanɔ do ge nde? Nɛ gulu gaza boe nde?

² Ma do gulu nɛ gã wena. Dati ngboo, we kɛ Gale hã zi we nu ɛ hã Oyudanɔ.

³ Kɔ nɛ́ kɛ ombe wa bɛa we nu Gale ni, ma ɔ sɛ nɛ nde? Gale a kpolo sɛ do nu a nde?

⁴ Fala kpo gɔ! Gale dɛ olo nu ɛ dɛa fai, nɛ nde owinɔ vɛ̃ wa a Owi 'bili bɛlɛ. Ma ɔ nɛ kɛ wa kɔma kɔ 'Buki 'da Gale na: “Mɔ Gale, mɔ wele we, nɛ winɔ vɛ̃ wa ĩ sɛ na, mɔ tɔ̃ gbãlã we. Hã mɔ tɔ̃ ngbangga dati owi 'bili we, nɛ nde mɔ té sɛ do we gɔ” ni.

⁵ Kɔ fala kɛ 'dã mɛ 'da lɛ, ma be bɔlɔ zui 'da Gale dɛ wila fala, nɛ lɛ tɔ̃ sɛ na ge nde? Lɛ tɔ̃ sɛ tabi na, Gale dɛ́ mɔ do bɔlɔ nɛ gɔ, we kɛ a hã etumbu hã lɛ ni nde? (Mi tɔ̃ ɔ nɛ kɛ winɔ vɛ wa wia tɛ tɔ̃ nɛ ni iko.)

⁶ Ma na mɛ ni fala kpo gɔ! Ɔ do kɛ Gale sɔ a wi bɔlɔ zu gɔ, nɛ a dɛ sɔ fala 'bili we 'da winɔ ngɔ nù gɛ nɛ nde?

⁷ Kɔ fala kɛ bɛlɛ 'da mi ma be gbãlã we 'da Gale dɛ wila fala, nɛ ma hã dɔ̃lɔ̃ li hã a, nɛ gulu kɛ wa 'bili we 'da mi na, mi a wi dɛ 'dã mɔ ni we ge nde?

⁸ Nɛ gulu kɛ lɛ wè do dɛ 'dã mɔ, sɛ a Gale bia dia sila 'da a hã lɛ de, gɔ we ge nde? Ĩ na, ombe winɔ wa 'danga zu li lɛ na, lɛ tɔ̃a ni. Nɛ nde owinɔ ni wa tia li ngbangga 'da Gale, nɛ́ kɛ ma wia ni.

Wi bɔlɔ zu kpo li Gale bina

⁹ Lɛ nɛ tɔ̃ na ge nde? Lɛ Oyudanɔ, lɛ dia li Gale nɛa ngɔ ogele nu fɛlɛ kulanɔ nde? Fala kpo gɔ. Mi bia sɔ ma hã nɛ ia na, owinɔ vɛ̃, Oyudanɔ, tabi ogele winɔ, wa a ngbá 'da 'dã mɔ.

¹⁰ Ma ɔ nɛ kɛ wa kɔma kɔ 'Buki 'da Gale na: “Fo wi bɔlɔ zu bina, mbamba wele kpo iko bina.

¹¹ Fo wi ĩ ti gbãlã we bina, nɛ wele kpo fá 'bɔ Gale gɔ.

¹² Winɔ vɛ wa siki 'do wa lua do Gale, nɛ wa vɛ wa yɔa wala. Wi dɛ dia mɔ bina, mbamba wele kpo iko ni bina.

¹³ Wala gɛlɛ wa 'danga ɔ nɛ zunu kɛ wa kpè nu ma gɔ ni. Wila we nu wa vɛ a bɛlɛ, ma ɔ nɛ faliã gɔ̃, kɛ ma hɔ ti lɛfɛ wa ni.

¹⁴ Kɔ nu wa dunu do 'dã we, do fɔmba.

¹⁵ Nyanga wa hãsã tɛ nɛ we gbɛ Owele.

¹⁶ Falanɔ vɛ wa yɛnggɛ nɛ ni, wa tɛ hã zɛlɛ tɛ hã owele, nɛ wa tɛ gbɛ owele.

¹⁷ Wa ĩ̀ ti dɛ na do wele gɔ,

¹⁸ nɛ ta zu wa ngɔ dɛ kili Gale bina.”

¹⁹ Lɛ ĩ na, wenɔ kɛ mbula tɔ̃ ni, ma tɔ̃ ma hã winɔ kɛ wa ti mbula ni, takɔ owinɔ vɛ wa kpe nu wa, nɛ wa te li ngbangga 'da Gale.

²⁰ Mba gɔ, wele kpo wè tɛ hɔ bɔlɔ zu wele li Gale, we duzu mbula a dɛ ni gɔ. Mbula ni, ma tati a we be hã winɔ na, wa ĩ ti 'dã mɛ 'da wa.

Gale kpasa wi kɛ a kɔ̃a zu li Yezu Kristo ni

²¹ Nɛ nde ngangga ni, Gale bia li wala a dɛ na, winɔ wa hɔ wi bɔlɔ zu li a ni hã lɛ. Nɛ li wala ni mɛ a mbula gɔ. Mbula 'da Mɔizɛ do wenɔ 'da Owi gba olo nu Gale, ma bia zi 'bɔ li wala ni.

²² Li wala kɛ Gale dɛ na, wele hɔ wi bɔlɔ zu li a ni, mɛ a kɔ̃a we wi ni kɔ̃ do zu li Yezu Kristo ni. Nɛ Gale hũi li wala hã winɔ vɛ kɛ wa kɔ̃a zu li Yezu Kristo ni. Mba gɔ, winɔ vɛ wa wia kɔ̃,

²³ we duzu kɛ winɔ vɛ wa dɛa 'dã mɔ, nɛ wa nyɛlɛ do dɔ̃lɔ̃ li 'da Gale.

²⁴ Nɛ nde Gale bia dia zã 'da a hã wa, nɛ a dɛ na, wa hɔ wi bɔlɔ zu li a, we dia kɔ sila 'da a iko. A dɛa na mɛ ni do wala 'da Yezu Kristo, kɛ a gɔna zu wa ni.

²⁵ Gale 'dɔlɔ zi Yezu, nɛ a fia, nɛ tɔkɔ tɛ a a nù we si olo ku'da 'dã mɛnɔ zu winɔ kɛ wa kɔ̃a zu li a ni. Gale dɛa na mɛ ni we be na, ɛ a wi bɔlɔ zu. A ila 'dã mɛnɔ owinɔ wa dɛa zi ni, nɛ a hã̀ etumbu olo nɛ hã wa gɔ.

²⁶ A kunu zɛ́ sila a ngɔ 'dã mɛnɔ ni. Kɔ do ngba soenɔ lɛ do ma gɛ, Gale kɔ̃a we be bɔlɔ zui 'da a hã winɔ, nɛ a dɛ na, winɔ vɛ kɛ wa kɔ̃a zu li Kristo ni, wa hɔ wi bɔlɔ zu li a.

²⁷ Kɔ ma ɔ na mɛ ni, nɛ gulu dɔnggɔ tɛ lɛ boe nde? Ma bina! Ma bina we ge nde? Lɛ nɛ dɔnggɔ tɛ lɛ, we kɛ lɛ dɛa mbula nde? Ɔ̃ ɔ̃! Gale kpásá wele we dɛ mbula gɔ, nɛ nde a kpasa wele we kɛ a kɔ̃a zu li Yezu Kristo ni.

²⁸ Mba gɔ, lɛ ĩ na wele hɔ́ wi bɔlɔ zu li Gale we dɛ mbula gɔ, nɛ nde tati a we kɔ̃a we a kɔ̃a do zu li Kristo ni.

²⁹ Gale, a tati a Gale 'da Oyudanɔ iko nde? A a Gale 'da ogele winɔ gɔ nde? Gale tɛ mɛ 'bɔ a Gale 'da ogele winɔ.

³⁰ We kɛ Gale a zu a kpo! Nɛ a dɛ sɛ na, Oyudanɔ do ogele winɔ, wa hɔ Owi bɔlɔ zu li a do wala kɛ wa kɔ̃a do zu li Yezu Kristo ni.

³¹ Kɔ fala kɛ ma ɔ na mɛ ni, nɛ ma be na kɔ̃a we 'da lɛ ma fua mbula do'do nde? Ma ni gɔ. Kɔ̃a we 'da lɛ ma nganda 'da mbula.