ROMA 2 - WE NU GALE 1995

Gale a 'bili sɛ we 'da winɔ vɛ̃

¹ Aa nyae, mɔ 'bili we 'da ngba mɔ nde? Mɔ lengge na, mɔ té sɛ li ngbangga 'da Gale gɔ nde? Gɛnɛ kɔ mɔ a wio nde, hã fala kɛ mɔ ma ngɔ 'bili we dɛ zu ngba mɔ, nɛ mɔ ĩ na, mɔ 'bili we ni dɛ zu mɔ wele nɛ ngboo, we kɛ mɔ dɛ kpo kpo 'dã mɛ a dɛa ma ni dɛa.

² Lɛ ĩ na, Gale 'bili we 'da winɔ wa dɛ mɛnɔ ɔ ní ni, do wala do nɛ ngboo.

³ Mɔ wi kɛ mɔ 'bili we dɛ zu ngba mɔ, nɛ mɔ tɛ dɛ kpo kpo 'dã mɛ kɛ wi ni dɛ ni, mɔ lingga na, mɔ yu sɛ 'bili we 'da Gale nde?

⁴ Mɔ zɔ gã dia zã 'da Gale, do du sila 'da a, do gɛa sila 'da a dɛ 'da winɔ li mɔ yala iko nde? Mɔ ĩ̀ na, Gale bia dia zã 'da a hã mɔ, takɔ mɔ kifi sila mɔ gɔ nde?

⁵ Zu mɔ nganda wena, nɛ mɔ kɔ̃̀ we kifi sila mɔ gɔ. Kɔ we duzu ki ni, mɔ do tɛ mɔ, mɔ fa na, ngbangga kpa mɔ do ngba soe kɛ Gale a be sɛ mãlã 'da a, nɛ a 'bili we 'da winɔ do bɔlɔ nɛ ngboo ni.

⁶ 'Da fala ni, nɛ Gale a hã sɛ si olo dɛa to 'da wele do wele hã a, we do kɛ a dɛa ni.

⁷ A hã sɛ kpasi kɛ ma é gɔ ni hã wanɔ kɛ wa hã tɛ wa we dɛ toe 'da wa do dia nɛ, nɛ wa fa we kpa dɔ̃lɔ̃ li ngboo, do dĩ li Gale, do kpasi kɛ ma 'dángá gɔ ni.

⁸ Nɛ nde wanɔ kɛ wa bɛ we nu Gale, nɛ wa bɛ gɛnɛ gbãlã we, nɛ wa yɛnggɛ tɛ dɛ 'dã mɔ iko ni, zã a ma nɔ̃lɔ̃ sɛ dɛ tɛ wa, nɛ a sɛ do mãlã dɛ ngɔ wa.

⁹ Nɛ Owi dɛ 'dã mɛnɔ ni vɛ, wa kpa sɛ zɛlɛ tɛ do 'bako. Ma ndo sɛ dati do ngɔ Oyudanɔ, sɛ nɛ 'do nɛ, nɛ ma hɔ ngɔ ogele winɔ de.

¹⁰ Nɛ nde Owi dɛ de mɛnɔ vɛ, Gale a dɔnggɔ sɛ wa, nɛ a hã dɔ̃lɔ̃ li do dungu fio hã wa. Ma ndo sɛ dati do ngɔ Oyudanɔ, sɛ nɛ 'do nɛ, nɛ ma hɔ ngɔ ogele winɔ de.

¹¹ We kɛ Gale zɔ́ bula li wele kɔ 'bili wenɔ 'da a gɔ.

¹² Winɔ kɛ wa ĩ̀ ti mbula 'da Mɔizɛ gɔ ni, wa fe, nɛ nde Gale 'bílí sɛ we 'da wa do 'da mbula ni gɔ. Nɛ nde owanɔ kɛ wa ĩ ti mbula ni ĩ ni, wa dɛ 'dã mɔ, nɛ mbula ni ma 'bili sɛ we 'da wa.

¹³ We kɛ wanɔ kɛ wa zele mbula do zala wa iko ni, wa a bɔlɔ zu wele li Gale gɔ. Nɛ nde wanɔ kɛ wa dɛ ma dɛa ni, Gale zɔ wa li a nɛ́ Owi bɔlɔ zu ni.

¹⁴ Ogele winɔ wa ĩ̀ ti mbula 'da Mɔizɛ gɔ. Nɛ nde mbe 'da fala kpo, nɛ linggamɔ zu wa tombo wa we dɛ mɛnɔ kɛ mbula tɔ̃a ni. Hã fala kɛ wa dɛ na mɛ ni, nɛ ma be na, mbula ni kɔ sila wa boe.

¹⁵ Dɛa mɔ tɛ wa be na, Gale kɔmɔ mbula 'da ɛ dɛ kɔ sila wa. Nɛ linggamɛ 'da wa be 'bɔ na, wa ĩ ti mbula ni ĩ. Mba gɔ, fala kɛ wa dɛ 'dã mɔ, nɛ wa ĩ na, lo dɛa 'dã mɔ, hã fala kɛ wa dɛ de mɔ, nɛ wa ĩ 'bɔ we nɛ.

¹⁶ Nɛ zɔ́ mɛnɔ kɛ ma dɛ sɛ tɛ̃ ɛ do ngba soe Gale nɛ be sɛ do linggamɔ kɔ sila winɔ dɛ nza, nɛ a 'bili wenɔ 'da wa do wala 'da be 'da a Yezu Kristo, ɔ nɛ kɛ mi be ma kɔ Dia Sakoe gɛ a ni.

Oyudanɔ wa dɛ́ mbula 'da Gale gɔ

¹⁷ Nɛ nde mɔ, kɛ mɔ a be Yuda, nɛ mɔ gbini zã mɔ do mbula 'da Mɔizɛ, nɛ mɔ dɔnggɔ tɛ mɔ do Gale 'da mɔ,

¹⁸ nɛ mɔ ĩ ti mɛ kɛ zã Gale kɔ̃a ni, nɛ mbula bia dia mɔ hã mɔ, nɛ mɔ ĩ ti nɛ.

¹⁹ Nɛ mɔ lengge na, ɛ a wi kpe dati Owi ua linɔ, nɛ ɛ a mwinda we duzu winɔ kɛ wa kɔ gba tũ.

²⁰ Nɛ mɔ lengge 'bɔ na, ɛ a wi be mɔ hã obenɔ, do wanɔ kɛ wa ĩ̀ ti mɔ gɔ ni. Mba gɔ, mbula bia hã zã do gbãlã we 'da Gale hã mɔ vɛ̃.

²¹ Kɔ gulu kɛ mɔ be mɔ hã ogele wele, nɛ mɔ wè tɛ be mɔ hã kifi tɛ mɔ wele nɛ gɔ we ge nde? Mɔ be hã winɔ na: “Nɛ tɛ zu mɔ gɔ,” nɛ mɔ zũ mɔ nde?

²² Mɔ tɔ̃ na: “Nɛ tɛ ɔ̀ do kɛnɛ ngba nɛ gɔ,” nɛ mɔ ɔ do kɛnɛ ngba mɔ nde? Mɔ sɛnɛ okpikimanɔ wena, nɛ mɔ zũ mɛnɔ kɔ tɔa sambala 'da wa we ge nde?

²³ Mɔ dɔnggɔ tɛ mɔ do mbula 'da Mɔizɛ, nɛ mɔ gbini 'bɔ ma, nɛ ma hã sape hã Gale.

²⁴ Ma ɔ nɛ kɛ wa kɔma kɔ 'Buki 'da Gale na: “Ogele winɔ wa 'danga zu fi Gale tua do nɛ, Oyudanɔ” ni.

²⁵ Fala kɛ mɔ nɛ gaza, kɔ mɔ dɛ 'bɔ mbula 'da Mɔizɛ, nɛ nde gaza mɔ nɛa ni, do gulu nɛ boe. Kɔ mɔ nɛ gaza, hã mɔ dɛ̀ mbula gɔ, nɛ nde mɔ nɛa gaza ni yala iko.

²⁶ Kɔ fala kɛ gele wi kɛ a a manda'ba ni, a dɛ mbula, nɛ Gale zɔ́ sɛ a ɔ nɛ wi nɛ gaza gɔ nde?

²⁷ Nɛ manda'ba kɛ a a dɛ mbula dɛa ni, a fĩ ngbangga zu mɔ, be Yuda. Mba gɔ, mɔ do 'buku mbula boe, nɛ mɔ nɛa 'bɔ gaza nɛa, nɛ nde mɔ dɛ́ mbula ni gɔ.

²⁸ Ní a, wa ĩ ti ngbongbo Yuda do ge nde? Wa ĩ́ ti a we duzu mbala dani gaza kɛ wa zɔ zɔa ni gɔ.

²⁹ Nɛ nde wa ĩ ti a we duzu linggamɔ kɔ sila a kɛ wa zɔ́ gɔ ni. Nɛ ngbongbo gaza, mɛ a kɛ kɔ sila wi. Nɛ mbula hã dɛ̀ ma gɔ, nɛ nde wi dɛa ma, wi a Hi Wi 'da Gale. Nɛ wi nɛ dɔnggɔ sɛ wi ni a wele gɔ, nɛ nde wi a Gale.