ROMA 16 - WE NU GALE 1995

Polo tumba balɛ hã Owi kɔ̃a wenɔ

¹ Mi kɔ̃a we be Febe, boko nya lɛ wi kɔ̃a we, kɛ a gala eklezia kɔ le Sankre ni hã nɛ na, nɛ ĩ ti a.

² Nɛ kɔ̃́ gɛnɛ a kɔ tɔanɔ 'da nɛ do zu li Nwa, ɔ nɛ kɛ owinɔ 'da Gale wa kɔ̃ do gɛnɛ ongba wa ni. Nɛ nɛ gálá a do mɛnɔ vɛ kɛ a aka sɛ nɛ we nɛ ni. Mba gɔ, a dɛ dia mɔ hã Owele wena, nɛ a gala zi 'bɔ mi.

³ Nɛ hã́ balɛ hã Prisilɛ do Akilasi, kɛ wa a ongba mi wi tonɔ 'da Yezu Kristo ni.

⁴ Winɔ ni wa hɔa zi fɛna fio we kpasa mi kɔ ngamɔ. Mi gese iɔ̃nae hã wa wena. Nɛ tati a mi zu mi kpo iko gɔ, nɛ nde owi kɔ̃a wenɔ vɛ kɛ wa a Oyuda gɔ ni, wa hã 'bɔ iɔ̃nae hã wa.

⁵ Nɛ nɛ há 'bɔ balɛ hã owi kɔ̃a wenɔ, kɛ wa mba li ngba wa tɛ nu tɔa 'da Prisilɛ do Akilasi ni. Nɛ há balɛ 'da mi hã yali ngba mi Epainɛtɛ, kuti wi ngɔ nù Azi kɛ a kɔ̃a zi zu li Yezu ni.

⁶ Nɛ nɛ há 'bɔ balɛ hã Mana, kɛ a hã zi tɛ a vɛ we dɛ to hã nɛ ni.

⁷ Nɛ hã́ balɛ hã Andronikusi do Yuniasi, kɛ wa a onya mi be Yuda, nɛ lɛ zi do wa kɔ bɔlɔkɔ fala nɛ kpo ni. Mba gɔ, wa 'bɔ a owinɔ 'da Kristo, nɛ Owi nɛ tonɔ wa dɔnggɔ zi wa wena, nɛ wa kɔ̃a zi 'bɔ zu li Yezu dati hã mi.

⁸ Nɛ nɛ há balɛ hã Ampliatusi, yali ngba mi kɛ lɛ mba do a kpo kɔ Nwa Yezu ni.

⁹ Nɛ fáná Urbɛnɛ, ngba lɛ wi dɛa toe 'da Kristo, do Stakisi, kɛ a ngɔ sila mi ni.

¹⁰ Nɛ fáná 'bɔ Apɛlɛ, kɛ a bia zi kɔ̃a we 'da a kɔ dɛa toe 'da Kristo ni. Nɛ nɛ fáná owinɔ nu tɔa 'da Aristobulɛ ni vɛ.

¹¹ Nɛ hã́ balɛ hã Herodioni, kɛ a a nya mi be Yuda ni. Nɛ nɛ hã balɛ hã owinɔ nu tɔa 'da Narsisɛ, kɛ wa kɔ̃a zu li Nwa ni.

¹² Nɛ fáná 'bɔ Trifɛnɛ do Trifɔzɛ, wi dɛa tonɔ 'da Nwa, do Pɛrsidɛ, kɛ a ngɔ sila mi, nɛ a hã zi tɛ a vɛ we dɛa toe 'da Nwa ni.

¹³ Nɛ nɛ fáná Rufusi, ngbongbo wi dɛa toe 'da Nwa, nɛ nɛ hã 'bɔ balɛ hã naa a, kɛ a ɔ nɛ naa mi ngboo ni.

¹⁴ Nɛ hã́ balɛ hã Asinkritɛ, Flegoni, Hɛrmɛsi, Patrobasi, Hɛrmasi, do otala wi kɔ̃a wenɔ kɛ wa fala nɛ kpo do wa ni.

¹⁵ Nɛ há 'bɔ balɛ hã Filolɔgɛ, Yuli, Nere do boko nya a, do Olimpasi, do tala Owi kɔ̃a wenɔ vɛ kɛ wa fala nɛ kpo do wa ni.

¹⁶ Nɛ fáná ongba nɛ, nɛ nɛ úfú zala ngba nɛ, ɔ nɛ kɛ ma wia do winɔ 'da Gale ni. Oeklezianɔ i nga gɛ vɛ, wa tumba balɛ hã nɛ.

Tala mbula

¹⁷ Kɔ onyae, mi aka nɛ na, li nɛ sɔ̃ tɛ owinɔ kɛ wa dɛ na, nɛ, Owi kɔ̃a wenɔ, nɛ gɔnɔ sanga tɛ ngba nɛ, nɛ zu nɛ vĩ, nɛ nɛ tɛ kɔ̃̀ 'bɔ gɛnɛ bia wenɔ kɛ nɛ kɔ̃a zi ma dati ni gɔ ni. Nɛ yú wa do'do!

¹⁸ We duzu kɛ winɔ ni, wa dɛ́ a toe 'da Nwa 'da lɛ Kristo gɔ, nɛ nde wa fa tati a wala kpasi 'da wa wele nɛ iko. Wa ɔlɔ owinɔ do ɛ̃fɛ̃ lɛnggɛ, nɛ wa tɔ̃ ogba du lɛnggɛ we vĩ do zu winɔ kɛ wa ĩ̀ ti mɔ ngboo gɔ ni.

¹⁹ Nɛ nde kɛ 'da nɛ, nɛ kɔ̃a zu li Nwa, nɛ winɔ vɛ́ wa zila sako kɔ̃a we 'da nɛ, nɛ ma hã yangga hã mi wena. Nɛ mi kɔ̃a na, nɛ ĩ ti mɛ kɛ ma a dia ni, takɔ nɛ dɛ ma, nɛ nɛ tɛ kɔ̀lɔ̀ do 'dã mɔ gɔ.

²⁰ Gale, wele gɛa sila kɔlɔ fala gbɛ ngawi 'da Satana ia, nɛ a e sɛ a do ti nyanga nɛ. E kɔ dia zã 'da Nwa 'da lɛ Yezu ma 'bana do nɛ vɛ!

²¹ Timote, ngba mi wi dɛa toe 'da Nwa, fala nɛ kpo do onya mi be Yudanɔ, Lusiusi, Yasoni, do Sosipatɛrɛ, wa hã balɛ hã nɛ.

²² Mi Tɛrtiusi, kɛ mi kɔmɔ do nu Polo hã nɛ gɛ, mi hã balɛ hã nɛ do zu li Nwa Yezu.

²³ Nɛ Gayusi, kɛ mi ɔ kɔ tɔa 'da a, nɛ Owi kɔ̃a wenɔ wa mba 'bɔ li ngba wa 'da a fai ni, a fana nɛ. Nɛ Erastɛ, wi fɔmɔ mbili kɔ le gɛ, do nya lɛ Kuartusi, wa hã balɛ hã nɛ. [

²⁴ E kɔ dia zã 'da Nwa 'da lɛ Yezu Kristo ma 'bana do nɛ vɛ! Amɛ.]

Lɛ dɔ́nggɔ́ Gale

²⁵ Lɛ dɔ́nggɔ́ Gale, we duzu kɛ a do ngawi we dɛ na, kɔ̃a we 'da nɛ nganda, ɔ nɛ kɛ Dia Sakoe 'da Yezu Kristo, kɛ mi bia zi ma hã nɛ tɔ̃a ni. Dia Sakoe ni, mɛ a wenɔ kɛ ma usu zɛ́ tɛ̃ ɛ dati belee ni.

²⁶ Kɔ ngangga ni, Gale bia ma dɛ wila fala tɛ kɔ 'bukunɔ 'da Owi gba do nu a. Nɛ Gale kɛ a ɔ fai ni, a ba nu a na, lɛ be usu wenɔ ni hã winɔ ngɔ nù gɛ vɛ́, takɔ wa kɔ̃ zu li Yezu, nɛ wa zele nu a.

²⁷ E kɔ Gale kɛ a zu a kpo a wi hã zã ni, a kpa dɔ̃lɔ̃ li, do wala 'da Yezu Kristo kɔ sabɛlɛ do sabɛlɛ! Amɛ.