ROMA 15 - WE NU GALE 1995

Wele do wele fá we hã yangga hã ngba a

¹ Lɛ owinɔ kɛ kɔ̃a we 'da lɛ a nga ni, ma wia na, lɛ gala ongba lɛ, wanɔ kɛ kɔ̃a we 'da wa ngàndà gɔ ni. Nɛ lɛ tɛ dɛ̀ mɔ kɛ ma hã yangga hã kili tɛ lɛ wele nɛ iko ni gɔ.

² Nɛ nde wele do wele fá mɛ kɛ ma hã yangga hã ngba a, nɛ ma gala a, takɔ kɔ̃a we 'da a gã dɛ dati ni.

³ Mba gɔ, Kristo fà zi we hã yangga hã kili tɛ a wele nɛ gɔ, nɛ nde ma ɔ nɛ kɛ wa kɔma kɔ 'Buki 'da Gale na: “Dɛlanɔ kɛ winɔ wa dã do mɔ ni, ma si vɛ dɛ ngɔ mi” ni.

⁴ Wenɔ vɛ kɛ wa kɔma zɛ́ ma kɔ 'Buki 'da Gale ni, wa kɔmɔ we be do mɔ hã lɛ. We kɛ wenɔ ni gala lɛ na, lɛ ɔ do du sila, nɛ lɛ kpa kpã sila, we gbini zã lɛ do dia mɛnɔ kɛ lɛ kpa sɛ ma 'do gɛ ni.

⁵ E kɔ Gale, wele du sila, kɛ a hã kpã sila hã winɔ ni, a hã ngawi hã nɛ na, nɛ ɔ do linggamɔ kpo, ɔ nɛ kɛ Yezu Kristo bia ma hã lɛ ni.

⁶ Na mɛ ni, nɛ nɛ mba sɛ nu nɛ kpo we dɔnggɔ Gale, Baa Nwa 'da lɛ Yezu Kristo do sila nɛ kpo.

Nɛ kɔ̃́ gɛnɛ ngba nɛ

⁷ We duzu ma, ma wia na, nɛ kɔ̃ gɛnɛ ongba nɛ, ɔ nɛ kɛ Kristo kɔ̃a zi do gɛnɛ nɛ ni, takɔ ma hã dɔ̃lɔ̃ li hã Gale.

⁸ Mba gɔ, mi tɔ̃ hã nɛ do gbãlã we na, Yezu hɔa zi wi dɛa toe 'da Oyudanɔ, nɛ a dɛa mɛnɔ vɛ kɛ Gale kpua zi mbulu nɛ hã oyaa lɛ ni. Na mɛ ni, a bia na, Gale kpóló nu ɛ gɔ.

⁹ Nɛ a tɛa 'bɔ we ĩ 'bako hã ogele winɔ, takɔ wa dɔnggɔ Gale do wala 'da a. Ma ɔ nɛ kɛ wa kɔma kɔ 'Buki 'da Gale na: “We duzu ma, mi dɔnggɔ sɛ mɔ sanga ogele winɔ, nɛ mi ga sɛ zuma hã mɔ.”

¹⁰ Nɛ wa kɔma 'bɔ na: “Nɛ, ogele winɔ, nɛ dɛ́ yangga fala nɛ kpo do owinɔ kɛ Gale saka wa ni!”

¹¹ Nɛ wa kɔma 'bɔ mbé nɛ na: “Nɛ, ogele winɔ vɛ́, nɛ dɔ́nggɔ́ Nwa! Ma wia na, winɔ vɛ wa dɔnggɔ a!”

¹² Nɛ Ezai, wi gba do nu Gale tɔ̃a 'bɔ na: “Mbe be zã Yɛse a tɛ sɛ, nɛ a dungu sɛ nwa ngɔ ogele winɔ, nɛ wa gbini sɛ zã wa do a.”

¹³ E kɔ Gale kɛ a dɛ na, lɛ gbini zã lɛ do a ni, a dɛ 'bɔ na, sila nɛ dunu do yangga, nɛ nɛ ɔ do gɛa sila, we duzu kɔ̃a we nɛ kɔ̃a do a ni. Na mɛ ni, nɛ Hi Wi Santo hã ngawi hã nɛ na, nɛ gbini zã nɛ do Gale dɛ dati fai.

Polo kɔma wenɔ gɛ we ge nde?

¹⁴ Onyae, kafi bina, mi ĩ na, nɛ do dia zã dɛ 'da ongba nɛ wena, nɛ nɛ ĩ ti mɛnɔ nɛ wia tɛ dɛ nɛ ni de wena, nɛ nɛ wia tɛ tɔ̃ mbula hã ongba nɛ.

¹⁵ Gɛnɛ kɔ na mɛ ni, nɛ nde mi kɔma mbɛti gɛ hã nɛ dɛ wila fala, takɔ mi gba ta zu nɛ ngɔ wenɔ kɛ wa bia zi ma hã nɛ ia ni. Mi kɔma ma na mɛ ni, we duzu kɛ Gale bia zi dia zã 'da a hã mi,

¹⁶ nɛ a ia mi do wi dɛa toe 'da Yezu Kristo sanga ogele winɔ. Mi dɛa to be Dia Sakoe 'da a, ɔ nɛ kɛ mi a nganga ni, takɔ owinɔ kɛ wa a Oyuda gɔ ni, wa hɔ dia dɔnggamɔ kɛ mi hã ma hã Gale ni. Dɔnggamɛ ni, Hi Wi Santo 'dafa ma na, ma ɔ santo li Gale, nɛ ma hã yangga hã a.

¹⁷ Kɔ nɛ́ kɛ mi mba kpo do Kristo ni, mi wia we dɔnggɔ tɛ mi do toe 'da Gale kɛ mi dɛ ni.

¹⁸ Mba gɔ, fala kɛ mi nɛ tɔ̃ toe 'da mi, nɛ mi tɔ̃ tati a we mɛnɔ kɛ mi dɛa ma do ngawi 'da Kristo ni, takɔ mi mana do winɔ kɛ wa a Oyuda gɔ ni na, wa zele we nu Gale. We kɛ wi ia wenɔ dɛ nu mi, wi a Kristo, nɛ a dɛa tonɔ,

¹⁹ do gba sɔ̃ mɛnɔ, do ɔngbamɛnɔ do wala 'da mi, nɛ a hã 'bɔ ngawi 'da Hi Wi Santo hã mi. Ma kɛ mi yula zi Yeruzalɛmɛ, nɛ mi yɛnggɛ tɛ be Dia Sakoe 'da Kristo gbaa, nɛ mi hɔ ngɔ nù Iliri.

²⁰ Nɛ nde mi kɔ̃a zi we be ma tati nɛ hã owinɔ kɛ wa zèlè mbe kuti we 'da Kristo gɔ ni. We kɛ mi kɔ̃̀ we gbala nu dɛa to kɛ gele wele ndua ma ni gɔ,

²¹ nɛ nde mi kɔ̃a we dɛ ɔ nɛ kɛ wa kɔma kɔ 'Buki 'da Gale na: “Owinɔ kɛ wa zèlè zɛ́ mbe sakoe 'da a gɔ ni, wa zɔ sɛ a. Nɛ owanɔ kɛ wa ĩ̀ zɛ́ ti a gɔ ni, wa ĩ sɛ ti a” ni.

Polo kɔ̃a we nɛ tɛ Roma

²² Nɛ zɔ́ mɛ ma amba zi mi fai we nɛ 'da nɛ i gɛ a ni.

²³ Nɛ nde ngangga ni, dɛa toe 'da mi ngɔ nùi ti mi gɛ sɔkpɔ ia. 'Do sabɛlɛ dɛlɛ wena, mi do wɔ we nɛ we zɔ nɛ,

²⁴ nɛ mi lengge na, mi hɔ sɛ 'da nɛ i ngangga gɛ. Mi ɛlɛ sɛ 'da nɛ do 'da fala kɛ mi nɛ sɛ Ɛspanyɛ i ni. Nɛ m kɔ̃a na, lɛ ɔ mbe do nɛ sĩ, nɛ nɛ gala mi li wala gɛnɛ 'da mi we nɛ dɛ Ɛspanyɛ i.

²⁵ Nɛ nde ngangga gɛ, mi nɛ nɛ Yeruzalɛmɛ, we gala Owi kɔ̃a wenɔ i mɔ ni.

²⁶ Mba gɔ, Owi kɔ̃a wenɔ tɛ ngɔ nù Masedɔanɛ do Akai, wa kpa zi linggamɔ na, lo da mbili do sila lo, hã lo tombo ma tɛ Yeruzalɛmɛ i, we gala do Owi 'bakonɔ sanga Owi kɔ̃a wenɔ i mɔ ni.

²⁷ Wa wele nɛ, wa kɔ̃a zi do sila wa we dɛ na mɛ ni, nɛ nde ĩ na, wa zi do ku'da dɛ 'da Oyudanɔ boe. Mba gɔ, Owi kɔ̃a wenɔ kɛ wa a Oyuda ni, wa kɛ̃a zi sanga dia mɛnɔ kɛ Gale hã zi ma we hi wa ni do owanɔ kɛ wa a Oyuda gɔ ni. Kɔ we duzu ma, ma wia na, owinɔ kɛ wa a Yuda gɔ ni, wa gala tɛ mɛ 'bɔ Oyudanɔ do omɛnɔ kɛ wa zɔlɔ ni.

²⁸ Kɔ 'da fala mi hã mbili ni hã wa do'do, kɔ toe ni ma e, nɛ mi le sɛ wala we nɛ dɛ Ɛspanyɛ i, sɛ nɛ mi ɛlɛ sɛ 'da nɛ i de.

²⁹ Nɛ mi ĩ na, gɛnɛ mi nɛ sɛ 'da nɛ i ni, Kristo a wele sɛ nu a tɛ lɛ do nɛ wena.

³⁰ Kɔ onyae, do zu li Nwa 'da lɛ Yezu Kristo, nɛ we duzu kɔ̃ gɛnɛ ngba wi kɛ Hi Wi Santo hã ma hã lɛ ni, mi aka nɛ na, nɛ sámbálá Gale we mi, takɔ a gala mi kɔ bole mi bi gɛ.

³¹ Nɛ sámbálá Gale we mi na, dɔ mi kpá ngamɔ ti kɔ̃ Owi ngɔ nù Yude, kɛ wa tɛ kɔ̃̀ zu li Kristo gɔ ni gɔ. Nɛ nɛ sámbálá 'bɔ a, takɔ Owi kɔ̃a wenɔ tɛ Yeruzalɛmɛ wa kɔ̃ gɛnɛ mbili kɛ mi nɛ nɛ hã wa ni do dia nɛ.

³² Na mɛ ni, fala kɛ zã Gale kɔ̃, nɛ mi sɛ do yangga wena we nɛ 'da nɛ i, we kpe mbe tɛ mi.

³³ E kɔ Gale wele gɛ̃a sila, a ɔ do nɛ vɛ́! Amɛ.