ROMA 14 - WE NU GALE 1995

Nɛ tɛ 'bìlì we mɔ́ ongba nɛ gɔ

¹ Nɛ kɔ̃́ gɛnɛ owinɔ kɛ kɔ̃a we 'da wa gã̀ gɔ ni, nɛ nɛ tɛ kɔ̀'dɔ̀ linggamɛnɔ 'da wa gɔ.

² Ombe wa lengge na, lo wia tɛ nyɔngɔ mɛnɔ vɛ, nɛ nde ombe winɔ kɛ kɔ̃a we 'da wa gã̀ gɔ ni, wa nyɔ́ngɔ́ osa'de gɔ, wa nyɔngɔ tati a ogele mɛnɔ iko.

³ Kɔ ma wè na, wele kɛ a nyɔngɔ mɛnɔ vɛ nyɔnga ni, a zɔ ngba a kɛ a saka nyɔngɔmɔ nu a saka ni, li a yala iko gɔ. Nɛ wele kɛ a saka nyɔngɔmɔ nu a saka ni, a tɛ 'bìlì we 'da ngba a kɛ a nyɔngɔ mɛnɔ vɛ nyɔnga ni gɔ, we kɛ Gale kɔ̃a gɛnɛ a ia.

⁴ Mɔ gɛ, kɛ mɔ 'bili we 'da wi dɛa toe 'da ngba mɔ ni, mɔ a wio nde? Fala kɛ a dɛ toe 'da a do dia nɛ, tabi a dɛ́ ma de gɔ, nɛ nde mɛ a we 'da mɔ gɔ, mɛ a we 'da wele a. A dɛ sɛ toe do dia nɛ, we kɛ Nwa wia tɛ gala a tɛ nɛ.

⁵ Ombe winɔ wa lengge na, mbe tũnɔ nɛa ngɔ ngbɛ ɛ, nɛ ombe wa lengge na, tũnɔ ma wia kɔ̃ vɛ iko. E kɔ wele do wele 'dafa linggamɛ 'da a, nɛ a kɔ̃ na, kɛ ɛ lengge ni, mɛ a gbãlã we.

⁶ Wele kɛ a dɔnggɔ mbe tũnɔ na, ma nɛa ngɔ ngbɛ ɛ ni, a dɛ ni we dɔnggɔ do Nwa Gale. Nɛ wele kɛ a nyɔngɔ mɛnɔ vɛ́ iko ni, a nyɔngɔ ma we dɔnggɔ do Nwa Gale. Mba gɔ, a hã iɔ̃nae hã Gale we nyɔngɔmɛ 'da a hã. Nɛ wele kɛ a saka nyɔngɔmɔ nu a saka ni, a dɛ ni we dɔnggɔ do Nwa Gale, nɛ a hã 'bɔ iɔ̃nae hã Gale we nɛ hã.

⁷ Mba gɔ, wele kpo sanga lɛ dúngú ngɔ nù gɛ tati a we a zu a kpo iko gɔ, nɛ wele fé 'bɔ tati a we a zu a kpo iko gɔ.

⁸ Kɔ fala kɛ lɛ dungu nza, nɛ nde lɛ dungu we Nwa. Tabi ma ɔ 'bɔ do fio, nɛ nde lɛ fia we Nwa. Na mɛ ni, gɛnɛ kɔ lɛ 'bana nza, tabi lɛ fe, nɛ nde lɛ a winɔ 'da Nwa.

⁹ We duzu kɛ Kristo fia, nɛ a tunu kɔ fio, takɔ a ɔ Nwa 'da ofionɔ, do winɔ kɛ wa 'bana nza ni.

¹⁰ Kɔ mɔ, gulu kɛ mɔ 'bili we mɔ́ ngba mɔ we ge nde? Nɛ mɔ, gulu kɛ mɔ zɔ ngba mɔ yala iko ni we ge nde? Lɛ vɛ́, lɛ yolo sɛ dati Gale, takɔ a 'bili wenɔ 'da lɛ.

¹¹ We kɛ wa kɔma kɔ 'Buki 'da Gale na: “Mi kana tɛ mi do zu li mi na, winɔ vɛ wa gu sɛ gba zugolo dati mi. Nɛ wele do wele a dɔnggɔ sɛ mi na mi a Gale. Mi Nwa, mi tɔ̃a ni.”

¹² Na mɛ ni, wele do wele a hɔ sɛ dati Gale, nɛ a tɔ̃ sɛ gulu we 'da a.

Mɔ tɛ fì ngba mɔ kɔ 'dã mɔ gɔ

¹³ Kɔ we duzu ma, lɛ lá fala 'bili wenɔ 'da ongba lɛ. Nɛ ma wia na, wele 'bili do kɔ sila ɛ na, ɛ dɛ́ sɛ mɔ kɛ ma wia we ɔkɔlɔ ngbɛ ɛ, kɔ a te kɔ 'dã mɔ ni gɔ.

¹⁴ Nɛ́ kɛ mi mba kpo do Nwa Yezu ni, mi ĩ ngboo na, nyɔngɔmɔ kɛ ma a mɔ ndi li Gale ni bina. Nɛ nde fala kɛ mbe wele lengge na, nyɔngɔmɛ ni a mɔ ndi li Gale, sɛ nɛ ma hɔ mɔ ndi we duzu wi ni de.

¹⁵ Kɔ fala kɛ mɔ nyɔngɔ mɔ, kɔ nyɔngɔmɛ ni yɛkɛ sila ngba mɔ yɛka, nɛ nde ma be na, mɔ kɔ̃̀ gɛnɛ a gɔ. Ma wè na mɔ 'danga ngba mɔ kɛ Yezu fia we a ni, do wala nyɔngɔmɔ nu mɔ gɔ.

¹⁶ Mɛ kɛ mɔ lingga na, ma dia we mɔ ni, mɔ tɛ fà na, ma hɔ 'dã mɔ li ngba mɔ gɔ.

¹⁷ We duzu kɛ dɛa to nwa 'da Gale ma zɔ̀ nyɔngɔmɔ gɔ, nɛ nde mɛ a bɔlɔ zu dɛa mɔ, do gɛ̃a sila, do yangga kɛ Hi Wi Santo hã ma ni.

¹⁸ Wi kɛ a dɛ toe 'da Kristo na mɛ ni, nɛ a hã yangga hã Gale, nɛ Owele wa dɔnggɔ 'bɔ a.

¹⁹ Kɔ we duzu ma, lɛ fá we dɛ mɔ kɛ ma fi dɛa na sanga lɛ, nɛ ma nganda kɔ̃a we 'da ongba lɛ ni.

²⁰ Nɛ tɛ 'dàngà toe 'da Gale we duzu nyɔngɔmɔ iko gɔ. Mɛ a gbãlã we na, nyɔngɔmɛnɔ vɛ́ a sa li Gale, nɛ nde ma hɔ 'dã mɔ, fala kɛ mɔ nyɔngɔ, hã ma fi ngba mɔ kɔ 'dã mɔ ni.

²¹ Kɔ ma dia fɛ̃ na, mɔ tɛ nyɔ̀ngɔ̀ sa'de gɔ, nɛ mɔ tɛ nɔ̀ dɔ̃ gɔ, nɛ mɔ bɛ mɛnɔ vɛ kɛ ma wia we fi ngba mɔ kɔ 'dã mɔ ni.

²² Kɔ mɛ kɛ mɔ lengge na, mɛ a 'dã mɔ, tabi mɛ a dia mɔ ni, ma zɔa tati a mɔ do Gale zu nɛ bɔa. Wi kɛ a dɛ mɔ, kɔ a lengge na ma a dia, nɛ sila a do kafi ngɔ nɛ bina ni, a a wi yangga.

²³ Kɔ wi kɛ sila a do kafi we mbe nyɔngɔmɔ, kɔ a nyɔngɔ tɛ mɛ iko, nɛ nde a tia do ngbangga dati Gale, we kɛ a dɛa mɛ kɛ sila a do kafi ngɔ nɛ ni. Nɛ mɛnɔ vɛ kɛ wele dɛ ma, nɛ sila a do kafi ngɔ nɛ ni, ma hɔa 'dã mɔ li Gale.