ROMA 13 - WE NU GALE 1995

Lɛ dɔ́nggɔ́ onwanɔ 'da Leta

¹ Ma wia na, winɔ vɛ wa dɔnggɔ onwanɔ 'da Leta, we duzu kɛ dɛa to nwanɔ vɛ ma yula 'da Gale, nɛ wi 'bɔ a Gale hã a a onwanɔ vɛ kɛ lɛ do wa sɔɛ gɛ.

² Kɔ fala kɛ wele bɛ̃ we dɔnggɔ wa, nɛ nde wi ni bɛa mbulanɔ kɛ Gale ia ni, nɛ a fa ngbangga dɛ tɛ a iko.

³ Mba gɔ, owinɔ kɛ wa dɛ de mɔ ni, kili Onwanɔ wè tɛ ba wa gɔ, nɛ nde wi a owanɔ kɛ wa dɛ 'dã mɔ ni, sɛ nɛ kili Onwanɔ ba wa de. Kɔ fala kɛ mɔ kɔ̃̀ na, kili Onwanɔ ba mɔ gɔ, nɛ ma wia na, mɔ dɛ de mɔ, nɛ wa dɔnggɔ sɛ mɔ.

⁴ Mba gɔ, nwa a a wi dɛa to 'da Gale, nɛ a dɛ ma we gala mɔ na, mɔ kpa dia dungu. Kɔ fala kɛ mɔ dɛ 'dã mɔ, nɛ mɔ dɛ́ kili a. We duzu kɛ Gale hã̀ dɛa to nwa ni hã a yala iko gɔ. Gale hã toe ni hã a na, a be nɔ̃lɔ̃ zã 'da ɛ, nɛ a hã etumbu hã wi dɛ 'dã mɔ.

⁵ We duzu ma, ma wia na lɛ dɔnggɔ dɛa to nwa 'da a. Nɛ lɛ tɛ dɔ̀nggɔ̀ a tati a we yu kili nɔ̃lɔ̃ zã 'da Gale iko gɔ, nɛ nde lɛ dɔnggɔ a, ɔ nɛ kɛ kɔ sila lɛ be hã lɛ na, lɛ dɛ ni.

⁶ Gulu kɛ ma wia 'bɔ na, nɛ futa takonɔ gɛ a ni. We duzu kɛ winɔ kɛ wa dɛ to futa takoe ni, Gale a a wa, takɔ wa dɛ toe ni do wala olo nɛ.

⁷ Nɛ gésé ku'da 'da wele do wele hã a. Nɛ nɛ fútá takonɔ tɛ̃ ɛ do tɛ ɛ hã owinɔ kɛ nɛ wia tɛ futa ma hã wa ni. Nɛ nɛ dɛ́ kili wanɔ kɛ nɛ wia we dɛ kili wa ni, nɛ nɛ dɔ́nggɔ́ wa.

Kɔ̃ gɛnɛ ngba wi

⁸ Nɛ tɛ ɔ̀ do ku'da mɔ́ wele zu nɛ gɔ. 'Bali ku'da kpo kɛ ma wia we ɔ zu nɛ, mɛ a kɛ na, nɛ kɔ̃ gɛnɛ ongba nɛ. Wi kɛ a kɔ̃ gɛnɛ ngba a, nɛ nde a dɛa mbulanɔ 'da Mɔizɛ vɛ́ ia.

⁹ We duzu kɛ mbula ni tɔ̃a na: “Mɔ tɛ ɔ̀ do wili tabi wuko mɔ́ ngba mɔ gɔ, mɔ tɛ gbɛ̀ wele gɔ, mɔ tɛ zu mɔ gɔ, nɛ mɔ tɛ è sila mɔ ngɔ mɔ mɔ́ ngba mɔ gɔ.” Nɛ mbulanɔ ni do tala mbulanɔ vɛ ma mba dɛ kɔ mbula kpo gɛ na: “Mɔ kɔ̃́ gɛnɛ ngba mɔ, ɔ nɛ kɛ mɔ kɔ̃a do kili tɛ mɔ wele nɛ ni.”

¹⁰ Wi kɛ a kɔ̃ gɛnɛ ngba a ni, a wè tɛ dɛ 'dã mɔ dɛ 'da a gɔ. Kɔ wele kɔ̃ gɛnɛ ngba a, nɛ nde a dɛa mbula 'da Mɔizɛ vɛ ia.

Nɛ 'dáfá tɛ nɛ we tɛa 'da Kristo

¹¹ Nɛ́ kɛ nɛ ĩ ti ngba soe kɛ lɛ do ma gɛ ĩ ni, nɛ kúlú ngɔ li yala, we kɛ ngba soe Gale nɛ kpasa do lɛ ni, ma kɔla ia. Ma kɔla do lɛ dɔ̃ɔ nɛa ngɔ ngba soe kɛ lɛ ndua zi do kɔ̃ zu li a ni.

¹² 'Dɔkɔlɔ tũi nyɛla, nɛ fala kɔlɔ tɛ sa nɛ ia. Kɔ lɛ lá fala dɛ 'dã mɛnɔ kɛ ma dɛ tɛ ɛ kɔ gba tũ ni, nɛ lɛ kálá mɔ bi bolo gba wese dɛ kɔ̃ lɛ.

¹³ Ma wia na, lɛ dɛ mɔ tɛ lɛ do wala olo nɛ, ɔ nɛ kɛ lɛ a Owi sa fala ni. Lɛ lá fala dɛ nga'ba, do te bá dɔ̃, do yɛnggɛ vĩ zu yali, do dɛ mɔ sape, do mɔ̃lɔ̃ do wele, do dɛ bɔnɛ.

¹⁴ Nɛ bá wala hã Nwa 'da lɛ Yezu Kristo na, a bi zu nɛ, nɛ nɛ tɛ fà we dɛ mɔ kɛ wɔ kɔ kili tɛ nɛ kɔ̃a ni gɔ.