ROMA 10 - WE NU GALE 1995

¹ Onyae, mɛ kɛ mi kɔ̃a do sila mi vɛ, nɛ mi aka Gale we nɛ, mɛ a kɛ na, a kpasa onya mi Oyudanɔ.

² Mi ĩ na, wa do wɔ we dɛ to hã Gale wena, nɛ nde wa dɛ́ to hã a do wala olo nɛ gɔ.

³ Wa ĩ̀ ti tɛlɛ tɛ kɛ Gale dɛ na, wele hɔ wi bɔlɔ zu li a ni gɔ. Wa yamba we hɔ wi bɔlɔ zu li Gale do ngawi 'da wa wele nɛ, nɛ wa kɔ̃̀ wala kɛ Gale dɛ na, wele hɔ wi bɔlɔ zu li a ni gɔ.

⁴ Mba gɔ, Kristo dɛa na, dɛa toe 'da mbula ma sɔkpɔ. Nɛ winɔ vɛ kɛ wa kɔ̃a zu li a ni, wa hɔa wi bɔlɔ zu li Gale.

Winɔ vɛ̃ kɛ wa kɔ̃ zu li Yezu ni wa kpasa sɛ

⁵ Nɛ zélé we kɛ Mɔizɛ kɔmɔ zɛ́ si ngɔ kɛ ma wia na, wele dɛ mbula, sɛ nɛ a hɔ wi bɔlɔ zu li Gale de ni. A kɔma na: “Wi kɛ a dɛ mɛnɔ vɛ kɛ mbula 'da Gale tɔ̃ ni, nɛ mbula ni ma kpasa sɛ a.”

⁶ Nɛ nde we hɔ wi bɔlɔ zu li Gale do wala kɔ̃a we, a kɔma 'bɔ na: “Mɔ tɛ àkà do kɔ sila mɔ na, wi nɛ kũ gbaa li nza ngɔ i a wio nde gɔ.” (Gulu nɛ na, kũ gbaa ngɔ i we kpa Yezu, we zĩlĩ do a nù nga.)

⁷ “Nɛ mɔ tɛ àkà 'bɔ na, wi nɛ zĩlĩ gbaa kɔ le 'da ofionɔ ti nù i ni a wio nde gɔ.” (Gulu nɛ na, zĩlĩ gbaa kɔ le 'da ofionɔ i we kpa Yezu, hɔ do a dɛ 'da lɛ nga.)

⁸ Gulu lɛnggɛ 'Buki 'da Gale tɔ̃a ni na ge nde? Gulu nɛ na: “We nu Gale ma dɔ̃ɔ dɛ kɛ zã mɔ gɛ. Ma a kɔ nu mɔ, nɛ ma a kɔ sila mɔ.” Nɛ we ni, mɛ a sakoe kɛ lɛ be ma, takɔ nɛ kɔ̃ zu U Kristo ni.

⁹ We duzu kɛ 'da fala mɔ tɔ̃ do nu mɔ dɛ li Owele na, Yezu Kristo a Nwa, nɛ mɔ kɔ̃ do kɔ sila mɔ na, Gale tunu zi a kɔ fio, nɛ mɔ kpasa sɛ.

¹⁰ Mba gɔ, wi kɛ a kɔ̃ zu li Yezu do kɔ sila a, nɛ Gale a dɛ sɛ na, wi ni hɔ wi bɔlɔ zu li a. Nɛ wi kɛ a tɔ̃ do nu a na, ɛ kɔ̃a zu li Yezu, nɛ Gale a kpasa sɛ a.

¹¹ We kɛ wa kɔma kɔ 'Buki 'da Gale na: “Winɔ vɛ kɛ wa kɔ̃a zu li a ni, wa kpá sɛ sape gɔ.”

¹² Na mɛ ni, lɛ Oyudanɔ do ogele winɔ lɛ là ngba lɛ gɔ. Nwa 'da lɛ kpo wi a Yezu Kristo, kɛ a kɛ dia mɛnɔ hã winɔ vɛ kɛ wa sa mɔ do zu li a ni.

¹³ Mba gɔ, wa kɔma kɔ 'Buki 'da Gale na: “Winɔ vɛ kɛ wa sa mɔ do zu li Nwa ni, nɛ a kpasa sɛ wa.”

¹⁴ Kɔ wa nɛ dɛ fala sa mɔ do li a, kɛ wa kɔ̃̀ zu li a gɔ ni nɛ nde? Nɛ wa nɛ dɛ fala kɔ̃ zu li a, kɛ wa zèlè sako nɛ gɔ ni nɛ nde? Nɛ wa nɛ dɛ fala zele sakoe 'da a, kɛ wele bè hã wa gɔ ni nɛ nde?

¹⁵ Nɛ wa nɛ dɛ fala be we 'da a, tɛ kɛ wa tòmbò wi be ma gɔ ni nɛ nde? Ma ɔ nɛ kɛ wa kɔma kɔ 'Buki 'da Gale na: “Yangga wena we zɔ owinɔ kɛ wa tɛ do dia sakoe hã lɛ ni.”

¹⁶ Nɛ nde owinɔ wa kɔ̃̀ Dia Sakoe ni vɛ gɔ. Ma kɛ Ezai tɔ̃a zɛ́ na: “Nwa, fo wi kɔ̃ gɛnɛ we lɛ tɔ̃ gɛ bina.”

¹⁷ Na mɛ ni, ma wia na, owele wa zele we wa be ni, sɛ nɛ wa kɔ̃ de. Nɛ we wa be ni, mɛ a Dia Sakoe 'da Kristo.

¹⁸ Kɔ ma ɔ ní, nɛ mi aka nɛ na, Oisraɛlɛ wa zèlè zi we ni gɔ nde? Wa zila zi ma zila. Mba gɔ, wa kɔma kɔ 'Buki 'da Gale na: “Wala gɛlɛ owi be we, ma yɛ'ba zi ngɔ nùi gɛ vɛ. Nɛ wila wenɔ 'da wa ma hɔa gbaa tɛ nyanga nzanɔ vɛ.”

¹⁹ Nɛ mi aka 'bɔ nɛ na, Oisraɛlɛ wa ĩ̀ zi ti gulu ma gɔ nde? Wa ĩ zi ti gulu nɛ ĩ. Mba gɔ, Mɔizɛ tɔ̃a zɛ́ na: “Gale tɔ̃a na: ‘Aa nɛ, Oisraɛlɛ, mi yulu sɛ bɔnɛ kɔ sila nɛ dɛ 'da wanɔ kɛ wa a ngbongbo nu kɔnggɔ wele gɔ ni. Mi dɛ sɛ na, nɛ ɔ do 'dã kɔ sila dɛ 'da nu kɔnggɔnɔ kɛ wa zɔla hã zã ni.’ ”

²⁰ Dɛ ngɔ nɛ, Ezai tɔ̃a 'bɔ na: “Gale tɔ̃a na: ‘Winɔ kɛ wa fà zɛ́ mi gɔ ni, wa kpa mi ia. Nɛ mi bia tɛ mi hã winɔ kɛ wa àkà zɛ́ we ĩ ti mi gɔ ni.’ ”

²¹ Nɛ a tɔ̃a we si ngɔ Oisraɛlɛ na: “Tũ kpo kpo, mi tɛ yɛlɛ kɔ̃ mi tɛ sa mɔ hã owinɔ, nde wa zélé we nu mi gɔ, nɛ wa do nga zu wena.”