ROMA 1 - WE NU GALE 1995

¹ Wi a mi Polo, wi dɛa toe 'da Yezu Kristo hã mi kɔmɔ mbɛti gɛ hã nɛ. Gale sa zi mɔ hã mi, nɛ a ia mi do wi nɛ to, nɛ a saka mi we be Dia Sakoe 'da a hã Owele.

² Dia Sakoe ni, Gale kpua zɛ́ mbulu nɛ belee do wala 'da Owi gba olo nu a, nɛ wa kɔmɔ ma kɔ 'Buku 'da a.

³ Sakoe ni ma tɔ̃ gulu we 'da e 'da a Yezu Kristo, kɛ a a Nwa 'da lɛ ni. A a wele, nɛ wa kua a dɛ kɔ nu fɛlɛ kula 'da nwa Davidi.

⁴ Hã fala kɛ mɔ lengge do hi wi 'da a kɛ ma santo ni, nɛ nde Gale bia na, a a be 'da ɛ, kɛ a do ngawi wena ni. Gale bia ma 'da fala kɛ a tunu a kɔ fio ni.

⁵ Nɛ do wala 'da a, Gale bia dia zã 'da a hã mi, nɛ a ia mi do wi nɛ toe 'da a, takɔ mi tɔ̃ hã ogele nu fɛlɛ kulanɔ vɛ na, wa kɔ̃ zu li Yezu Kristo, nɛ wa zele we nu a.

⁶ Nɛ nɛ, Owi Roma, nɛ sanga ogele winɔ ni boe. Gale sa mɔ hã nɛ na, nɛ hɔ tɛ mɛ 'bɔ winɔ 'da Yezu Kristo.

⁷ Ma kɛ mi kɔmɔ mbɛti gɛ hã nɛ, Owi Roma. Mba gɔ, Gale kɔ̃a gɛnɛ nɛ, nɛ a sa mɔ hã nɛ na, nɛ hɔ winɔ 'da ɛ. E kɔ Baa lɛ Gale, do Nwa Yezu Kristo wa be dia zã 'da wa hã nɛ, nɛ wa hã gɛa dungu hã nɛ.

Polo kɔ̃a we nɛ we zɔ owi Kristonɔ tɛ Roma

⁸ Dati ngboo, mi hã iɔ̃nae hã Gale 'da mi do wala 'da Yezu Kristo, we duzu nɛ vɛ. Mba gɔ, sako kɔ̃a we 'da nɛ yɛ'ba falanɔ vɛ.

⁹ Gale kɛ mi dɛ toe hã a, tɛ be Dia Sakoe 'da Be 'da a do sila mi kpo ni, a ĩ na, we mi tɔ̃ ni, mɛ a ngbongbo we. A ĩ na, mi lengge do nɛ kɔ sambala 'da mi lingga fai.

¹⁰ Nɛ mi sambala Gale na, a kɔ̃, nɛ a hã wala hã mi na, mi nɛ we zɔ nɛ.

¹¹ Mba gɔ, mi do wɔ wena we zɔ nɛ, takɔ Gale wele nu ɛ tɛ nɛ do wala 'da mi, hã kɔ̃a we 'da nɛ nganda.

¹² We tɔ̃ do dia nɛ, mi kɔ̃a we hɔ 'da nɛ i, takɔ lɛ nganda sila ngba lɛ do nɛ. Mba gɔ, kɔ̃a we 'da nɛ ma nganda sɛ sila mi, nɛ kɔ̃a we 'da mi nganda tɛ mɛ 'bɔ sila nɛ.

¹³ Kɔ onyae, nɛ ĩ́ na, mi yamba zi fala dɔ wena we nɛ 'da nɛ i, nɛ nde tia do sɔɛ gɛ, mi tɛ kpà wala gɔ. Mi kɔ̃a zi na, dɛa toe 'da mi ko mbe dia wala te sanga nɛ, ɔ nɛ kɛ ma dɛa tɛ ɛ tɛ mbe gele falanɔ ni.

¹⁴ Mba gɔ, mi do ku'da zu mi dɛ 'da winɔ vɛ: owinɔ li wa hu hũi, do wanɔ li wa tɛ hũ̀i gɔ, owanɔ wa yambala mɔ yambala, do wanɔ wa yàmbàlà mɔ gɔ ni. Nɛ ku'da ni, mɛ a be Dia Sakoe 'da Kristo hã wa.

¹⁵ Ma kɛ mi kɔ̃a na, mi nɛ tɛ mɛ 'bɔ 'da nɛ Roma i, hã mi be Dia Sakoe ni hã nɛ ni.

Dia Sakoe do ngawi wena

¹⁶ Mi do sape we be Dia Sakoe bina, we kɛ Dia Sakoe ni mɛ a ngawi 'da Gale we kpasa wanɔ vɛ kɛ wa kɔ̃a zu li Yezu Kristo ni. Dati ngboo a Oyudanɔ, nɛ 'do nɛ a ogele winɔ.

¹⁷ Mba gɔ, Dia Sakoe ni, ma be tɛlɛ tɛ kɛ Gale a fo sɛ Owele ti ngbangga, nɛ a dɛ na, wa hɔ Owi bɔlɔ zu li a ni. Nɛ nde ma wia na, wele kɔ̃ zu li Yezu Kristo, sɛ nɛ Gale a dɛ sɛ na, a hɔ wi bɔlɔ zu li a de. Fo mbé gele wala bina. Ma ɔ nɛ kɛ wa kɔmɔ kɔ 'Buki 'da Gale na: “Wi kɛ a kɔ̃ zu li Gale, nɛ Gale a dɛ sɛ na, a hɔ wi bɔlɔ zu li a, nɛ wi ni sɛ do kpasi” ni.

Winɔ vɛ̃ wa dɛa 'dã mɔ

¹⁸ Gbãlã we, mãlã 'da Gale yolo li nza i, nɛ ma te dɛ ngɔ winɔ vɛ kɛ wa bɛ̃ Gale, nɛ wa dɛ 'dã mɛnɔ kpi do kpi, nɛ 'dã mɛnɔ ni ma vĩ zu winɔ na, wa tɛ ĩ̀ ti gbãlã we 'da Gale gɔ ni.

¹⁹ Gale hã etumbu hã wa, we kɛ wele vɛ wia we ĩ ti a de wena. Gale bia wala kɛ wa wia we ĩ do ti a ni hã wa dɛ wila fala ngboo.

²⁰ Mba gɔ, yolo do kɛ Gale dɛa do omɛnɔ nyanga nza vɛ, omɛnɔ a dɛa ni ma be ngawi 'da a kɛ ndɔti nɛ bina, do tɛlɛ tɛ a ngboo. Mɛnɔ ni ma usu tɛ ɛ usu, nɛ nde owinɔ wa wia we ĩ ti nɛ. Nɛ we duzu ma, Gale wè do mbɔkɔ 'dã mɛ 'da wa gɔ.

²¹ Wa ĩ ti Gale ĩ, nɛ nde wa kɔ̃̀ we dɔnggɔ a ɔ nɛ kɛ ma wia do a ni gɔ, nɛ wa kɔ̃̀ 'bɔ we hã iɔ̃nae hã a gɔ. Linggamɛnɔ 'da wa ma busu, nɛ gbãlã zã wa bi do'do, nɛ wa 'bɔ do dia linggamɔ zu wa bina.

²² Wa zɔ tɛ wa nɛ́ wi hã zã ni, nɛ nde wa a oyɔnda wi.

²³ Olo li dɔnggɔ Gale kɛ a fé fio gɔ ni, nɛ wa dɔnggɔ osɛa te, kɛ ma be Owele kɛ wa fe fia, tabi ma be onɔɛ, do osa'de kɛ wa do nyanga wa boe, tabi wanɔ wa hala do ngu'du wa iko ni.

²⁴ Ma kɛ Gale la wa na, wa nɛ 'dɔkɔlɔ 'dã wɔ kɔ kili tɛ wa, nɛ wa dɛ o'dã mɔ sape do ngba wa.

²⁵ Nɛ wa ba gbãlã we 'da Gale, nɛ wa kpolo do bɛlɛ. Wa dɔnggɔ omɛnɔ kɛ Gale dɛa ni, nɛ wa dɛ to hã ma, nɛ nde wa kɔ̃̀ we dɔnggɔ Gale ngboo, kɛ a dɛa mɛnɔ ni gɔ. A a Gale kɛ ma wia na, lɛ dɔnggɔ a 'do ngbɛ ɛ do 'do ngbɛ ɛ. Amɛ!

²⁶ We duzu ma, Gale la wa na, wa dɛ 'dã mɔ sape nɛ́ kɛ wɔ zã wa tombo wa ni. Nɛ wukonɔ 'da wa, wa kpula tɛlɛ tɛ ɔ do ngba wi, ɔ nɛ kɛ Gale dɛa zɛ́ ma ni do'do, nɛ wa ɔ do kpo kpo ngba wa wukonɔ.

²⁷ Nɛ Owi wilinɔ tɛ mɛ 'bɔ, wa la fala ɔ do wukonɔ 'da wa do'do, nɛ wa dɛ wɔ tɛ kpo kpo ngba wa wi wilinɔ, nɛ wa ɔ do wa. Mɛnɔ wa dɛ ni, ma do sape wena. Nɛ wa kpa sɛ etumbu kɛ ma wia do 'dã mɛnɔ wa dɛ ni.

²⁸ Kɔ ɔ nɛ kɛ wa bɛ̃a na, lo kɔ̃̀ we ĩ ti Gale gɔ ni, Gale la wa na, wa 'bana do 'dã linggamɛnɔ 'da wa, hã wa dɛ mɛnɔ kɛ wele wè tɛ dɛ ma gɔ ni.

²⁹ Kɔ sila winɔ ni dunu do 'dã mɔ kpi do kpi: 'Dã sila, dɛ nga'ba, ɔ do mãlã, dɛ bɔnɛ, gbɛ wele, kpa we, dɛ 'dã hã, ɔlɔ wele, do tɔ̃ ngalangba.

³⁰ Wa a wi tɔ̃ tɛ wi, do wi sɛnɛ Gale, nɛ wa tulu ngba wa wena. Wa a wi gã zu, nɛ wa dɔnggɔ tɛ wa wena. Wa tɛ fa mbé 'dã hã fai we dɛ wele 'danga, nɛ wa dɔ́nggɔ́ Owele wa gɔ.

³¹ Gbãlã zã wa bina, nɛ wa dɛ́ olo nu wa gɔ. Sila wa nganda wena, nɛ wa do 'bako li wa bina.

³² Nɛ gɛnɛ kɔ winɔ ni wa ĩ ti mbula 'da Gale kɛ ma tɔ̃a na, Owi dɛ 'dã mɛnɔ wa wia do fio ni, nɛ nde wa 'bana tɛ mɛ tɛ dɛ ma dɛa fai. Nɛ dɛ ngɔ ki ni, wa kɔ̃ 'bɔ gɛnɛ winɔ kɛ wa dɛ kpo 'dã mɛnɔ ni.