USU MƐNƆ 9 - WE NU GALE 1995

¹ Nɛ 'do nɛ, nɛ mɔlɔ anzɛ dama mɔtũlĩ 'da a, nɛ mi zɔ sɔla kpo, ma yula ngɔ i, kɔ ma te dɛ nù nga, nɛ wa hã fungula nu gba 'du kɔ̃ hã a.

² Nɛ sɔla ni hũi nu 'du kɔ̃ɛ, nɛ gba zɛ̃ we ma ngɔ kutu dɛ ngɔ ɔ nɛ zɛ̃ we bɛlɛ fɔ ni. Nɛ ma kpe li wese do nyanga nza vɛ, nɛ ma tũ mbĩi.

³ Nɛ odɔla wa hɔ kɔ zɛ̃ we ni, nɛ wa yɛ'bɛ ngɔ nùi vɛ. Wa do ngawi ɔ nɛ kɛ 'da ogbatɔalanga ni.

⁴ Nɛ wa tɔ̃ hã odɔlanɔ ni na, wa tɛ nyɔ̀ngɔ̀ wɔkɔsɔ, tabi nwá te, tabi kpalɛ gɔ, nɛ nde wa nyɔ́ngɔ́ tati a owinɔ kɛ wa gɔ̀nɔ̀ dã 'da Gale dati wa gɔ ni.

⁵ Nɛ wa hã̀ wala hã odɔlanɔ na, wa gbɛ owinɔ ni gbɛa gɔ, nɛ nde wa hã zɛlɛ tɛ hã wa gbaa 'do zɛkɛ mɔlɔ. Nɛ zɛlɛ tɛ kɛ dɔlanɔ wa hã hã winɔ ni, ma wia kɔ̃ do kɛ gbatɔalanga nyɔngɔ wele, nɛ ma zɛlɛ a ni.

⁶ Nɛ kɔ zɛkɛ mɔlɛ ni, Owele wa fa sɛ fio, nɛ nde wa wé sɛ tɛ fe nɛ gɔ. Wa kɔ̃ sɛ na lo fe, nɛ nde fio gbɛ́ sɛ wa gɔ.

⁷ Odɔlanɔ ni wa ɔ nɛ ombalata kɛ wa 'dafa wa we nɛ bolo ni. Wa gu mɔ zu wa ɔ nɛ ndasa nwa kɛ wa dɛa do mɔ mbali ni, nɛ bula li wa ɔ nɛ bula li wele ni.

⁸ Nɛ mili zu wa dulu ɔ nɛ mili zu wuko ni, nɛ gogo wa ɔ nɛ gogo gbɔgbɔ ni.

⁹ Wa kila ngu'du wa do tulu mɔ bolo. Nɛ giti sala 'baka wa wele ɔ nɛ giti ongilingili, kɛ gba gili ombalata wa mana we nɛ nɛ bolo ni.

¹⁰ Nɛ mbili wa dɛ tɛ do wa ɔ nɛ mbili sa'de to wele ni, nɛ wa do ngawi we zɛlɛ tɛ winɔ 'do zɛkɛ mɔlɔ.

¹¹ Nwa 'da wa boe, wi a anzɛ kɛ a fɔmɔ gba 'du kɔ̃ɛ, nɛ li a do Hebre a Abadoni, nɛ do Grɛkɛ a Apoloni. (Gulu nɛ na: “Wi 'danga mɔ.”)

¹² Kuti ngamɛ la ia, nɛ nde mbé gele ngamɔ bɔa ma hɔ sɛ 'bɔ.

¹³ Nɛ 'do ki ni, nɛ gazɛlɛ anzɛ dama mɔtũlĩ 'da a. Nɛ mi zele wala gɛlɛ wele, ma yolo tɛ li kpɔa gbagala mɔ mbali, kɛ ma 'bɛ̃lã dɛ ngɔ nalɛ nɛ, nɛ ma dɛ dati Gale ni.

¹⁴ Nɛ a tɔ̃ hã gazɛlɛ anzɛ kɛ a do mɔtũlĩ kɔ̃ a ni na: “Mɔ yálá dɔkpɛ tɛ anzɛnɔ nalɛ kɛ wa ɛnzɛ wa dɛ kɛ zã gba lì Efratɛ ni.”

¹⁵ Nɛ a yala dɔkpɛ tɛ wa. Wi a oanzɛnɔ kɛ wa 'bɔ zi 'da kɔ̃ tũi, do zɛkɛ, do sabɛlɛ kɛ Gale wia ngboo, takɔ wa kumu kpo mbee talɛ winɔ nù gɛ vɛ̃ ni.

¹⁶ Nɛ mi zɔa ogba gili soda, kɛ wa kũ ngɔ ombalata. Wa tɔla wa hã mi, nɛ wa zi vɛ̃ miliɔ̃ kama bɔa.

¹⁷ Mi zɔa ombalatanɔ do owi kũ ngɔ wa ni do li yalɛ, nɛ nde wa hi'da tulu mɔ bolo dɛ ngu'du wa. Tuli ni fila nɛ́ we ni, nɛ tɛ nɛ ɔ 'bɔ nɛ tũ li nza ni, nɛ ma ɔ 'bɔ yee nɛ tɛ fila bɔ̃ ni. Nɛ zu mbalatanɔ ɔ nɛ zu ogbɔgbɔ ni, nɛ nde kɔ nu wa ma hɔ do gba nyɛa we, do zɛ̃ we, do kalĩ we.

¹⁸ Nɛ ngamɛnɔ talɛ gɛ, gba nyɛa we, do zɛ we, do kalĩ we ma hɔ kɔ nu mbalatanɔ ni, ma kumu kpo mbee talɛ winɔ vɛ.

¹⁹ Mba gɔ, ngawi 'da mbalatanɔ ma yolo kɔ nu wa, do kɔ do wa. Nɛ do wa ɔ nɛ ogɔ̃ ni. Ma do zu ɛ boe, nɛ wa gɔmɔ do winɔ.

²⁰ Nɛ tala winɔ kɛ ngamɛnɔ ni gbɛ̀ wa gɔɛ ni, wa kɔ̃̀ we fo sila wa ngɔ mɛnɔ wa dɛa do kɔ̃ wa ni gɔ. Wa là fala dɔnggɔ 'dã hi winɔ do okpikimanɔ gɔ. Wa dula okpikimanɔ ni do mɔ mbali, tabi fɛ̃a mɔ bolo, tũ mɔ bolo, tabi wa sɛa ma do ota tabi ote. Nɛ mɛnɔ ni ma zɔ́ mɔ gɔ, nɛ ma zélé we gɔ, nɛ ma nɛ́ nɔ gɔ.

²¹ Owinɔ ni wa là 'bɔ fala gbɛ winɔ, do dɛ sɔ̃nɔ, do yɛnggɛ vĩ zu yɛlinɔ, do zũ mɛnɔ gɔ.