USU MƐNƆ 8 - WE NU GALE 1995

Be Bata ɛ̃lɛ̃ sambo ndaka nu 'buki

¹ 'Da fala Be Bata nɛa we ɛlɛ sambo ndaka nu 'buki ni, nɛ ngɔ tɛ mɛnɔ li nza i ni gɛa kpi kpi kpi, gbaa dɔ̃ɔ do miniti 'bu nɛ talɛ.

² Nɛ 'do nɛ, nɛ mi zɔa oanzɛnɔ sambo kɛ wa yolo dɛ dati Gale ni, nɛ wele nɛa, nɛ a hã mɔtũlũ kpo kpo hã wa sambo nɛ.

³ Nɛ mbe gele anzɛ kpo tɛa, nɛ a yolo dɛ kɛ zã gbagala kɛ wa hã do dɔnggamɛnɔ hã Gale ni. A 'bia mɔ dɔ do fũ yɔmbɔ, kɛ wa dɛa ma do mɔ mbali ni dɛ kɔ̃ a. Nɛ wa hã ofũ yɔmbɔ dɛlɛ wena hã a, takɔ a dɔ ma hã Gale dɛ ngɔ gbagala mɔ mbali dati kpongbo nwa ni, nɛ zɛ̃ we nɛ kutu dɛ ngɔ i, fala nɛ kpo do sambala 'da owinɔ 'da Gale.

⁴ Kɔ anzɛ nɛa we dɔ yɔmbɛ ni, nɛ zɛ̃ we nɛ kutu, nɛ ma kũ dɛ 'da Gale i, fala nɛ kpo do sambala 'da winɔ 'da Gale.

⁵ Nɛ 'do nɛ, nɛ anzɛ u kalĩ we ngɔ gbagala ni, nɛ a a ma kɔ mɔ dɔ do yɔmbɛ kɔ̃ a ni, nɛ a da ma dɛ nù nga. Nɛ kolo ma ngɔ o dã, do nyɛ li ɛ, nɛ nùi ma ngɔ tana nɛ.

Oanzɛnɔ wa dama mɔtũlũ

⁶ Nɛ oanzɛnɔ sambo kɛ wa 'bia mɔtũlũnɔ dɛ kɔ̃ wa ni, wa ma ngɔ 'dafa tɛ wa we dama ma.

⁷ Nɛ kuti anzɛ dama mɔtũlĩ 'da a, nɛ kolo gbãlã mũlũ, do we, mba do tɔkɔ ala dɛ nù nga, nɛ kpo mbee talɛ nùi do kpo mbee talɛ tenɔ, do wɔkɔsɔnɔ bɛla vɛ̃.

⁸ 'Do nɛ, nɛ bɔa anzɛ dama mɔtũlĩ 'da a, nɛ wa ba gba gbɛlɛ mɔ ɔ nɛ kala ni, ma nyɛ do we gai gai, nɛ wa da ma 'dɔ gba lì. Nɛ kpo mbee talɛ gba lì kifi tɔkɔ.

⁹ Nɛ kpo mbee talɛ Otunu li mɛnɔ 'dɔ gba lì wa fia, nɛ kpo mbee talɛ masuanɔ 'danga vɛ.

¹⁰ 'Do nɛ, nɛ talɛ anzɛ dama mɔtũlĩ 'da a, nɛ gba gbɛlɛ sɔla ma nyɛ ɔ nɛ tanda ni, ma te dɛ ngɔ kpo mbee talɛ fua lìnɔ do 'denɔ ngɔ nù gɛ.

¹¹ Nɛ kpo mbee talɛ 'denɔ fanga kɛrr, nɛ Owele wena wa fia, we kɛ wa nɔa fã lì ni. Li sɔla ni a Fãmɔ.

¹² 'Do nɛ, nɛ nalɛ anzɛ dama mɔtũlĩ 'da a, nɛ kpo mbee talɛ li wese bi, nɛ kpo mbee talɛ li zɛkɛ do sɔlanɔ bi 'bɔ. Na mɛ ni, nɛ kpo mbee talɛ gba wese, do kpo mbee talɛ tũi, fo zi mɔ tu tua bina.

¹³ Nɛ mi nɛ ka 'bɔ mɔ, nɛ mi zɔ ziki tɛ bũlũ do ngɔ i nyɛlɛ wena, nɛ a tɛ he mɔ nganda wena na: “'Bako! 'Bako! 'Bako nɛ kpa owinɔ ngɔ nù gɛ, 'da fala tala oanzɛnɔ talɛ wa nɛ dama.”