USU MƐNƆ 7 - WE NU GALE 1995

Nu kpala obe Israɛlɛ

¹ Nɛ 'do ki ni, nɛ mi nɛ ka mɔ, nɛ mi zɔ oanzɛ nalɛ, wa yula si 'biti nyanga nza nalɛ, nɛ wa ga bũi kɛ ma yolo si 'biti nyanga nza nalɛ ni na, da dɛ kɔ ma fí ngɔ nù gɛ, tabi ngɔ gba lì gɔ, nɛ dɔ ma yáká 'bɔ nwá zu te kpo gɔ.

² Nɛ mi zɔ 'bɔ mbé anzɛ, a yula si 'biti gba wese, nɛ a 'bia mɔ gɔnɔ do dã 'da Gale, wele kpasi dɛ kɔ̃ a. Nɛ anzɛ ni hia mɔ nganda wena hã oanzɛnɔ nalɛ, kɛ wa do ngawi we 'danga nùi do gba lìnɔ ni na:

³ “Nɛ tɛ 'dàngà nùi, do gba lìnɔ do tenɔ do ti gɔ. Nɛ 'bɔ́ hã lɛ gɔnɔ dã dati Owi dɛa tonɔ 'da Gale 'da lɛ do'do sɛ.”

⁴ Nɛ mi zila wa tɛ tɔlɔ winɔ kɛ wa gɔna dã 'da Gale dati wa ni, nɛ nde wa koto kama, do bu koto nalɛ ngɔ wa nalɛ (144.000), nɛ wa yula kɔ nu kpala obe Israɛlɛ kpo kpo vɛ̃.

⁵ Kɔ nu kpala Yuda, wa gɔna dã dati Owele koto 'bu ngɔ wa bɔa, kɔ nu kpala Rubɛnɛ, koto 'bu ngɔ wa bɔa, kɔ nu kpala Gadɛ, koto 'bu ngɔ wa bɔa,

⁶ kɔ nu kpala Asɛrɛ, koto 'bu ngɔ wa bɔa, kɔ nu kpala Nɛftali, koto 'bu ngɔ wa bɔa, kɔ nu kpala Manase, koto 'bu ngɔ wa bɔa,

⁷ kɔ nu kpala Simeoni, koto 'bu ngɔ wa bɔa, kɔ nu kpala Levi, koto 'bu ngɔ wa bɔa, kɔ nu kpala Isakarɛ, koto 'bu ngɔ wa bɔa,

⁸ kɔ nu kpala Zabuloni, koto 'bu ngɔ wa bɔa, kɔ nu kpala Yozɛfu, koto 'bu ngɔ wa bɔa, nɛ kɔ nu kpala Bɛnzamɛ, koto 'bu ngɔ wa bɔa.

Gili ogele winɔ

⁹ Nɛ 'do ki ni, nɛ mi nɛ ka mɔ, nɛ mi zɔ gba gili Owele, kɛ wele wè tɛ tɔlɔ wa gɔ ni. Wa yula kɔ nu fɛlɛ kulanɔ, do lɛnggɛnɔ, do nu kpalanɔ, do kɔ lenɔ vɛ̃, nɛ wa dɛ dati kpongbo nwa 'da Gale, do Be Bata. Wa hi'da du fɛ̃a tulu turr, nɛ wa do nwá 'bete dɛ kɔ̃ wa.

¹⁰ Nɛ wa tɛ he mɔ dɛ ngɔ na: “Wi a Gale 'da lɛ, kɛ a dungu ngɔ kpongbo nwa gɛ, do Be Bata, wa a wa kpasa lɛ.”

¹¹ Nɛ oanzɛnɔ vɛ wa zĩ kpongbo nwa, do okpasa winɔ, do tunu li mɛnɔ nalɛ ni takpa, nɛ wa gu li wa nù dati kpongbo nwa tɛ dɔnggɔ Gale na:

¹² “Amɛ! Gale 'da lɛ do dɔ̃lɔ̃ li, do hã zã, do ngawi. A a nwa ngɔ mɛnɔ vɛ. E kɔ lɛ dɔnggɔ a, nɛ lɛ tɔ̃ de sako li a, nɛ lɛ hã iɔ̃nae hã a kɔ sabɛlɛ do sabɛlɛ! Amɛ.”

¹³ Nɛ mbe sanga okpasa winɔ ni aka mi na: “Owinɔ kɛ wa hi'da du fɛa tulunɔ ni wa a wio nde? Nɛ wa yula do nde?”

¹⁴ Nɛ mi gese hã a na: “Nwa 'daa, mɔ a mɔ ĩ ti wa!” Nɛ a tɔ̃ hã mi na: “Owinɔ kɛ wa kunu zɛlɛ tɛnɔ vɛ wa kpa zi ni, nɛ wa fɔlɔ tulunɔ 'da wa do tɔkɔ tɛ Be Bata, nɛ ma fɛnga gɛ, wa a ni.

¹⁵ Ma kɛ wa yolo dɛ dati kpongbo nwa 'da Gale, nɛ wa tɛ dɛ to hã a tũ do gba wese kɔ Tɛmpɛlo 'da a ni. Nɛ Wi dungu ngɔ kpongbo nwa ni, a kele sɛ zu wa.

¹⁶ Nɛ wɔ tabi wɔ lì bá sɛ wa gɔ. Nɛ wese dɔ́ sɛ wa gɔ, nɛ tɛ wa gí sɛ 'bɔ gɔ.

¹⁷ We duzu kɛ Be Bata dɛ gbogbo kpongbe ni sɛ a wi zɔ mɔ tɛ wa, nɛ a kã sɛ wa tɛ nu 'de kɛ ma hã kpasi ni. Nɛ Gale a dili sɛ mili kɔ̃a li wa vɛ.”