USU MƐNƆ 6 - WE NU GALE 1995

Be Bata ndua hũi nu 'buki

¹ Nɛ 'do ki ni, nɛ mi zɔ Be Bata tɛ ɛlɛ kuti ndaka nu 'buki ni, nɛ mi zele mbe kpo sanga tunu li mɛnɔ nalɛ ni tɛ he mɔ, nɛ wala gɛlɛ a dɔ̃lɔ̃ nɛ́ ua dã kolo ni na: “Mɔ tɛ́!”

² Nɛ mi nɛ ka mɔ, nɛ mi zɔ fɛ̃a mbalata, wi kũ ngɔ a 'bia nzabele dɛ kɔ̃ ɛ. Nɛ wa gu ndasa nwa zu wi ni, nɛ a la ɔ nɛ wi kɛ a nɛa ngɔ Owi sɛnɛ a lì bolo, kɔ a la 'bɔ mbé bolo, we nɛ ngɔ Owi sɛnɛ a ni.

³ Nɛ 'do ki ni, nɛ Be Bata ɛ̃lɛ̃ bɔa ndaka nu 'buki ni, nɛ mi zele gɛlɛ bɔa tunu li mɛnɔ tɛ he mɔ na: “Mɔ tɛ́!”

⁴ Nɛ mbé mbalata hɔa, a fila kpangbangba. Nɛ wi kũ ngɔ a kpa ngawi we fi bolo ngɔ nùi vɛ̃, takɔ owinɔ wa gbɛ ngba wa. Nɛ wa hã gba du kɔya hã a.

⁵ Nɛ 'do ki ni, nɛ Be Bata ɛ̃lɛ̃ talɛ ndaka nu 'buki ni, nɛ mi zele gɛlɛ talɛ tunu li mɛnɔ tɛ he mɔ na: “Mɔ tɛ́!” Nɛ mi nɛ ka mɔ, nɛ mi zɔ tũ mbalata, wi kũ ngɔ a 'bia kilo we do mɔ dɛ kɔ̃ ɛ.

⁶ Nɛ mi zele mɔ ɔ nɛ wala gɛlɛ wele dɛ sanga otunu li mɛnɔ nalɛ ni tɛ tɔ̃ na: “Wa oso sɛ kilo gbãlã kɔni kpo do mbili do dɛa to li wese kpo, nɛ wa oso sɛ kilo lɔsɔ talɛ do mbili olo dɛa to li wese kpo. Nɛ nde nɛ tɛ 'dàngà gole nɔɛ do gole dɔ̃ɛ gɔ.”

⁷ Nɛ 'do ki ni, nɛ Be Bata ɛ́lɛ́ nalɛ ndaka nu 'buki ni. Nɛ mi zele gɛlɛ nalɛ tunu li mɛnɔ tɛ he mɔ na: “Mɔ tɛ́!”

⁸ Nɛ mi nɛ ka mɔ, nɛ mi zɔ mbalata, tɛ̃ a ɔ tuu nɛ zɛ̃ we ni. Nɛ wi kũ ngɔ a li a a Fio. Nɛ Le 'da ofionɔ tɛ tɛ 'dɔkɔlɔ a. Nɛ wa hã ngawi hã wa na, wa yɛnggɛ ngɔ kpo mbee nalɛ nùi gɛ, nɛ wa gbɛ winɔ do du kɔya, tabi do gba wɔ, tabi do zɛlɛ, tabi do wala 'da odã sa'de.

⁹ Nɛ 'do ki ni, nɛ Be Bata ɛ̃lɛ̃ mɔlɔ ndaka nu 'buki ni, nɛ mi nɛ ka mɔ dɛ ti gbagala kɛ wa hã dɔnggamɛnɔ hã Gale ngɔ nɛ ni, nɛ mi zɔ ohi wele. Mɛ a hi owinɔ wa gbɛa zi wa, we kɛ wa kɔ̃a gɛnɛ we nu Gale, nɛ wa bia ma hã winɔ ni.

¹⁰ Kɔ wa tɛ he mɔ do nga gɛlɛ na: “Aa Nwa, mɔ a santo, nɛ mɔ tɔ̃ fai a gbãlã we. Mɔ nɛ 'bɔ gbaa we 'bili we 'da winɔ nù gɛ, nɛ mɔ hã etumbu hã wa do kɛ wa gbɛa zi lɛ ni soe ki nge nde?”

¹¹ Nɛ oanzɛnɔ wa hã fɛ̃a tulu hã wele do wele sanga wa ni, nɛ wa tɔ̃ hã wa na, wa kunu sila wa, kɔ wa 'bɔ, hã li onya wa, do ongba wa winɔ 'da Gale, kɛ wa nɛ gbɛ 'bɔ wa, ɔ nɛ kɛ wa gbɛa zi do wa ni, we vɛ sɛ nɛ de.

¹² Nɛ 'do ki ni, nɛ Be Bata ɛ́lɛ́ gazɛlɛ ndaka nu 'buki ni. Nɛ do 'da fala ni, nùi ma ngɔ tana nganda wena, nɛ li wese tũ ɔ nɛ tũ tulu ni, nɛ li zɛkɛ fele ɔ nɛ tɔkɔ ni.

¹³ Nɛ sɔlanɔ ma ngɔ ala dɛ nù nga ɔ nɛ kɛ tɔlɔ wala te ala 'da fala gba bũ kamba ni.

¹⁴ Nɛ li nza la ɔ nɛ wa kasa bunggu ni. Nɛ kalanɔ do ngolo lìnɔ vɛ̃, ma fua tɛ ɛ do'do.

¹⁵ Nɛ onwanɔ ngɔ nù gɛ, do ogã winɔ, onwa ngɔ sodanɔ, Owi kpamɛnɔ, owi ngawinɔ, do ogele winɔ vɛ, ngbá tabi wele le, wa yu vɛ, nɛ wa usu tɛ wa kɔ tanɔ, do ngɔ okalanɔ.

¹⁶ Nɛ wa he mɔ hã kalanɔ do tanɔ na: “Nɛ té dɛ ngɔ lɛ, nɛ nɛ úsú lɛ, dɔ Wi dungu ngɔ kpongbo nwa zɔ́ lɛ, hã dã ba Be Bata dɛ tɛ lɛ gɔ.

¹⁷ We duzu kɛ gã ngba soe be nɔ̃lɔ̃ zã 'da wa hɔa ia, kɔ wi nɛ yolo ti wa a wio nde?”