USU MƐNƆ 5 - WE NU GALE 1995

Wa dɔnggɔ Be Bata 'da Gale

¹ Nɛ mi ka mɔ, nɛ mi zɔ wi dungu ngɔ kpongbo nwa ni, nɛ nde a 'bia kasa 'buku do ngawili kɔ̃ a. Wa kɔma mbɛti li nɛ do 'do nɛ, nɛ wa nãlã nu nɛ do ndaka fala sambo.

² Nɛ mi zɔ anzɛ kpo, kɛ a nganda wena ni tɛ he mɔ dɛ ngɔ na: “Wi wia we ɛ̃lɛ̃ ndaka nu 'buki gɛ, nɛ a hũi ma, wi a wio nde?”

³ Nɛ nde wele kpo ngɔ nù gɛ, tabi li nza i, tabi kɔ le 'da ofionɔ wè tɛ hũi nu 'buki ni, nɛ a tɔlɔ we kɔ nɛ gɔ.

⁴ Kɔ mi nɛa we zɔ na, wele kpo wè tɛ hũi ma we tɔlɔ we kɔ nɛ gɔ ni, nɛ mi he wena.

⁵ Nɛ mbe sanga kpasa winɔ ni tɔ̃ hã mi na: “Mɔ tɛ hè gɔ. Mɔ zɔ́, wi kɛ wa sa li a na: “Gbɔgbɔ kɔ nu kpala Yuda”, nɛ wa kua a kɔ nu fɛlɛ nwa Davidi ni, a nɛa ngɔ owi sɛnɛ a vɛ̃, nɛ a wia we ɛlɛ ndakanɔ sambo nu 'buki gɛ, nɛ a hũi li nɛ.”

⁶ Nɛ mi zɔ Be Bata kpo, a yula dɛ dati kpongbo nwa ni. Nɛ Otunu li mɛnɔ nalɛ, do okpasa winɔ ni wa linggi a takpa. Be Bata ni ɔ nɛ wa gbɛa a gbɛa ni. Zamba zu a sambo, nɛ gbali a sambo. Gbali a sambo ni, mɛ a hi winɔ sambo kɛ Gale tumba wa nyanga nza gɛ vɛ̃ ni.

⁷ Nɛ Be Bata nɛa, nɛ a ba 'buki kɔ̃ wi dungu ngɔ kpongbo nwa ni.

⁸ Kɔ a nɛa we ba 'buki ni, nɛ otunu li mɛnɔ nalɛ, do kpasa winɔ 'bu wa bɔa ngɔ wa nalɛ ni, wa gu gba zugolo dati a. Nɛ wele do wele do kundu, do bila mɔ mbali kɛ ma dunu do fũ yɔmbɔ ni dɛ kɔ̃ ɛ. Fũ yɔmbɛ ni, mɛ a sambala kɛ winɔ 'da Gale wa sambala do a ni.

⁹ Nɛ wa vɛ̃ wa ga mbé zuma na: “Mɔ wia do ba kasa 'buki, nɛ mɔ ɛ̃lɛ̃ ndaka wa nãlã do nu nɛ ni. We kɛ wa gbɛa zi mɔ, nɛ mɔ gɔnɔ zu ogba gili wele do tɔkɔ tɛ mɔ, nɛ mɔ hã wa hã Gale. Winɔ mɔ gɔna zu wa ni, wa a wi kɔ nu fɛlɛ kulanɔ, do lɛnggɛnɔ, do nu kpalanɔ, do kɔ lenɔ vɛ.

¹⁰ Nɛ mɔ a wa vɛ do onganga kɔ le nwa 'da Gale 'da lɛ, we dɛ to hã a, nɛ wa dungu sɛ nwa ngɔ nùi gɛ.”

¹¹ Nɛ mi zɔa ogili anzɛ, kɛ wele wè tɛ tɔlɔ wa gɔ ni. Wa linggi kpongbo nwa, do Otunu li mɛnɔ nalɛ, do okpasa winɔ ni takpa. Nɛ mi zele gɛlɛ wa

¹² tɛ ga zuma nganda wena na: “Be Bata kɛ wa gbɛa zi a ni, a wia do nwa, nɛ a do kpamɔ, do hã zã, do ngawi. E kɔ a kpa dɔ̃lɔ̃ li, do dɔngga wi, nɛ wa tɔ̃ de sako li a.”

¹³ Nɛ 'do nɛ, nɛ mi zila 'bɔ wala gɛlɛ mɛnɔ vɛ kɛ Gale dɛa kɔ li nza i, do ngɔ nù gɛ, do kɔ le 'da ofionɔ, do kɛnɔ 'dɔ gba lì ni tɛ ga zuma na: “E kɔ wi dungu ngɔ kpongbo nwa, do Be Bata wa kpa dɔngga wi, do dɔ̃lɔ̃ li, do ngawi, nɛ lɛ tɔ̃ de sako li wa kɔ sabɛlɛ do sabɛlɛ!”

¹⁴ Nɛ otunu li mɛnɔ nalɛ ni wa gese na: “Amɛ!” Nɛ okpasa winɔ wa gu gba zugolo, nɛ wa dɔnggɔ wa.