USU MƐNƆ 4 - WE NU GALE 1995

Wa dɔnggɔ Gale tɛ li nza i

¹ Nɛ 'do ki ni, nɛ mbé mɔ hɔa li mi do li yalɛ. Mi ka mɔ li nza i, nɛ mi zɔ nu tɔa kpo, nɛ nde ma hũi. Nɛ mi zele 'bɔ wala gɛlɛ wi kɛ mi zila sɔ dati ni, ma wele nɛ́ mɔtũlũ ni. Nɛ ma tɔ̃ hã mi na: “Mɔ ku dɛ 'da mi nga, kɔ mi be mɛnɔ kɛ ma hɔ sɛ do 'do ni hã mɔ.”

² Nɛ do ti, nɛ ngawi 'da Hi Wi Santo ba mi la do mi, nɛ mi zɔa kpongbo nwa li nza i, nɛ nde wele dungu ngɔ nɛ.

³ Nɛ wi ni nyɛ ɔ nɛ odia tanɔ li nɛ a yaspɛ do sardɔanɛ ni. Nɛ ndumbe zĩ kpongbo nwa takpa. Ndumbe ni ndele ɔ nɛ dia ta li nɛ a emɛrɔdɛ ni.

⁴ Nɛ ombe gele kpongbo nwa 'bu nɛ bɔa ngɔ nɛ nalɛ, ma zĩ 'bɔ kuti kpongbo nwa ni takpa. Nɛ okpasa wi 'bu wa bɔa ngɔ wa nalɛ, wa dungu ngɔ nɛ. Wa hi'da fɛa tulu, nɛ wa gu ndasa nwa zu wa, mɛ a ondasa mɔ mbali.

⁵ Nɛ nyɛa li kolo, do ua dã kolo, do giti omɔ wele tɛ kpongbo nwa kɛ gbogbo ni. Nɛ nyɛa we sambo nyɛ dɛ dati kpongbo nwa ni, ĩ na, mɛ a ohi wi 'da Gale sambo.

⁶ Nɛ mi zɔa 'bɔ gã li tala dɛ dati kpongbo nwa ni, nɛ nde ma ɔ yelele nɛ kristalɛ ni. Nɛ mi zɔa 'bɔ Otunu li mɔ nalɛ, wa yula zĩ kpongbo nwa ni takpa. Gbali wa kpa do tɛ wa vɛ, ombe do dati wa, nɛ ombe do li 'do wa.

⁷ Kuti wele kɛ ɔ nɛ gbɔgbɔ, nɛ bɔa wele kɛ ɔ nɛ be wili ngɔmbɔ, nɛ talɛ wele kɛ, bula li a ɔ nɛ bula li wele, nɛ nalɛ wele kɛ a ɔ nɛ ziki kɛ a bũ bũlũ ni.

⁸ Otunu li mɛnɔ nalɛ ni, wa do 'baka wa gazɛlɛ gazɛlɛ ɔ nɛ 'baka nɔɛ ni. Nɛ gbali wa kpa do tɛ 'baka wa vɛ̃, ombe do ngɔ, nɛ ombe do ti nɛ. Nɛ wa tɛ ga zuma fai, tũ do gba wese na: “Mɔ a santo, mɔ a santo, mɔ a santo. Mɔ a Nwa Gale kɛ mɔ do nganda vɛ̃. Mɔ zɛ́ boe, nɛ mɔ sɔɛ gɛ boe, nɛ mɔ tɛ sɛ.”

⁹ Nɛ Otunu li mɛnɔ ni wa tɛ ga zuma hã wi kɛ a dungu ngɔ kpongbo nwa, nɛ a do kpasi kɔ sabɛlɛ do sabɛlɛ ni. Nɛ wa dɔnggɔ a, nɛ wa tɔ̃ de zu li a, nɛ wa hã iɔ̃nae hã a.

¹⁰ 'Da fala kɛ wa ma ngɔ ga zumanɔ ni, nɛ okpasa winɔ 'bu wa bɔa ngɔ wa nalɛ ni, wa gu gba zugolo dati wele kɛ a dungu ngɔ kpongbo nwa, nɛ a do kpasi kɔ sabɛlɛ do sabɛlɛ ni. Nɛ wa dɔnggɔ a, nɛ wa a ondasa nwanɔ 'da wa dɛ dati kpongbo nwa 'da a ni, nɛ wa tɔ̃ na:

¹¹ “Aa Nwa, mɔ a Gale 'da lɛ. Mɔ wia do dɔ̃lɔ̃ li, do dɔngga wi, do nganda vɛ. Mba gɔ, mɔ a mɔ dɛa mɛnɔ vɛ. Mɔ kɔ̃a zi na mɛnɔ dɛ tɛ̃ ɛ, nɛ ma dɛa tɛ̃ ɛ.”