USU MƐNƆ 3 - WE NU GALE 1995

Toe kɛ Yezu tumba hã eklezia kɔ le Sardɛ

¹ Nɛ wi ni tɔ̃a hã mi na, mi kɔ́mɔ́ wenɔ gɛ do mbɛti hã anzɛ kɛ a zɔ mɔ tɛ eklezia kɔ le Sardɛ ni na: “Wi kɛ a do Hi Wi 'da Gale sambo, do sɔlanɔ sambo ni tɔ̃a na: Mi ĩ ti dɛa mɔ tɛ nɛ vɔ́, nɛ mi ĩ na, owinɔ wa lengge na, nɛ do kpasi, nɛ nde nɛ fi fia.

² Kɔ li nɛ sɔ̃́, nɛ nɛ dɛ́ na, tala kpasi kɛ ma 'bana kɔ nɛ ni nganda, dɔ ma fé vɛ gɔ. Mba gɔ, mi zɔa na, dɛa mɔ tɛ nɛ dè li Gale 'da mi ngboo gɔ.

³ Kɔ ta zu nɛ gbá ngɔ wenɔ kɛ wa bia zi ma hã nɛ, nɛ nɛ kɔ̃a gɛnɛ nɛ ni. Nɛ dɛ́ mbula nɛ, nɛ nɛ kífí sila nɛ. Nɛ dɛ̀ ní gɔ, nɛ mi gbanga sɛ nɛ ɔ nɛ wi zũ ni, nɛ nɛ ĩ́ sɛ ti ngba soe mi nɛ hɔ nɛ ni gɔ.

⁴ Nɛ nde ombe winɔ Sardɛ ni, wa tɛ 'dàngà tɛ tulunɔ 'da wa gɔ. Winɔ ni wa he'de sɛ fɛ̃a tulu, nɛ wa yɛnggɛ do mi, we kɛ ki ni wia do wa.

⁵ Kɔ wi kɛ a kunu sila a kɔ ngamɛnɔ gbaa we hɔ ndɔti nɛ, nɛ a he'de sɛ fɛ̃a tuli ni, nɛ mi gbɛ́ sɛ li a kɔ 'Buku Kpasi gɔ. Nɛ mi tɔ̃ sɛ dati Baa mi do oanzɛnɔ 'da a na, a a wi 'da mi.

⁶ “Wi kɛ zala a boe, nɛ a zélé wenɔ kɛ Hi Wi Santo tɔ̃ hã oeklezianɔ ni.”

Toe kɛ Yezu tumba hã eklezia kɔ le Filadɛlfi

⁷ Nɛ wi ni tɔ̃a hã mi na, mi kɔ́mɔ́ wenɔ gɛ do mbɛti hã anzɛ kɛ a zɔ mɔ tɛ eklezia kɔ le Filadɛlfi ni na: “Wi kɛ a santo, nɛ a tɔ̃ gbãlã we fai, nɛ a do fungula kɛ nwa Davidi zɛ́ do ma ni dɛ kɔ̃ a, kɔ a hũi nu tɔa, nɛ nde wele kpo kpé ma gɔ, hã a kpe, nɛ nde wele kpo hṹi ma gɔ ni, a tɔ̃a na:

⁸ Mi ĩ ti dɛa mɔ tɛ nɛ vɛ̃, nɛ mi ĩ na, ngawi 'da nɛ gã̀ gɔ. Nɛ gɛnɛ kɔ na mɛ ni, nɛ nde nɛ dɛa do nu mi, nɛ nɛ kàfà na, nɛ a owinɔ 'da mi gɔ ni gɔ. Mi hũi nu tɔa hã nɛ, nɛ wele wè tɛ kpe ma gɔ.

⁹ Kɔ nɛ zɔ́ mɛnɔ mi nɛ dɛ sɛ do gili winɔ 'da Satana, kɛ wa 'bili bɛlɛ, nɛ wa tɔ̃ na, lo a Oyuda, nɛ nde wa a Yuda gɔ ni. Mi ngbɔkɔ sɛ wa na, wa nɛ 'da nɛ i, nɛ wa gu gba zugolo dati nɛ, nɛ wa ĩ sɛ na, mi kɔ̃a gɛnɛ nɛ.

¹⁰ Kɔ we duzu kɛ nɛ dɛa olo nu mi, nɛ nɛ kunu sila nɛ ni, mi fɔmɔ sɛ tɛ mɛ 'bɔ nɛ 'da fala ngamɛnɔ ma kpa sɛ winɔ ngɔ nùi gɛ vɛ̃, we yamba sila wa ni.

¹¹ Mi kɔlɔ fala tɛ nɛ ia. Kɔ sila nɛ nɔ́ dɛ tɛ wenɔ nɛ yambala ni, dɔ wele bá mɔ do kɔ̃a we 'da nɛ kɔ̃ nɛ gɔ.

¹² Wi kɛ a kunu sila a kɔ ngamɛnɔ gbaa we hɔ ndɔti nɛ, nɛ mi e sɛ a ɔ nɛ bɛlɛduma kɔ Tɛmpɛloe 'da Gale 'da mi, nɛ a 'bana sɛ dɛ di ni fai. Nɛ mi kɔmɔ sɛ li Gale 'da mi, do li le 'da Gale 'da mi bula li a. Mɛ a mbé le Yeruzalɛmɛ kɛ ma yolo 'da Gale 'da mi tɛ li nza i ni. Nɛ mi kɔmɔ sɛ 'bɔ mbé li mi bula li a.

¹³ “Wi kɛ zala a boe, nɛ a zélé wenɔ kɛ Hi Wi Santo tɔ̃ hã oeklezianɔ ni.”

Toe kɛ Yezu tumba hã eklezia kɔ le Laodise

¹⁴ Nɛ wi ni tɔ̃a hã mi na, mi kɔ́mɔ́ wenɔ gɛ do mbɛti hã anzɛ kɛ a zɔ mɔ tɛ eklezia kɔ le Laodise ni na: “Wi kɛ a dɛa toe 'da Gale ia vɛ, kɔ a tɔ̃ gulu we 'da Gale do gbãlã we ngboo, nɛ a 'bɔ a wi kɛ Gale dɛa zɛ́ mɛnɔ vɛ̃ do wala 'da a ni tɔ̃a na:

¹⁵ “Mi ĩ ti dɛa mɔ tɛ nɛ vɛ. Nɛ a gɛ̃ gɔ, nɛ nɛ 'bɔ a we gɔ. Mi kɔ̃a sɔ na, nɛ ba we ngboo, tabi nɛ ɔ a gɛ.

¹⁶ Nɛ nde nɛ a we gɔ, nɛ nɛ 'bɔ a gɛ gɔ, nɛ wu wuka iko. Ma kɛ mi nɛ ɔ̃lɔ̃ nɛ do'do.

¹⁷ Nɛ tɔ̃a na, lo a Owi kpamɔ, lo do mɔ wena, lo zɔ̀lɔ̀ mɔ kpo gɔ. Nɛ nde nɛ ĩ̀ na, nɛ a Owi 'bako, nɛ do ngamɔ wena, nɛ a Owi sã, nɛ do kũlĩ tɛ nɛ, nɛ nɛ a Owi tandu ni gɔ.

¹⁸ “Kɔ we duzu ki ni, mi tɔ̃ mbula hã nɛ na, nɛ tɛ́ 'da mi nga, kɔ nɛ oso mɔ mbali kɛ wa fi li we, nɛ wa fua ndinɔ kɔ nɛ vɛ̃ ni, kɔ nɛ hɔ ngbongbo owi kpamɔ. Nɛ nɛ ósó 'bɔ ofɛa tulu, we kele do kũlĩ tɛ nɛ, kɛ sape nɛ ba li nɛ ni. Nɛ nɛ ósó ina we zĩ ngɔ li nɛ, takɔ nɛ zɔ 'bɔ mɔ.

¹⁹ Mi dãlã dɛ tɛ winɔ kɛ mi kɔ̃a gɛnɛ wa ni, nɛ mi hã zɛlɛ tɛ hã wa. Kɔ nɛ, nɛ bé wɔ zã nɛ dɛ nza, nɛ nɛ kífí sila nɛ.

²⁰ Nɛ zɔ́, mi yula, nɛ mi tɛ ngbolo 'do nu tɔa ko ko ko. Kɔ fala kɛ wele zele gɛlɛ mi, kɔ a hũi nu tɔa, nɛ mi le sɛ dɛ 'da a i, nɛ lɛ nyɔngɔ sɛ mɔ fala nɛ kpo do a.

²¹ Wi kɛ a kunu sila a kɔ ngamɛnɔ gbaa we hɔ ndɔti nɛ, nɛ mi hã sɛ wala hã a we dungu do mi ngɔ kpongbo nwa 'da mi, ɔ nɛ kɛ mi kunu zi tɛ mɛ 'bɔ sila mi gbaa we hɔ ndɔti nɛ, nɛ mi dungu do Baa mi ngɔ kpongbo nwa 'da a ni.

²² “Wi kɛ zala a boe, nɛ a zélé wenɔ kɛ Hi Wi Santo tɔ̃ hã oeklezianɔ ni.”