USU MƐNƆ 22 - WE NU GALE 1995

¹ Nɛ anzɛ bia 'bɔ gba fua lì, kɛ ma hã kpasi ni hã mi. Li lì ni gɛ̃lã ɔ nɛ kristalɛ ni, nɛ ma tɛ kũ dɛ ti kpongbo nwa 'da Gale do Be Bata.

² Nɛ ma tɛ fo vwɛɔ̃ɔ do gbogbo wala kɔ le ni. Tɛ kɛ zã nu lì bɔa nɛ, mɛ a te kɛ ma hã kpasi, nɛ ma wala fala 'bu ngɔ nɛ bɔa kɔ sabɛlɛ kpo ni. Kɔ zɛkɛ kpo, nɛ ma wala fala kpo. Nɛ onu kpala winɔ wa dɛ nwá nɛ do ina, nɛ wa kpasa do ma.

³ Nɛ mɔ kɛ Gale fɔmbɔ ma ni sɛ 'bɔ di ni bina. Kpongbo nwa 'da Gale do Be Bata, ma ɔ sɛ dɛ kɔ gã le ni, nɛ Owi dɛa tonɔ 'da Gale wa dɔnggɔ sɛ a.

⁴ Wa zɔ sɛ tɛ̃ a, nɛ wa kɔmɔ sɛ li a dati wa.

⁵ Tũ tu sɛ kɔ le ni gɔ, nɛ winɔ wa sɛ do wɔ tɛ nyɛa we mwinda, tabi tua wese bina, we kɛ yele ngbala 'da Nwa Gale ma yele sɛ ngɔ wa. Nɛ wa dungu sɛ nwa kɔ sabɛlɛ do sabɛlɛ.

We ngɔ tɛa 'da Yezu

⁶ Nɛ 'do ki ni, nɛ anzɛ tɔ̃ hã mi na: “Wenɔ gɛ a gbãlã we ngboo, nɛ wele wia we e sila ɛ ngɔ nɛ. Nwa Gale kɛ a hã Hi Wi 'da a hã owi gba olo nu a ni, a tumba anzɛ 'da a we be mɛnɔ, kɛ ma hɔ sɛ ngangga gɛ ni hã owi dɛa tonɔ 'da a.”

⁷ Nɛ Yezu tɔ̃ na: “Mɔ zélé! Mi kɔla hɔ nɛ ia! Nɛ winɔ kɛ wa kɔ̃a gɛnɛ wenɔ kɛ Gale bia ma kɔ 'buki gɛ ni, wa sɛ a wi yangga.”

⁸ Mi Yoanɛ, mi zila zi wenɔ gɛ do zala mi, nɛ mi zɔa do gbali mi. Kɔ mi zila, nɛ mi zɔa ma ia do'do, nɛ mi gu li mi nù dati anzɛ, kɛ a bia mɛnɔ ni hã mi ni we dɔnggɔ a.

⁹ Nɛ a tɔ̃ hã mi na: “Mɔ tɛ dɛ̀ ní gɔ. Mi tɛ mɛ 'bɔ a wi dɛa to 'da Gale ɔ nɛ mɔ, do onya mɔ vɛ kɛ wa gba olo nu Gale, do wanɔ wa kɔ̃a gɛnɛ wenɔ kɔ 'buki gɛ ni. Kɔ mɔ dɔ́nggɔ́ Gale!”

¹⁰ Nɛ a tɔ̃ 'bɔ hã mi na: “Mɔ tɛ ùsù wenɔ kɛ Gale bia ma kɔ 'buki gɛ do winɔ gɔ. We duzu kɛ ngba soe omɛnɔ gɛ ma nɛ dɛ tɛ̃ ɛ ni, ma kɔla ia.

¹¹ Nɛ é wi dɛ 'dã mɔ, hã a 'bana tɛ dɛ 'dã mɛnɔ 'da a. Nɛ wi ndi 'báná tɛ ɔ wi ndi. Nɛ wi bɔlɔ zu 'báná tɛ dɛ bɔlɔ zu dɛa mɔ. Nɛ wele kɛ a a wi 'da Gale ni, a 'báná wi 'da Gale fai.”

¹² Nɛ Yezu tɔ̃ na: “Mɔ zélé! Mi kɔla hɔ nɛ ia! Nɛ mi tɛ sɛ we hã si olo dɛa toe kɛ wele do wele dɛa ma ni hã a.

¹³ Mi a Alfa do Omega, ndo nyanga mɛnɔ vɛ wi a mi, nɛ sɔkpɔ mɛnɔ vɛ̃ wi 'bɔ a mi. Mi a wi kɛ dati, nɛ mi 'bɔ a wi kɛ ndɔti nɛ.”

¹⁴ Winɔ kɛ wa fɔlɔ tulu tɛ wa, nɛ ma sa ni, wa a wi yangga. Wa le sɛ do nu ngbo gã le, nɛ wa nyɔngɔ sɛ wala te kɛ ma hã kpasi ni.

¹⁵ Nɛ nde owi ndinɔ, kɛ wa a owi dɛ sɔ̃, owi yɛnggɛ vĩ zu yɛli, owi gbɛ wi, owi dɔnggɔ kpikima, owi 'bili bɛlɛ, do owi dɛ mɔ do bɛlɛ ni, wa vɛ wa 'bana sɛ dɛ 'do le.

¹⁶ “Mi Yezu, mi tumba anzɛ 'da mi, we tɔ̃ wenɔ gɛ hã eklezianɔ. Mi a wi nu fɛlɛ nwa Davidi. Mi a gbandolo titole kɛ ma to wena ni.”

¹⁷ Hi Wi 'da Gale, do wuke kɛ Be Bata ba a ni, wa tɔ̃a na: “Mɔ tɛ́!” E kɔ wele kpo kpo kɛ a zele ma ni, a tɔ̃ tɛ mɛ 'bɔ na: “Mɔ tɛ́!” E kɔ wi kɛ wɔ lì ba a ba ni, a tɛ. Nɛ wi kɛ a kɔ̃a we nɔ lì kɛ ma hã kpasi ni, a tɛ́, nɛ a nɔ iko.

Ndɔti wenɔ

¹⁸ Mi Yoanɛ, mi mbese owinɔ vɛ̃ kɛ wa zele wenɔ, kɛ Gale bia ma kɔ 'buki gɛ ni na, wi kɛ a e mbé gele we kpo ngɔ nɛ, nɛ Gale a e sɛ mbé zɛlɛ tɛ ngɔ kɛnɔ wa kɔma ma kɔ 'buki gɛ, nɛ a hã hã a.

¹⁹ Nɛ wi kɛ a fo tɛ wenɔ kɔ 'buki gɛ ni, nɛ Gale a bɛ̃ sɛ na, a tɛ nyɔ̀ngɔ̀ wala te kɛ ma hã kpasi ni gɔ, nɛ a tɛ lè kɔ le santoe kɛ wa tɔ̃ we nɛ kɔ 'buki gɛ ni gɔ.

²⁰ Wi kɛ a bia ngbongbo wenɔ gɛ vɛ ni, a tɔ̃a na: “Gbãlã we, mi kɔla hɔ nɛ ia!” E kɔ ma ɔ na mɛ ni! Nwa Yezu, mɔ tɛ́!

²¹ E kɔ dia zã 'da Nwa Yezu 'bana do owinɔ vɛ́!