USU MƐNƆ 21 - WE NU GALE 1995

We ngɔ mbé li nza do mbé nùi

¹ 'Do ki ni, nɛ mi zɔa mbé li nza, do mbé nù, we kɛ kuti li nza do kuti nùi ma bisi do'do, nɛ gba lì 'bɔ bina.

² Nɛ mi zɔa gã le santo, mbé le Yeruzalɛmɛ, ma yula 'da Gale li nza i, nɛ ma tɛ zĩlĩ dɛ nù nga. Wa 'dafa ma vɛ, ɔ nɛ kɛ wuko ba wili 'dafa tɛ̃ a we 'bɔ do 'da wili a ni.

³ Nɛ mi zele giti gɛlɛ wele tɛ fala kpongbo nwa ni, ma wila nganda wena na: “Nɛ zɔ́, Gale dɛa fala ɔi 'da a dɛ sanga winɔ. A ɔ sɛ do wa fala nɛ kpo, nɛ wa sɛ a owinɔ 'da a. Gale ngboo sɛ fala nɛ kpo do wa.

⁴ A dili sɛ mili kɔ̃a li wa. Fo sɛ fio bina! Nɛ fo sɛ 'bɔ dungu gɛla, do hia kɔ̃a, do ngamɔ bina, we kɛ omɛnɔ zi dati ni ma la ia.”

⁵ Nɛ wi dungu ngɔ kpongbo nwa ni tɔ̃ na: “Nɛ zɔ́, mi kpula mɛnɔ vɛ̃do mbé nɛ.” Nɛ a tɔ̃ 'bɔ hã mi na: “Mɔ kɔ́mɔ́ wenɔ gɛ do mbɛti, we kɛ mɛ a ngbongbo we, nɛ wele wia we e sila a ngɔ nɛ.”

⁶ Nɛ a tɔ̃ 'bɔ hã mi na: “Ma wia ia! Mi a Alfa do Omega, ndo nyanga mɛnɔ vɛ̃ wi a mi, nɛ sɔkpɔ mɛnɔ vɛ̃ wi 'bɔ a mi. Wi kɛ wɔ lì ba a, nɛ mi so sɛ 'de kɛ ma hã kpasi ni hã a do dia sila iko.

⁷ Wi kɛ a kunu sila a kɔ ngamɛnɔ gbaa we hɔ ndɔti nɛ, nɛ mi hã sɛ dia mɛ gɛ hã a: Mi sɛ a Gale 'da a, nɛ a sɛ a be 'da mi.

⁸ Nɛ nde owi yu ngamɛnɔ, do owi bɛ̃ we nu Gale, owi dɛ mɔ sapenɔ, owi gbɛ winɔ, owi yɛnggɛ vĩ zu yɛlinɔ, owi dɛ sɔ̃nɔ, Owi dɔnggɔ kpikimanɔ, do owi 'bili bɛlɛnɔ vɛ, wa da sɛ wa li gba nyɛa we, kɛ ma nyɛ gile gile ni. Ki ni a bɔa fie hã ni.”

We ngɔ mbé le Yeruzalɛmɛ

⁹ Nɛ mbe kpo sanga oanzɛnɔ sambo kɛ wa 'bia zi bilanɔ sambo, ma dunu do tala ngɔ go'do ngamɛnɔ sambo ni tɛa, nɛ a tɔ̃ hã mi na: “Mɔ tɛ́! Mi nɛ be wuke kɛ Be Bata nɛ ba a ni hã mɔ.”

¹⁰ Nɛ ngawi 'da Hi Wi Santo lia kɔ mi, nɛ anzɛ la do mi gbaa dɛ ngɔ ngala kala. Nɛ a be Yeruzalɛmɛ, gã le santoe hã mi. Ma yula 'da Gale li nza i, nɛ ma tɛ zĩlĩ dɛ nù nga.

¹¹ Nɛ yele ngbala 'da Gale tɛ yele kɔ gã le ni, ma to ɔ nɛ ta olo gã gole, tabi ta yaspɛ, kɛ ma ɔ yelele nɛ kristalɛ ni.

¹² Wa dɛa gã ngbo ngala wena nu le zĩ takpa, nɛ nu ngboe ni 'bu ngɔ nɛ bɔa, nɛ oanzɛ 'bu ngɔ wa bɔa wa tɛ zɔ mɔ nu ngbonɔ ni. Wa kɔma li onu kpala obe Israɛlɛ 'bu ngɔ wa bɔa ni kpo kpo dɛ nu ngbo kpo kpo.

¹³ Wa dɛa nu nɛ talɛ tɛ 'bolo zã ngbo kpo kpo: nu nɛ talɛ si 'biti gba wese, talɛ si gbãlã ngɔ, talɛ si ba gɔtɔ, nɛ talɛ si 'biti gɛa wese.

¹⁴ Wa dɛa nyanga ngbo nu le ni dɛ ngɔ ta 'bu ngɔ nɛ bɔa, nɛ wa kɔma li Owi nɛ tonɔ 'da Be Bata 'bu ngɔ wa bɔa ni dɛ ngɔ tanɔ ni.

¹⁵ Nɛ anzɛ kɛ a wele zi we hã mi ni, a 'bia mɔ mbali, wa 'dafa nɛ́ kã gole ni dɛ kɔ̃ a. Mɛ a te we do 'da du mɔ. Nɛ a ba we we do 'da du le, do nu ngbonɔ, do 'da du ngboe ngboo ni.

¹⁶ 'Da du le ni wia kɔ̃ do 'da dɔ nɛ. Nɛ anzɛ ba te, nɛ a we 'da du le, nɛ ma hɔ kilomɛtrɛ koto bɔa do kama bɔa. Nɛ 'da dɔ nɛ do 'da ngala nɛ, ma wia kɔ̃ do 'da du nɛ.

¹⁷ Nɛ anzɛ we 'bɔ ngala ngboe ɔ nɛ kɛ wele we do mɔ ni, nɛ ngala nɛ dɛ ngɔ hɔa mɛtrɛ 'bu nɛ sambo ngɔ nɛ bɔa.

¹⁸ Wa dɛa ngboe ni do ta yaspɛ, nɛ wa dɛ le do dia mɔ mbali, kɛ ma ɔ yelele nɛ kristalɛ ni.

¹⁹ Wa 'dafa nyanga ngbo le ni do odia ta olo gã gole kpi do kpi. Kuti ta nyanga ngboe ni, mɛ a yaspɛ, ma ɔ yelele ni, nɛ bɔa ta, mɛ a safirɛ, ma a tũ ɔ nɛ dia li nza ni. Talɛ ta, mɛ a agatɛ, dã tɛ nɛ si tɛ̃ ɛ kpi do kpi, nɛ nalɛ ta, mɛ a emɛrɔdɛ, ma ndele ɔ nɛ tɔlɔ nwá ni.

²⁰ Mɔlɔ kɛ mɛ a ɔniksi, ma nyɛ wena, nɛ gazɛlɛ kɛ mɛ a sardɔanɛ, ma a fila ngoo ni. Sambo kɛ mɛ a krizolitɛ, ma to ɔ nɛ wese ni, nɛ ngbɛ'dɛ'dɛ kɛ mɛ a berilɛ, ma ndele 'bɔ nɛ́ tɔlɔ nwá ni. Kɛ kusi mɛ a topazɛ, ma to 'bɔ nɛ́ wese ni, nɛ kɛ 'bu mɛ a krizoprazɛ, ma ndele 'bɔ nɛ́ tɔlɔ nwá ni. Kɛ 'bu ngɔ nɛ kpo, mɛ a hiasintɛ, ma a tũ ɔ nɛ dia li nza ni, nɛ kɛ 'bu ngɔ nɛ bɔa mɛ a ametistɛ, ma a fila kpangbangba.

²¹ Onu ngbonɔ 'bu ngɔ nɛ bɔa ni, wa dɛa ma do dia oiyaka 'bu ngɔ nɛ bɔa, nɛ nu ngbo kpo kpo do iyaka kpo. Nɛ walanɔ kɔ le ni, wa dɛa ma do dia mɔ mbali kɛ ma ɔ nɛ kristalɛ ni.

²² Nɛ mi zɔ̀ Tɛmpɛloe kɔ gã le ni gɔ, we kɛ Tɛmpɛloe kɔ le ni, wi a Nwa Gale, kɛ a do nganda vɛ ni, wa do Be Bata.

²³ Wese do zɛkɛ to kɔ le ni gɔ, we duzu kɛ yele ngbala 'da Gale do kɛ 'da Be Bata yele kɔ nɛ.

²⁴ Nɛ winɔ ngɔ nù gɛ wa yɛnggɛ sɛ do kɔ yele ngbala 'da a. Nɛ Onwanɔ nù gɛ wa kala sɛ kpamɛnɔ 'da wa, nɛ wa tɛ do ma dɛ kɔ le ni.

^25-26 Nɛ onu fɛlɛ kulanɔ vɛ̃, wa tɛ sɛ do kpamɛnɔ 'da wa do dɔ̃lɔ̃ li 'da wa vɛ̃ dɛ di ni. Onu ngbonɔ kɔ le ni, ma 'bana sɛ do hũi nɛ fai. Wa kpé sɛ ma fala kpo gɔ, we kɛ tũ tu sɛ 'bɔ kɔ le ni gɔ.

²⁷ Nɛ mɔ ndi kpo lé sɛ kɔ le ni gɔ, nɛ wele kɛ a hã tɛ a we dɛ mɔ sape, tabi we 'bili bɛlɛ ni, a lé sɛ di ni gɔ. Nɛ nde winɔ kɛ wa le sɛ i mɔ ni, wi tati a wanɔ kɛ Gale kɔma zɛ́ li wa kɔ 'Buku Kpasi 'da Be Bata ia ni.