USU MƐNƆ 20 - WE NU GALE 1995

We ngɔ sabɛlɛ koto kpo

¹ Nɛ 'do ki ni, nɛ mi zɔ anzɛ li nza i tɛ zĩlĩ dɛ nù nga. A 'bia fungula nu gba 'du kɔ̃ɛ, do gba gbɛlɛ dɔkpɔ dɛ kɔ̃ a.

² Nɛ a ba gba sɔ̃ sa'de, ã gɔ̃ɛ zɛ́ belee kɛ li a a Zabulu tabi Satana ni, nɛ a ɛnzɛ a do dɔkpɛ, takɔ a ɔ do ma we sabɛlɛ koto kpo.

³ Nɛ anzɛ da a kɔ gba 'du kɔ̃ɛ, nɛ a kpe nu a do fungula, nɛ a lɔ nu nɛ na, da dɛ kɔ a hɔ́ nza, kɔ a ɔlɔ owinɔ ngɔ nù gɛ gɔ, gbaa ndɔti nɛ a kɛ sabɛlɛ kote kpo ni ma we sɛ. Nɛ 'do nɛ, nɛ wa da sɛ kɔ̃ wa tɛ a we be kɔ̃ tũ sĩ.

⁴ Nɛ 'do ki ni, nɛ mi zɔ okpongbo nwa, nɛ owinɔ ngɔ nɛ ni wa do ngawi we 'bili we. Nɛ mi zɔ 'bɔ hi winɔ kɛ wa 'bili zi gɛlɛ wa, we kɛ wa bia gulu we 'da Yezu, do we nu Gale hã Owele ni. Wi a wanɔ kɛ wa dɔ̀nggɔ̀ zi sa'de ni gɔ, nɛ wa dɔ̀nggɔ̀ 'bɔ hi a gɔ, nɛ wa gɔ̀nɔ̀ zi dã 'da a dati wa, do tɛ kɔ̃ wa gɔ ni. Kɔ Gale tunu wa kɔ fio, nɛ wa dungu nwa fala nɛ kpo do Kristo gbaa we sabɛlɛ koto kpo.

⁵ Kuti kɛ na winɔ wa tunu kɔ fio a ni. (Nɛ nde tala fionɔ, wa wè zi tɛ tunu nɛ gɔ, gbaa na sabɛlɛ kote kpo ni ma e sɛ nɛ de.)

⁶ Winɔ kɛ wa tunu dati ni, wa do yangga wena, we kɛ Gale wele nu a tɛ wa. Bɔa fio do ngawi ngɔ wa bina. Wa sɛ a onganganɔ 'da Gale do Kristo, nɛ wa dungu sɛ nwa fala nɛ kpo do Kristo gbaa we sabɛlɛ koto kpo.

Gale nɛa ngɔ Satana

⁷ Kɔ 'da fala kɛ sabɛlɛ kote kpo ni ma e, nɛ wa ba sɛ wala hã Satana na, a hɔ nza kɔ gba 'du kɔ̃ɛ ni.

⁸ Nɛ a la sɛ 'bɔ we ɔlɔ owinɔ, kɛ wa pɛsɛ do nyanga nzanɔ vɛ̃, nɛ li wa a Gɔgɛ do Magɔgɛ ni. A mba sɛ li wa, takɔ wa nɛ bolo. Wa dɛlɛ sɛ wena ɔ nɛ kɛnzɛ nu gba lì ni.

⁹ Nɛ mi ka mɔ, nɛ mi zɔ owinɔ ni wa tɛ yɛ'bɛ ngɔ nùi vɛ, nɛ wa linggi fala ɔi 'da winɔ 'da Gale, mba do gãle kɛ Gale kɔ̃a gɛnɛ nɛ nɛ ge nde ni. Nɛ gba nyɛa we yula li nza i, nɛ ma tia ngɔ wa, nɛ ma bɛlɛ wa vɛ.

¹⁰ Nɛ wa ba Satana, kɛ a ɔlɔ wa ni, nɛ wa da a li gba nyɛa we, kɛ ma nyɛ gile gile ni. Mɛ a fala kɛ wa da zi 'bɔ do sa'de, do wi gba do nu Gale do bɛlɛ tɛ nɛ ni. I mɔ ni, wa zɔ sɛ ngamɔ tũ do gba wese kɔ sabɛlɛ do sabɛlɛ.

Ndɔti 'bili we 'da Gale

¹¹ Nɛ 'do ki ni, nɛ mi zɔ gba fɛa kpongbo nwa do wele dɛ ngɔ nɛ. Nɛ nùi do li nza yu wi ni, nɛ wa zɔ̀ 'bɔ do nɛ gɔ.

¹² Nɛ mi zɔa ofionɔ vɛ, ogã winɔ do obe winɔ, nɛ nde wa yula dɛ dati kpongbo nwa ni. Nɛ mi zɔ 'bɔ ohũi li 'buku dɛ di ni. Nɛ wa hũi 'bɔ mbé gele 'buku kpo, kɛ Gale kɔma li owinɔ kɛ wa do kpasi kɛ ma é sɛ gɔ ni kɔ nɛ ni. Nɛ Gale 'bili we 'da ofionɔ vɛ, wele do wele do 'da dɛa tonɔ a dɛa zi ma, nɛ wa kɔma ma kɔ 'bukunɔ ni.

¹³ Nɛ gba lì gisa owinɔ vɛ kɛ wa fia zɛ́ 'dɔ nɛ ni, nɛ fio do le 'da ofionɔ, wa gisa 'bɔ owinɔ wa fia zɛ́ ni. Nɛ Gale 'bili we 'da wa vɛ, wele do wele do 'da dɛa tonɔ a dɛa zi ni.

¹⁴ Nɛ 'do nɛ, nɛ wa ba fio do le 'da fionɔ, nɛ wa da wa li gba nyɛa we. Gba nyɛa we ni a bɔa fie hã ni.

¹⁵ Nɛ wi kɛ Gale kɔ̀mɔ̀ li a kɔ 'Buku Kpasi gɔ ni, wa da a li gba nyɛa we ni.