USU MƐNƆ 19 - WE NU GALE 1995

¹ Nɛ 'do ki ni, nɛ mi zila giti mɔ ɔ nɛ giti gɛlɛ gba gili Owele ni tɛ li nza i, ma wele nganda wena tɛ tɔ̃ na: “Lɛ dɔ́nggɔ́ Gale 'da lɛ! A a Wi kpasa lɛ, nɛ a do dɔ̃lɔ̃ li, do ngawi.

² A 'bili we do bɔlɔ nɛ fai. A 'bili we dɛ zu gã wuko ndumba, kɛ a 'danga zi nùi gɛ do vĩ zu yɛli 'da a ni. A bili nu gbã tɔkɔ tɛ owi dɛa tonɔ 'da a hã wuke ni.”

³ Nɛ wa hia 'bɔ mɔ na: “Lɛ dɔ́nggɔ́ Gale! Zɛ we kɛ ma bɛla le Babilɔnɛ ni, ma kutu ngba'dii kɔ sabɛlɛ do sabɛlɛ.”

⁴ 'Da fala nɛ ni, nɛ okpasa winɔ 'bu wa bɔa ngɔ wa nalɛ ni, do Otunu li mɛnɔ nalɛ ni, wa gu gba zugolo dati Gale, kɛ a dungu ngɔ kpongbo nwa ni, nɛ wa dɔnggɔ a, nɛ wa na: “Lɛ dɔ́nggɔ́ Gale! Amɛ.”

Mɔ dɔ ba ngba wi 'da Be Bata

⁵ Nɛ wala gɛlɛ wele wila tɛ fala do kpongbo nwa ni na: “Nɛ, Owi dɛa tonɔ 'da Gale 'da lɛ vɛ́, ogã winɔ do obe winɔ kɛ nɛ dɛ kili a dɛa ni, nɛ dɔ́nggɔ́ a!”

⁶ Nɛ 'do nɛ, nɛ mi zila 'bɔ giti mɔ ɔ nɛ giti gɛlɛ gba gili Owele ni, ma dɔ̃lɔ̃ ɔ nɛ sulu li, tabi nɛ́ kolo kɛ ma o dã nganda wena ni. Nɛ mi zele wa tɛ tɔ̃ na: “Lɛ dɔ́nggɔ́ Gale, we kɛ Nwa Gale 'da lɛ, kɛ a do nganda vɛ̃ ni, a ndua nyanga dɛ to nwa 'da a ia.

⁷ Lɛ dɛ́ yangga, lɛ té salangga, nɛ lɛ hã dɔ̃lɔ̃ li hã a! We kɛ ngba soe ba ngba wi 'da Be Bata 'da Gale wia, nɛ wuke 'da a 'dafa tɛ̃ ɛ ia.

⁸ Wa hã tulu linɛ ma fɛnga nde nde, nɛ ma ndele wena hã a na, a he'de.” (Tulu linɛ ni, ma be bɔlɔ zu dɛa mɛnɔ kɛ owinɔ 'da Gale wa dɛa zi ni.)

⁹ Nɛ anzɛ tɔ̃ hã mi na: “Mɔ kɔ́mɔ́ wenɔ gɛ do mbɛti! Winɔ kɛ wa sa mɔ hã wa we nyɔngɔ mɔ dɔ ba ngba wi 'da Be Bata ni, wa a wi yangga.” Nɛ a tɔ̃ 'bɔ na: “Wenɔ gɛ ma yula nu Gale ngboo.”

¹⁰ Nɛ mi gu li mi nù dati anzɛ ni we dɔnggɔ a, nɛ a tɔ̃ hã mi na: “Mɔ tɛ dɛ̀ ni gɔ! Mi tɛ mɛ 'bɔ a wi dɛa toe 'da Gale ɔ nɛ mɔ, do onya mɔ vɛ̃ kɛ wa kɔ̃a gɛnɛ gbãlã wenɔ 'da Yezu ni. Kɔ mɔ dɔ́nggɔ́ Gale!” Mba gɔ, gbãlã wenɔ kɛ Yezu bia hã winɔ ni, mɛ a kɛnɔ Hi Wi 'da Gale ia zi ma dɛ nu owi gba olo nu a ni.

Wi kũ ngɔ fɛ̃a mbalata

¹¹ 'Do ki ni, nɛ nu li nza hũi, nɛ mi zɔ fɛ̃a mbalata. Nɛ wi kũ ngɔ mbalata ni, li a a: “Bɔlɔ zu, Wi tɔ̃ gbãlã we.” A 'bili we, nɛ a bi bolo do wala do nɛ.

¹² Gbali a sala ɔ nɛ nyɛa we ni, nɛ a gu ogili ndasa nwa zu a. Nɛ wa kɔma li wele tɛ a, nɛ wele kpo ĩ̀ ti gulu nɛ gɔ, tati a a zu a kpo iko.

¹³ A hi'da gba tulu kɛ tɔkɔ kpa do tɛ nɛ vɛ ni. Li a a: “We nu Gale.”

¹⁴ Nɛ ogili sodanɔ tɛ li nza i wa kpia dɛ 'do a. Wa hi'da tulu linɛ ma fɛnga nde nde, nɛ wa kũ ngɔ ofɛa mbalata.

¹⁵ Du kɔya kɛ nu nɛ tɔ̃ wena ni hɔa kɔ nu a, we bi do ogele winɔ kɛ wa bɛa gɛnɛ a ni. A dungu sɛ nwa ngɔ wa do ngawi wena, nɛ a tɛ sɛ do gã nɔ̃lɔ̃ zã 'da Gale kɛ a do nganda vɛ ni, nɛ a ma wa ti nyanga a, ɔ nɛ kɛ wa ma do wala vinɔ we kpĩlĩ lì nɛ ni.

¹⁶ Wa kɔma li a tɛ gba tuli 'da a do tɛ ku a na: “Nwa ngɔ Onwanɔ, kɛ to nwa 'da a nɛa ngɔ to nwanɔ vɛ ni.”

¹⁷ Nɛ mi nɛ ka 'bɔ mɔ, nɛ mi zɔ anzɛ kpo, a yula dɛ li wese. Kɔ a he mɔ nganda wena hã onɔɛnɔ vɛ, kɛ wa tɛ bũlũ li ngɔ i ni na: “Nɛ tɛ́, kɔ nɛ ngɛmɛ ngba nɛ we gã mɔ dɔɛ 'da Gale!

¹⁸ Nɛ tɛ́, nɛ nɛ nyɔngɔ mulu winɔ kɛ wi kũ ngɔ fɛ̃a mbalata nɛ gbɛ wa ni. Nɛ nyɔ́ngɔ́ mulu tɛ Onwanɔ, do onwa ngɔ sodanɔ, do osodanɔ. Nɛ nyɔ́ngɔ́ mulu tɛ ombalatanɔ, do kɛ 'da Owi kũ ngɔ wa, do mulu owinɔ vɛ́, Owele le, ongbá, ogã winɔ, do obe winɔ.”

¹⁹ Nɛ mi zɔ sa'de ni, do Onwanɔ ngɔ nù gɛ, fala nɛ kpo do osodanɔ 'da wa vɛ, wa mba li ngba wa we bi bolo do wi kɛ a kũ ngɔ fɛ̃a mbalata ni do osodanɔ 'da a.

²⁰ Nɛ wa bi gbaa, nɛ wa ba sa'de ni, nɛ wa ba 'bɔ wi gba olo nu Gale do bɛlɛ, kɛ a dɛ zi gba sɔ̃ mɛnɔ dɛ li sa'de, nɛ ma ɔlɔ winɔ, nɛ wa gɔnɔ zi dã 'da sa'de dati wa, nɛ wa dɔnggɔ hi a ni. Nɛ wa da wa bɔa nɛ do tunu li wa dɛ li gba nyɛa we, kɛ ma nyɛ gile gile ni.

²¹ Nɛ wi kɛ a kũ ngɔ fɛ̃a mbalata ni, a gbɛ tala winɔ ni vɛ̃ do kɔya kɛ ma hɔa kɔ nu a ni. Nɛ nɔɛnɔ vɛ̃ wa nyɔngɔ mulu wa gbaa, nɛ zã wa hɛ̃.