USU MƐNƆ 18 - WE NU GALE 1995

Gã le Babilɔnɛ tia

¹ Nɛ 'do ki ni, nɛ mi zɔ 'bɔ mbe gele anzɛ li nza i tɛ zĩlĩ dɛ nù nga. A a nwa ngboo, nɛ yele ngbala dɔ̃lɔ̃ li 'da a yila ngɔ nùi vɛ.

² Nɛ a hia mɔ nganda wena na: “Gã le Babilɔnɛ tia! Ma tia ia! Di ngangga ni, ma hɔa le 'da ozabulunɔ. Mɛ a fala na 'dã hi winɔ kpi do kpi wa usu do tɛ wa. Onɔɛ ndi kpi do kpi, kɛ owinɔ wa kɔ̃̀ wa gɔ ni wa ɔ dɛ di ni.

³ We kɛ zi dati, nɛ le ni ia dɔ̃ mɔ sape 'da a nu ogele winɔ vɛ̃, nɛ wa nɔa. Nɛ Onwanɔ ngɔ nùi gɛ, wa yɛnggɛ zi 'bɔ vĩ zu yɛli do a, nɛ owi be golenɔ wa hɔa ogã wi kpamɔ we duzu dia mɛnɔ kɔ le ni.”

⁴ Nɛ 'do nɛ, nɛ mi zele 'bɔ mbé wala gɛlɛ wele ma yula li nza i tɛ tɔ̃ na: “Aa nɛ, winɔ 'da mi, nɛ hɔ́ nza kɔ le gɛ, dɔ nɛ lé kɔ 'dã mɛ 'da a, kɔ nɛ kpa ngamɛnɔ fala nɛ kpo do a gɔ.

⁵ Mba gɔ, 'dã mɛnɔ 'da a ma ngɛma dɛ ngɔ ngbɛ ɛ dɛlɛ wena, nɛ ma kũ gbaa li nza i, nɛ ta zu Gale gba ngɔ ma.

⁶ Kɔ nɛ dɛ́ do a, ɔ nɛ kɛ a dɛa zi do nɛ ni, nɛ nɛ gésé do 'dã mɛnɔ 'da a hã a fala bɔa. Nɛ á nga dɔ̃ kɔ bila 'da a, nɛ ma la kɛ a hã zi hã nɛ ni fala bɔa.

⁷ Nɛ hã́ zɛlɛ tɛ do 'bako hã a we kɔ̃ do omɔ walinɔ, do dɔ̃lɔ̃ linɔ kɛ a dɔnggɔ zi do tɛ a ni. We kɛ a tɔ̃ zi do kɔ sila a na, ɛ a wuko nwa, ɛ a wi fio wili gɔ, nɛ ɛ dúngú sɛ gɛla fala kpo gɔ.

⁸ Ma kɛ li wese kpo, nɛ a kpa sɛ ngamɛnɔ vɛ kɛ a kpà zi gɔ ni. Fio, gɛla, do gba wɔ ma kpa sɛ a, nɛ we ma bɛlɛ sɛ a vɛ. Mba gɔ, Nwa Gale kɛ a 'bili we 'da a ni, a do nganda vɛ.”

⁹ Nɛ Onwanɔ ngɔ nùi gɛ, kɛ wa yɛngga zi vĩ zu yɛli do a, nɛ wa hã tɛ wa we kpa dia mɛnɔ fala nɛ kpo do a ni, wa zɔ sɛ zɛ̃ we bɛlɛ tɔanɔ 'da a, nɛ wa he sɛ kɔ̃a, nɛ wa bi tɛ wa.

¹⁰ Nɛ wa yolo sɛ ndũu we dɛ kili ngamɛnɔ ma kpa a ni, nɛ wa he sɛ na: “'Bako! Kɛ gɛ a 'bako ge nde! Aa Babilɔnɛ, gã le Babilɔnɛ, mɔ nganda zi wena, nɛ 'do sa kpo iko, nɛ nde we 'da mɔ sɔkpɔ vɛ ia nde!”

¹¹ Owi be golenɔ ngɔ nùi gɛ, wa he sɛ 'bɔ kɔ̃a, nɛ wa bi tɛ wa, we kɛ fo sɛ 'bɔ wi oso golenɔ 'da wa bina.

¹² Wa be zi gole mɛnɔ kpi do kpi: mɔ mbali, fɛa mɔ bolo, odia ta do gã gole, do oiyaka, otulu linɛ, do odia fila tulu kpi do kpi, do tulu sɔa. Gili odia te kpi do kpi, do gili mɛnɔ kɛ wa sɛa ma do gogo fɔlɔ, tabi do odia te, tabi wa dolo do tũ mɔ bolo, do mɔ bolo, tabi wa sɛa do ta marbrɛ.

¹³ Owinɔ ni wa be zi 'bɔ gole ounu mɔ kpi do kpi ɔ nɛ kanɛlɛ, episɛ, yɔmbɔ, mirɛ, do fũ yɔmbɔ, dɔ̃, nɔ, fũ, ble, ongɔmbɔ, obata, ombalata do ongilingili, ongbá do Owi bɔlɔkɔ.

¹⁴ Owi be golenɔ ni wa tɔ̃ hã gà le ni na: “Mɛnɔ vɛ̃ kɛ mɔ dɛ zi wɔ tɛ nɛ ni, ma la kɔ̃ mɔ ia. Kpamɛnɔ do mɔ wali 'da mɔ vɛ̃, ma yɔa kɔ̃ mɔ do'do, nɛ mɔ kpá sɛ 'bɔ ma gɔ.”

¹⁵ Owinɔ kɛ wa hɔa zi wi kpamɔ we golenɔ kɛ wa bia zi kɔ gã le ni, wa yolo sɛ nyɛlɛ ndũu tɛ dɛ kili ngamɛnɔ kɔ le ni, nɛ wa he sɛ kɔ̃a, nɛ wa bi tɛ wa.

¹⁶ Nɛ wa tɔ̃ sɛ na: “'Bako! Kɛ gɛ a 'bako ge nde! Gã le gɛ ɔ zi nɛ wuko kɛ a hi'da tulu linɛ, do dia fila tulu kpi do kpi, nɛ mɔ mbali, do odia ta olo gã gole, do oiyaka ma ndele tɛ nɛ kpala kpala.

¹⁷ Nɛ 'do sa kpo iko, nɛ nde kpamɛnɔ 'da a 'danga vɛ ia nde!” Owi ba masuanɔ, do Owi nɛ gɛnɛnɔ, Owi dɛ to kɔ masuanɔ, do owinɔ vɛ kɛ wa kpasa we dɛa toe 'da wa 'dɔ gba lì i ni, wa yolo sɛ ndũu,

¹⁸ tɛ ka mɔ tɛ zɛ̃ we bɛlɛ tɔanɔ kɔ gã le ni. Nɛ wa he sɛ mɔ na: “Fo mbe gã le ɔ nɛ gã le gɛ ngɔ nù gɛ bina!”

¹⁹ Nɛ wa so sɛ fumbɛlɛ dɛ zu wa, nɛ wa he kɔ̃a, nɛ wa bi tɛ wa, nɛ wa zɛ nu wa do 'bako na: “'Bako! Kɛ gɛ a 'bako ge nde! Owele masuanɔ wa hɔa zi wi kpamɔ we duzu kpamɛnɔ kɔ gã le gɛ. Nɛ 'do sa kpo iko, nɛ nde ma 'danga vɛ ia nde!”

²⁰ Aa nɛ, winɔ li nza i, nɛ dɛ́ yangga, we kɛ le Babilɔnɛ tia. Aa nɛ, winɔ 'da Gale, do Owi nɛ tonɔ 'da a, do owi gba do nu a, nɛ dɛ́ yangga! We kɛ Gale 'bili 'dã gulu we hã a, we 'dã mɛnɔ a dɛa zi do nɛ ni.

²¹ 'Do nɛ, nɛ mbé anzɛ kpo kɛ a nganda wena ni, a ba gba gbɛlɛ ta, ma gã nɛ́ ta hɔnɔ do ble ni, nɛ a da ma 'dɔ gba lì duvwu, nɛ a tɔ̃ na: “Nɛ zɔ́, gã le Babilɔnɛ ma te sɛ na mɛ ni, nɛ wa zɔ́ sɛ 'bɔ mbé tɛ nɛ fala kpo gɔ!

²² Nɛ giti Owi zɛ kundu, do Owi ga zuma, do Owi dama gaga do mɔtũlũ wélé sɛ 'bɔ kɔ gã le gɛ fala kpo gɔ. Wa zɔ́ sɛ 'bɔ Owi dɛ si'bili to kɔ le gɛ gɔ. Nɛ giti Owi 'bili tula wélé sɛ 'bɔ gɔ.

²³ Nyɛa we mwinda nyɛ́ sɛ 'bɔ kɔ nɛ gɔ, nɛ gɛlɛ wi ba wuko, do wuko ba wili, ma wélé sɛ 'bɔ kɔ le gɛ gɔ. We kɛ zi dati, Owi be golenɔ kɔ le gɛ, wa nɛa zi ngɔ winɔ ngɔ nù gɛ vɛ́ do ngawi, nɛ le gɛ ɔlɔ zi nu fɛlɛ kulanɔ vɛ do dɛa mɔ sɔ̃nɔ 'da a.”

²⁴ Le Babilɔnɛ tia, we duzu tɔkɔ tɛ owi gba olo nu Gale, do owinɔ 'da Gale, kɛ wa gbɛa zi wa ni. Gbãlã we, wa kpa tɔkɔ tɛ winɔ vɛ kɛ wa gbɛa zi wa ngɔ nù gɛ ni dɛ di ni.