USU MƐNƆ 17 - WE NU GALE 1995

Le Babilɔnɛ a gã wuko ndumba

¹ 'Do ki ni, nɛ mbe kpo sanga anzɛnɔ sambo kɛ wa 'bia zi bilanɔ sambo dɛ kɔ̃ wa ni tɛa, nɛ a tɔ̃ hã mi na: “Mɔ tɛ́, kɔ mi be etumbui kɛ Gale a hã sɛ hã wuko ndumba olo 'dã mɛnɔ 'da a ni hã mɔ. Wuke ni a gã le kɛ wa dɛa ma dɛ nu gba lìnɔ ni.

² Onwanɔ nù gɛ, wa yɛnggɛ vĩ zu yɛli do a, nɛ owinɔ ngɔ nùi gɛ, wa dɛa mɔ sape do a gbaa, kɔ 'dã mɛ 'da a ba wa ɔ nɛ dɔ̃ ni.”

³ Nɛ Hi Wi 'da Gale lia kɔ mi, nɛ anzɛ la do mi gbaa dɛ li gba zɔ̃ i. Nɛ mi zɔ mbe wuko i mɔ, nɛ nde a dungu ngɔ gba sɔ̃ fila sa'de. Nɛ wa kɔma o'dã li kpa do tɛ sa'de ni vɛ̃, we dã do Gale. Sa'de ni do zu a sambo, nɛ zamba zu a 'bu.

⁴ Nɛ wuke ni hi'da dia fila tulu, nɛ mɔ mbali, do ota olo gã gole, do oiyaka ma ndele tɛ nɛ kpala kpala. Nɛ a 'bia bila mɔ mbali, kɛ ma dunu do sɔkpɔ o'dã mɔ kpi do kpi, nɛ mɛ a ndi mɔ sapenɔ 'da a ni dɛ kɔ̃ a.

⁵ Nɛ wa kɔma li kpo dati a, nɛ gulu li ni usu tɛ̃ ɛ usu. Li ni a: “Gã le Babilɔnɛ, naa vĩ zu yɛli do sɔkpɔ mɔ sapenɔ ngɔ nù gɛ vɛ.”

⁶ Nɛ mi zɔa wuke ni, nɛ nde tɔkɔ tɛ winɔ 'da Gale, do kɛ 'da winɔ kɛ wa gbɛ zi wa, we duzu Yezu, nɛ a nɔ zi ma ni, ma ba a ɔ nɛ dɔ̃ ni. Kɔ mi nɛa we zɔ a, nɛ ma ba we nu mi do'do.

⁷ Nɛ anzɛ aka mi na: “Mɔ dɛ kili ge nde? Mi tɔ̃ sɛ gulu usu wenɔ 'da wuke gɛ, do kɛ 'da sa'de a dungu ngɔ a, kɛ zu a sambo, nɛ zamba zu a 'bu ni hã mɔ.

⁸ Sa'de kɛ mɔ zɔa a ni, a zi do tunu li a, kɔ ngangga ni a 'bɔ bina. Nɛ nde ma 'bana bi sĩ, nɛ a hɔ sɛ nza kɔ gba 'du kɔ̃ɛ, takɔ a la dɛ fala wa nɛ gbɛ do a ni. Nɛ winɔ ngɔ nù gɛ, kɛ 'da fala Gale ndua zɛ́ nyanga dɛ mɛnɔ, nɛ a kɔ̀mɔ̀ zɛ́ li wa kɔ 'Buku Kpasi gɔ ni, wa ɔngbɔ sɛ wena we zɔ sa'de ni, we kɛ a zi do tunu li a, kɔ ngangga ni a 'bɔ bina, nɛ a hɔ sɛ 'bɔ mbé nɛ ni.

⁹ “We ĩ ti gulu we gɛ, ma gɔa hã zã. Zu sa'de sambo ni, mɛ a kalanɔ sambo, kɛ wuke dungu ngɔ nɛ ni. Nɛ ma be 'bɔ onwa sambo.

¹⁰ Ombe mɔlɔ sanga wa ni, wa tia ia, nɛ mbe kpo tɛ dɛ to nwa 'da ɛ ngangga ni, nɛ tala mbe kpo tɛ hɔ̀ gɔ. Kɔ 'da fala kɛ a hɔ, nɛ a ɔ́ sɛ tũ dɛlɛ gɔ.

¹¹ Nɛ sa'de kɛ a zi do tunu li a, nɛ ngangga ni a 'bɔ bina ni, a ngboo hã a nɛ dungu sɛ nwa kɛ ngbɛ'dɛ'dɛ. Nɛ nde a sanga Onwanɔ sambo dati ni, kɔ a nɛ la dɛ fala wa gbɛ sɛ do a ni.

¹² “Nɛ zamba zu a 'bu kɛ mɔ zɔa sɔ ni, mɛ a onwa 'bu, kɛ wa tɛ ndò dɛa to nwa 'da wa gɔ. Nɛ nde wa dɛ sɛ to nwa fala nɛ kpo do sa'de ni we sa kpo.

¹³ Nɛ wa vɛ̃ 'bu ni, wa do linggamɔ kpo na, wa la ngawi 'da wa do dɛa to nwa 'da wa vɛ̃ dɛ kɔ̃ sa'de ni.

¹⁴ Wa bi sɛ bolo do Be Bata, nɛ Be Bata nɛ ngɔ wa, we kɛ a a Nwa ngɔ Onwanɔ, nɛ to nwa 'da a nɛa ngɔ to nwanɔ vɛ. Nɛ winɔ 'da a, kɛ a sa zɛ́ mɔ hã wa, nɛ a saka zɛ́ wa, nɛ wa kàfà a gɔ ni, wa nɛ sɛ ngɔ Onwanɔ ni fala nɛ kpo do a.”

¹⁵ Nɛ anzɛ tɔ̃ 'bɔ hã mi na: “Lìnɔ mɔ zɔa, kɛ wuko ndumba ɔ nu nɛ ni, mɛ a ogili nu fɛlɛ kulanɔ, do lɛnggɛnɔ, do nu kpalanɔ, do lenɔ vɛ.

¹⁶ Nɛ zamba zu sa'de 'bu, do sa'de kɛ mɔ zɔa ni, wa sɛnɛ sɛ wuko ndumba, nɛ wa kala mɛnɔ kɔ̃ a vɛ, nɛ wa la a do kũlĩ tɛ a iko. Nɛ wa nyɔngɔ sɛ mulu tɛ a, nɛ wa dɔ a do we.

¹⁷ Mba gɔ, Gale ia dɛ kɔ sila wa na, wa dɛ mɛ kɛ zã ɛ kɔ̃a ni. Mɛ a kɛ na, wa mba linggamɛ 'da wa kpo, nɛ wa hã dɛa to nwanɔ 'da wa hã sa'de ni gbaa na, we nu Gale ma dɛ tɛ̃ ɛ vɛ̃ do'do sɛ nɛ de.

¹⁸ “Nɛ wuke kɛ mɔ zɔa a ni, mɛ a gã le kɛ ma ia mbula ngɔ Onwanɔ nù gɛ vɛ́ ni.”