USU MƐNƆ 16 - WE NU GALE 1995

Gale bia nɔ̃lɔ̃ zã 'da ɛ

¹ Nɛ 'do ki ni, nɛ mi zele wala gɛlɛ wele kɔ Tɛmpɛloe i, ma dɔ̃lɔ̃ nganda wena tɛ tɔ̃ hã oanzɛnɔ sambo ni na: “Nɛ nɛ́, kɔ nɛ sulu nɔ̃lɔ̃ zã 'da Gale kɛ ma kɔ bilanɔ sambo ni tɛ ngɔ nù i!”

² Nɛ kuti anzɛ la, nɛ a sulu ngamɛ kɔ bila kɔ̃ a ni dɛ ngɔ nùi. Nɛ gã odani kɛ ma zɛlɛ wena ni, ma te tɛ winɔ, kɛ wa gɔna zi dã 'da sa'de dati wa, nɛ wa dɔnggɔ hi a ni.

³ Nɛ bɔa anzɛ sulu ngamɛ kɔ bila kɔ̃ a ni 'dɔ gba lì. Nɛ lì kifi tɔkɔ ɔ nɛ tɔkɔ fio ni. Nɛ Otunu li mɛnɔ 'dɔ gba lì ni, wa fe vɛ̃.

⁴ Nɛ talɛ anzɛ sulu ngamɛ kɔ bila kɔ̃ a ni dɛ 'dɔ fua lìnɔ do zu lìnɔ, nɛ ma kifi 'bɔ tɔkɔ.

⁵ Nɛ mi zele gɛlɛ anzɛ kɛ a zɔ mɔ tɛ lìnɔ ni tɛ tɔ̃ na: “Aa Gale, mɔ a santo! Mɔ zɛ́ boe, nɛ mɔ sɔɛ gɛ boe. Mɔ dɛ mɔ do wala olo nɛ, we kɛ mɔ 'bili we do bɔlɔ nɛ.

⁶ Mba gɔ, owinɔ ni, wa a zi tɔkɔ tɛ winɔ 'da mɔ, do owi gba olo nu mɔ nù. Kɔ ngangga ni, mɔ hã tɛ mɛ 'bɔ tɔkɔ hã wa na, wa nɔ, nɛ ma wia olo li 'dã mɛnɔ 'da wa.”

⁷ Nɛ 'do ki ni, nɛ mi zele wala gɛlɛ wele ma yula tɛ gbagala i tɛ tɔ̃ na: “Ma a ni, Nwa Gale do nganda vɛ̃! Mɔ 'bili we 'da owinɔ do wala do nɛ, do bɔlɔ nɛ ngboo!”

⁸ Nɛ nalɛ anzɛ sulu ngamɛ kɔ bila kɔ̃ a ni dɛ li wese, nɛ ma dɛa na wese to, nɛ ma dɔ winɔ nganda wena.

⁹ Nɛ wese ma ngɔ to nganda wena, nɛ ma dɔa winɔ, nɛ winɔ wa ma ngɔ dã zu li Gale kɛ a do ngawi we tombo ngamɛnɔ ni. Gɛnɛ kɔ na mɛ ni, nɛ nde wa là fala 'dã mɛnɔ 'da wa we dɔnggɔ Gale gɔ.

¹⁰ Nɛ mɔlɔ anzɛ sulu ngamɛ kɔ bila kɔ̃ a ni dɛ ngɔ kpongbo nwa 'da sa'de, nɛ gba tũ tũ kɔ le nwa 'da sa'de ni. Nɛ owinɔ wa ma ngɔ nyɔngɔ li gogo wa we ngamɛ ma kpa wa ni.

¹¹ Nɛ wa ma ngɔ dã zu li Gale kɛ a li nza i ni, we duzu ngamɛnɔ wa zɔ ni, do we gã daninɔ tɛ wa ni. Nɛ nde wa là fala 'dã dɛa mɔ tɛ wa gɔ.

¹² Nɛ gazɛlɛ anzɛ sulu ngamɛ kɔ bila kɔ̃ a ni dɛ ngɔ gba lì Efratɛ. Nɛ gba lì ɔ̃sɔ̃ vɛ, nɛ ma hã wala hã nwanɔ kɛ wa yula si 'bili gba wese i ni na, wa la do ma.

¹³ Nɛ 'do nɛ, nɛ mi zɔ o'dã hi wi talɛ, wa ɔ nɛ odalɛ ni, wa hɔa nza kɔ nu gba sɔ̃ sa'de, do kɔ nu sa'de sɔ dati ni, do kɔ nu wi gba do nu Gale do bɛlɛ.

¹⁴ Wa a o'dã hi winɔ kɛ wa yula 'da Satana, nɛ wa do ngawi we dɛ ogba sɔ̃ mɔ. Nɛ wa nɛa 'da Onwanɔ ngɔ nù gɛ vɛ, takɔ wa mba li wa, we bi bolo do li gã ngba soe 'da Gale, kɛ a do nganda vɛ ni.

¹⁵ Nɛ zélé, Yezu tɔ̃a na: “Mi tɛ sɛ do gbanga nɛ nɛ́ wi zũ ni. Yangga do wi kɛ a 'bɔ 'da hɔa 'da mi, nɛ tulunɔ 'da a 'bana dɛ tɛ̃ a na, dɔ a lá do kũlĩ tɛ a, kɔ sape ba li a dati winɔ gɔ ni.”

¹⁶ Nɛ o'dã hi winɔ ni, wa mba li onwanɔ vɛ̃ dɛ mbe fala kpo wa sa li ma do Hebre na Armagedoni.

¹⁷ Nɛ sambo anzɛ sulu ngamɛ kɔ bila kɔ̃ a ni dɛ zã bũi. Nɛ wala gɛlɛ wele wila nganda wena tɛ kpongbo nwa kɔ tɔa Tɛmpɛloe i na: “Ma ia wá ia!”

¹⁸ Nɛ kolo ma ngɔ nyɛ li ɛ, nɛ ma dĩ, nɛ ma ua dã, nɛ nùi tana nganda wena. Ndo do kɛ Gale dɛa zɛ́ wele ni, nùi tànà mbe nganda na mɛ ni fala kpo gɔ.

¹⁹ Nɛ gã le Babilɔnɛ gbini sanga tɛ ngbɛ ɛ talɛ, nɛ lenɔ ngɔ gele nùnɔ ma 'danga vɛ̃. Nɛ ta zu Gale gba ngɔ Babilɔnɛ, nɛ a ba bila kɛ dɔ̃ nɔ̃lɔ̃ zã 'da a kɔ nɛ ni, nɛ a isi dɛ nu owinɔ kɔ le ni.

²⁰ Nɛ ngolo lìnɔ vɛ̃ ma la, nɛ kalanɔ ma bisi.

²¹ Nɛ gba kolo gbãlã mũlũ yula li nza i, nɛ ma ala dɛ ngɔ winɔ nù nga. Kili gbãlã mũlũ kpo wia 'bu kilo nalɛ. Nɛ ma ala dɛ ngɔ winɔ, nɛ wa ma ngɔ dã zu li Gale we nɛ, we duzu kɛ ngamɛ ni ma nganda zi do wa la li ngele.