USU MƐNƆ 15 - WE NU GALE 1995

Oanzɛnɔ wa tɛa do tala ngamɛnɔ

¹ 'Do ki ni, nɛ mi zɔ mbé gele gã bia mɔ kpo tɛ li nza i, kɛ mɛ a gba mɔ ɔ ɔngba. Oanzɛ sambo wa tɛa do ngamɔ sambo. Nɛ mɛ a tala ngɔ go'do ngamɛnɔ vã, we duzu kɛ wa tɛa we be tala nɔ̃lɔ̃ zã 'da Gale.

² 'Do nɛ, nɛ mi zɔa 'bɔ mɔ ɔ nɛ gba lì ni, ma ndele nɛ́ talatala, nɛ ma mba do nyɛa we. Nɛ mi zɔ 'bɔ winɔ kɛ wa nganda zi nɛa ngɔ sa'de, do hi sa'de, do wele kɛ li a bia tɛ̃ ɛ do motuya ni. Wa yula dɛ ngɔ gba lì kɛ ma ndele nɛ́ talatala ni, nɛ wa kala okundunɔ kɛ Gale hã zi hã wa ni,

³ kɔ wa tɛ zɛ zuma kɛ Mɔizɛ, wi dɛa to 'da Gale ga zɛ́ ma ni, do zuma 'da Be Bata na: “Nwa Gale, mɔ do nganda vɛ, mɔ dɛa ogba mɔ, nɛ Owele wa ɔngbɔ ma ɔngba. Mɔ a Nwa ngɔ winɔ vɛ̃. Walanɔ 'da mɔ ma bɔlɔ wena, nɛ wele wia we gbini zã ɛ do ma.

⁴ Aa Nwa, wi kɛ a dɛ́ sɛ kili mɔ gɔ ni a wio nde? Wi kɛ a bɛ sɛ we dɔnggɔ mɔ ni a wio nde? We duzu kɛ mɔ zu mɔ kpo, mɔ a santo. Onu kpala winɔ ngɔ nù gɛ vɛ wa tɛ sɛ, nɛ wa gu nù ti mɔ we dɔnggɔ mɔ, we kɛ wa zɔa na, mɔ a wi dɛ bɔlɔ zu dɛa mɔ.”

⁵ 'Do ki ni, nɛ mi nɛ ka mɔ, nɛ nde nu tɔa Tɛmpɛloe li nza i hũi, nɛ mi zɔ tɔa Tande kɛ ma be na, Gale di ni boe ni.

⁶ Nɛ oanzɛnɔ sambo, kɛ wa tɛa do ngamɛnɔ sambo ni, wa hɔ nza kɔ tɔa Tɛmpɛloe. Wa hi'da dia tulu linɛ, ma ndele kpala kpala, nɛ wa kpua 'dɛ mɔ mbali ngɔ nɛ.

⁷ Nɛ mbe kpo sanga Otunu li mɛnɔ nalɛ ni tɛa, nɛ a hã bila mɔ mbali sambo hã oanzɛnɔ sambo ni. Bilanɔ ni dunu do nɔ̃lɔ̃ zã 'da Gale, kɛ a do kpasi kɔ sabɛlɛ do sabɛlɛ ni.

⁸ Nɛ kɔ tɔa Tɛmpɛloe dunu do zɛ we, kɛ ma yolo kɔ dɔ̃lɔ̃ li do ngawi 'da Gale. Nɛ wele kpo wè tɛ le kɔ tɔa Tɛmpɛloe ni gɔ, gbaa we 'bɔ do 'da kɛ na ongamɛnɔ sambo, kɛ oanzɛnɔ wa tɛa nɛ ni, ma dɛ tɛ̃ ɛ vɛ̃ do'do sɛ nɛ de.