USU MƐNƆ 14 - WE NU GALE 1995

Zuma 'da winɔ kɛ Be Bata gɔna zu wa ni

¹ 'Do ki ni, nɛ mi nɛ ka mɔ, nɛ mi zɔ Be Bata, nɛ nde a yolo dɛ ngɔ kala Sioni, fala nɛ kpo do ogili wele koto kama do 'bu wa nalɛ ngɔ wa nalɛ (144.000). Wa kɔma li a, do li Baa a dɛ dati owinɔ ni.

² Nɛ mi zele wila we li nza i tɛ dɔ̃lɔ̃ ɔ nɛ giti sulu lì, tabi giti ua dã kolo ni. Nɛ wila we kɛ mi zele ni, ma wele ɔ nɛ giti kundu kɛ Owele wa zɛ ma ni.

³ Gili winɔ ni wa yula dɛ dati kpongbo nwa 'da Gale, do dati Otunu li mɛnɔ nalɛ, do okpasa winɔ ni, nɛ wa ga mbé zuma. Zuma ni mɛ a zuma kɛ gele wele wè zi tɛ yambala ma gɔ, tati a owinɔ kote kama do 'bu wa nalɛ ngɔ wa nalɛ, kɛ Kristo gɔnɔ zi zu wa ngɔ nù gɛ ni iko.

⁴ Owinɔ ni wa a wi kɛ wa fɔmɔ kili tɛ wa de wena, nɛ wa ɔ̀ zɛ́ do owuko go, nɛ wa yɛnggɛ 'dɔkɔlɔ Be Bata falanɔ vɛ̃ a la nɛ ni. A gɔnɔ zi zu wa sanga winɔ nù gɛ, nɛ wa a kuti dɔnggamɛ kɛ a hã hã Gale, nɛ a hã 'bɔ hã kili tɛ a wele nɛ.

⁵ Wa 'bìlì zi bɛlɛ fala kpo gɔ, nɛ wa do 'dã mɔ kpo bina.

Lɛnggɛ ngɔ oanzɛ talɛ

⁶ 'Do ki ni, nɛ mi zɔa mbé gele anzɛ tɛ bũlũ ndũu do ngɔ i. Nɛ a tɛa do Dia Sakoe kɛ ma 'bana sɛ fai ni, takɔ a be ma hã owinɔ ngɔ nù gɛ. A be ma hã nu fɛlɛ kulanɔ, do lɛnggɛnɔ, do nu kpalanɔ, do kɔ lenɔ vɛ̃.

⁷ Nɛ a he mɔ dɛ ngɔ na: “Nɛ dɛ́ kili Gale, nɛ nɛ dɔnggɔ a! Mba gɔ, ngba soe a nɛ 'bili do we 'da owinɔ ni, ma hɔa ia. Nɛ dɔ́nggɔ́ wi kɛ a dɛa li nza do nùi, gba lì, do be lìnɔ ni!”

⁸ Nɛ mbé anzɛ hɔa 'dɔkɔlɔ wele kɛ sɔ ni, nɛ a na: “Gã le Babilɔnɛ tia! Ma tia wuku! Mɛ a le kɛ ma ia zi dɔ̃ yɛnggɛ vĩ zu yɛli nu ogele winɔ vɛ, nɛ wa nɔa.”

⁹ Nɛ talɛ anzɛ hɔa 'dɔkɔlɔ wanɔ bɔa dati ni, nɛ a he mɔ dɛ ngɔ na: “Wi kɛ a dɔnggɔ sa'de, do hi sa'de, nɛ wa gɔnɔ 'bɔ dã 'da sa'de dati a, tabi tɛ kɔ̃ a ni,

¹⁰ a nɔ sɛ dɔ̃ nɔ̃lɔ̃ zã 'da Gale. A nɔ sɛ nga dɔ̃ɛ ni, nɛ ma e kɔ bila nɛ vɛ. Winɔ kɛ wa dɛ mɛnɔ ní ni, tɛ wa ma zɛlɛ sɛ li gba nyɛa we, dɛ li oanzɛ santonɔ, do li Be Bata.

¹¹ Nɛ zɛ we kɛ ma zɛlɛ tɛ wa ni, ma kutu sɛ fai, nɛ ma é sɛ gɔ. Nɛ winɔ kɛ wa dɔngga sa'de, do hi sa'de, do wanɔ kɛ wa gɔna dã 'da a tɛ wa ni, tũ do gba wese, wa ɔ́mɔ́ sɛ tɛ wa fala kpo gɔ.”

¹² We duzu ki ni, ma wia na, owinɔ 'da Gale kɛ wa dɛ mbulanɔ 'da a, nɛ wa do kɔ̃a we dɛ 'da Kristo ni, wa ɔ do du sila.

¹³ 'Do ki ni, nɛ mi zele wala gɛlɛ wele li nza i tɛ tɔ̃ hã mi na: “Mɔ kɔ́mɔ́ na: Ngangga gɛ winɔ kɛ wa fia dɛ kɔ dɛa toe 'da Nwa ni, wa a owi yangga!” Nɛ Hi Wi Santo na: “Mɛ a ngbongbo we. Ngangga ni, wa wia tɛ ɔmɔ tɛ wa do nga dɛa toe wa dɛa zi ni, we duzu kɛ dia mɔ do dɛa toe 'da wa kpia dɛ 'dɔkɔlɔ wa.”

Tɛlɛ tɛ kɛ Gale nɛ 'bɛ̃lɛ̃ do kpalɛ li fɔɛ 'da a ni

¹⁴ Nɛ mi nɛ ka mɔ, nɛ mi zɔ gba kutu, nɛ mi zɔ 'bɔ mɔ ɔ nɛ wele ni, a dungu ngɔ gba kuti ni. A gu ndasa nwa, wa dɛa do mɔ mbali, nɛ a 'bia tɔ̃a nu dugbu dɛ kɔ̃ a.

¹⁵ Nɛ mbe anzɛ hɔ nza kɔ tɔa Tɛmpɛloe, nɛ a he mɔ dɛ ngɔ hã wele kɛ a dungu ngɔ gba kuti ni na: “Ngba soe kala kpalɛnɔ wia ia! Mɔ fí dugbu 'da mɔ, hã mɔ ndo sɛlɛ ma, we kɛ kpalɛnɔ ngɔ nù gɛ ma fɛnga ia.”

¹⁶ Nɛ wele kɛ a dungu ngɔ gba kuti ni, a fi dugbi 'da a, nɛ a sɛlɛ kpalɛnɔ ngɔ nù nga vɛ.

¹⁷ Nɛ mbé gele anzɛ hɔ nza kɔ tɔa Tɛmpɛloe li nza i ni, nɛ nde a 'bia 'bɔ tɔ̃a nu dugbu dɛ kɔ̃ a.

¹⁸ Nɛ mbé gele anzɛ, kɛ a a wi zɔ mɔ tɛ nyɛa we ngɔ gbagala kɛ wa hã do dɔnggamɛnɔ hã Gale ni, a yula fala gbagala ni, nɛ a tɛ, nɛ a he mɔ dɛ ngɔ hã wele kɛ a do tɔ̃a nu dugbi dɛ kɔ̃ a ni na: “Wala te vinɔnɔ ngɔ nù gɛ fila ia! Kɔ mɔ fí dugbi 'da mɔ, hã mɔ ndo sɛlɛ ma.”

¹⁹ Nɛ anzɛ ni fi dugbi, nɛ a ma ngɔ sɛlɛ wala vinɔnɔ nù nga ni, nɛ a da ma dɛ kɔ mɔ kpĩlĩ do wala tenɔ, kɛ ma be nɔ̃lɔ̃ zã 'da Gale ni.

²⁰ Nɛ wa ma ngɔ mbɔtɔ wala vinɔnɔ ni dɛ kɔ mɔ kpĩlĩ do ma tɛ 'do ngba le i. Nɛ tɔkɔ hɔa kɔ nɛ, nɛ ma fo ɔ nɛ gba fua lì ni. Nɛ ma hɛ̃a gbaa, nɛ ma pɛsɛ nyɛlɛ wena we kilomɛtrɛ kama talɛ, nɛ 'da 'du nɛ mɛtrɛ kpo do dɔ nɛ.