USU MƐNƆ 13 - WE NU GALE 1995

Lɛnggɛ ngɔ osa'de bɔa

¹ 'Do ki ni, kɔ mi nɛ ka mɔ, nɛ mi zɔ sa'de kpo, a yula 'dɔ gba lì, kɔ a tɛ hɔ nza. Zu a sambo, nɛ zamba zu a 'bu, nɛ wa gu ndasa nwa ngɔ zamba zu a ni kpo kpo vɛ, nɛ wa kɔma 'dã li tɛ ozu a ni kpo kpo vɛ, we dã zu li Gale.

² Sa'de ni wia kɔ̃ do gɔ̃̀, nɛ nyanga a ɔ nɛ nyanga ursi, nɛ nu a ɔ nɛ nu gbɔgbɔ ni. Nɛ gba sɔ̃ sa'de sɔ dati ni hã ngawi 'da a, do dɛa to nwa 'da a hã mbé sa'de ni.

³ Mbe zu mbé sa'de ni kpo, ma ɔ nɛ kɛ ma kpa zɛ́ gã dani fio, nɛ ma ɛ̃a ni. Nɛ winɔ ngɔ nù gɛ vɛ̃ wa ɔngbɔ do a nɛ ge nde ni, nɛ wa ma ngɔ nɛ 'dɔkɔlɔ a.

⁴ Nɛ wa dɔnggɔ gba sɔ̃ sa'de sɔ dati ni, we kɛ a hã ngawi 'da a hã mbé wele ki ni ni. Nɛ wa dɔnggɔ 'bɔ mbé sa'de ni tɛ tɔ̃ na: “Wi wia kɔ̃ do sa'de gɛ a wio nde? Wi wia we bi bolo do a a wio nde?”

⁵ Nɛ wa hã wala hã sa'de ni na, a wele we do wali vɛ, nɛ a dã zu li Gale. A kpa ngawi we dɛ na mɛ ni gbaa, 'do zɛkɛ 'bu nɛ nalɛ ngɔ nɛ bɔa.

⁶ Nɛ a ma ngɔ dã Gale, do dã zu li le santoe kɛ Gale ɔ nɛ ni, do zu li winɔ vɛ̃ kɛ wa tɛ li nza i ni.

⁷ Nɛ wa hã 'bɔ wala hã a na, a bi bolo do owinɔ 'da Gale, nɛ a nɛ ngɔ wa. Nɛ wa hã ngawi hã a we dungu nwa ngɔ nu fɛlɛ kulanɔ, do lɛnggɛnɔ, do nu kpalanɔ, do lenɔ vɛ.

⁸ Nɛ winɔ ngɔ nù gɛ, wa dɔnggɔ sɛ sa'de ni. Winɔ ni, wi a wanɔ kɛ Gale kɔ̀mɔ̀ zɛ́ li wa kɔ 'Buku Kpasi, dati kɛ a ndua zɛ́ nyanga dɛ mɛnɔ vɛ́ ni gɔ ni. 'Buku Kpasi ni, mɛ a kɛ 'da Be Bata kɛ wa gbɛa zi a ni.

⁹ “Wi kɛ zala a boe, nɛ a zélé we gɛ do dia nɛ.

¹⁰ Wi kɛ ma we na, a la kɔlɔ 'duli, nɛ a la sɛ. Nɛ wi kɛ ma we na, wa gbɛ a do du kɔya, nɛ wa gbɛ sɛ a do du kɔya. Kɔ we duzu ki ni, ma wia na, owinɔ 'da Gale wa kunu sila wa, nɛ wa 'bana do kɔ̃a we dɛ 'da Gale.”

¹¹ Nɛ 'do ki ni, kɔ mi nɛ ka mɔ, nɛ mi zɔ 'bɔ mbe gele sa'de kpo, a yula ti nù, kɔ a tɛ hɔ nza. A do zamba zu a bɔa, ma ɔ nɛ zamba zu be bata ni, nɛ a wele we ɔ nɛ gba sɔ̃ sa'de ni.

¹² Nɛ a dɛ mɛnɔ do ngawi 'da kuti sa'de sɔ ni, nɛ a dɛa ma dɛ dati sa'de ni. Nɛ a ba nu a hã nùi do winɔ ngɔ nùi vɛ́ na, wa dɔnggɔ kuti sa'de, kɛ wa ia dani fie tɛ̃ a, nɛ ma ɛ̃a ni.

¹³ Bɔa sa'de ni dɛ ogba sɔ̃ mɔ gã wena. A dɛ, nɛ gba nyɛa we yolo li nza i, nɛ ma te dɛ li winɔ vɛ.

¹⁴ Nɛ a ɔlɔ owinɔ ngɔ nù gɛ do gba sɔ̃ mɛnɔ, kɛ wa hã wala hã a we dɛ ma dɛ li kuti sa'de sɔ ni. Nɛ a ba nu a hã winɔ na, wa dɛ hi sa'de kɛ wa dumu zi a do du kɔya na a fe, nɛ a fè gɔɛ ni, hã wa dɔnggɔ ma.

¹⁵ Nɛ wa hã 'bɔ ngawi hã bɔa sa'de na, a ufu bũ kpasi dɛ kɔ hi kuti sa'de, takɔ a wele we, nɛ a gbɛ owinɔ vɛ kɛ wa kɔ̃̀ we dɔnggɔ a gɔ ni.

¹⁶ Nɛ sa'de ni ba nu ɛ na, wa gɔnɔ dã tɛ ngawili kɔ̃ winɔ do dati wa vɛ, ogã wi do obe wi, owi kpamɔ do owi sã, ongbá do Owele le.

¹⁷ Nɛ wi kɛ wa gɔ̀nɔ̀ dã ni tɛ̃ a gɔ ni, a wè tɛ be gole, tabi oso mɔ gɔ. Dã ni zi a li sa'de ni, tabi motuya kɛ ma be li a ni.

¹⁸ Kɔ we zele gulu ki ni, ma gɔa hã zã. Wi kɛ a do hã zã boe, kɔ a fa, nɛ a wia we kpa gulu motuya li sa'de ni. Mɛ a motuya li wele, nɛ motuya ni, mɛ a kama gazɛlɛ do 'bu nɛ gazɛlɛ ngɔ nɛ gazɛlɛ.