USU MƐNƆ 12 - WE NU GALE 1995

Lɛnggɛ ngɔ wuko do gba sɔ̃ sa'de

¹ Nɛ gba sɔ̃ mɔ bia tɛ ɛ li nza i. Mɛ a wuko, a hi'da wese dɛ tɛ̃ a ɔ nɛ tulu ni, nɛ zɛkɛ dɛ ti nyanga a, nɛ wa gu ndasa nwa, ma do osɔla tɛ nɛ 'bu ngɔ nɛ bɔa zu a.

² Nɛ a do zã, nɛ a tɛ bi zɛlɛ kula.

³ Nɛ mbe gele gba sɔ̃ mɔ hɔa 'bɔ li nza i. Mɛ a gba sɔ̃ sa'de, a gã wena, tɛ̃ a fila kpangbangba, nɛ zu a sambo, nɛ zamba zu a 'bu. Nɛ a gu ndasa nwa zu a sambo ni kpo kpo vɛ.

⁴ Do sa'de ni fua kpo mbee talɛ osɔlanɔ tɛ li nza i, nɛ ma ala dɛ nù nga. Nɛ a yolo dɛ dati wuke kɛ a bi zɛlɛ kula ni, takɔ a ko, nɛ a yɔ'dɔ be do ti.

⁵ Nɛ wuke ni kua bulu be, kɛ a dungu sɛ nwa ngɔ winɔ vɛ do dɔndɔlɔ mɔ bolo kɔ̃ a ni. Kɔ be nɛa we hɔ nza, nɛ wa ba a la do a dɛ kɛ zã kpongbo nwa 'da Gale ngɔ i.

⁶ Nɛ wuke yu dɛ tɛ fala Gale 'dafa zi hã a li gba zɔ̃ i ni, we ɔ do i mɔ, takɔ wa dala a gbaa 'do tũ koto do kama bɔa do 'bu nɛ gazɛlɛ.

⁷ Nɛ bolo tia li nza i. Wi a anzɛ Mikaɛlɛ do oanzɛnɔ 'da a hã wa bi ngba wa do gba sɔ̃ sa'de ni do oanzɛnɔ 'da a.

⁸ Wa bi gbaa, nɛ gba sɔ̃ sa'de do anzɛnɔ 'da a wa tia li bole, nɛ fala do kɛ na wa 'bana 'bɔ li nza i ni bina.

⁹ Nɛ wa da wa dɛ nù nga. Gba sɔ̃ sa'de ni a ã gɔ̃ɛ zɛ́ belee, kɛ wa sa li a na Zabulu tabi Satana, nɛ a yɛnggɛ tɛ ɔlɔ winɔ ngɔ nù gɛ ni.

¹⁰ Nɛ 'do ki ni, nɛ mi zila wala gɛlɛ wele tɛ li nza i, ma wila nganda wena na: “Ngangga ni, Gale kpasa winɔ 'da a! A bia ngawi to nwa 'da a ia! Ngangga ni, Kristo kɛ Gale tumba a ni, a bia 'bɔ ngawi to nwa 'da a. We duzu kɛ wa ba wi da zi onya lɛ wi kɔ̃a wenɔ dati Gale tũ do gba wese fai ni, nɛ wa da a dɛ nù i.

¹¹ Onya lɛ wa nɛa ngɔ a, we duzu tɔkɔ tɛ Be Bata, do we nu Gale kɛ wa bia zi hã winɔ ni. Wa lènggè zi do kpasi 'da wa ngɔ nù gɛ gɔ, nɛ nde wa hã zi tɛ wa li fio we duzu we nu Gale.

¹² Kɔ we duzu ki ni, ma wia na li nza, do nɛ owinɔ kɔ nɛ vɛ́, nɛ dɛ yangga! Nɛ nde 'bako do nùi do gba lì! Mba gɔ, Satana zĩlĩ dɛ i mɔ, nɛ sila a dunu do mãlã, we kɛ a ĩ na, ngba soe 'da ɛ 'bànà gã gɔ.”

¹³ Kɔ 'da fala gba sɔ̃ sa'de nɛa we zɔ na, wa da ɛ dɛ nù nga ia ni, nɛ a ma ngɔ ndaka wuke kɛ a kua be ni.

¹⁴ Nɛ wa hã 'baka ziki bɔa hã wuke ni na, a bũlũ do nɛ gbaa dɛ fala kɛ wa 'dafa hã a li gba zɔ̃ i ni. Nɛ a ɔ dɛ di ni, nɛ wa dala a gbaa 'do sabɛlɛ talɛ do dɔ nɛ, nɛ wa zɔ mɔ tɛ a na, dɔ gba sɔ̃ sa'de dɛ́ mɔ do a gɔ.

¹⁵ Kɔ wuke ma ngɔ yu nɛ, nɛ gba sɔ̃ sa'de ɔ̃lɔ̃ gba fua lì gbɔngbɔɔ, nɛ a da ma 'dɔkɔlɔ wuke ni na, ma bindi a.

¹⁶ Nɛ nde nùi gala wuke, nɛ ma 'bã nu ɛ, nɛ ma yɔ'dɔ lì kɛ gba sɔ̃ sa'de ɔ̃lɔ̃, kɔ a da 'do wuke ni.

¹⁷ Gba sɔ̃ sa'de nɛa we zɔ ni, nɛ zã a nɔ̃lɔ̃ dɛ tɛ wuke wena. Nɛ a la, nɛ a nɛ we bi do tala obenɔ 'da wuke ni. Obenɔ ni, wi a owinɔ kɛ wa dɛ olo nu Gale, nɛ wa kɔ̃a gɛnɛ we 'da Gale, kɛ Yezu bia hã wa ni.

¹⁸ Nɛ gba sɔ̃ sa'de ni nɛa, nɛ a yolo dɛ ngɔ kɛnzɛ tɛ nu kolo gba lì ni.