USU MƐNƆ 11 - WE NU GALE 1995

Owele bɔa wa tɔ̃a gulu wenɔ 'da Gale

¹ 'Do ki ni, nɛ wa hã ka gole hã mi, ma ɔ nɛ te we do 'da du mɔ ni. Nɛ wa tɔ̃ hã mi na: “Mɔ kúlú ngɔ, kɔ mɔ wé 'da du Tɛmpɛloe, do 'da du gbagala kɛ wa hã do dɔnggamɛnɔ hã Gale ni. Nɛ mɔ tɔ́lɔ́ winɔ kɛ wa dɔnggɔ Gale kɔ tɔa ni.

² Nɛ mɔ tɛ wè 'da du li fanda kɛ 'do tɔa Gale nza nga ni gɔ. Mɔ la ma, we kɛ mi la zi ma hã ogele winɔ. Wa tɛ sɛ, nɛ wa ma le santoe gɛ do nyanga wa gbutu gbutu, gbaa 'do tũ koto do kama bɔa do 'bu nɛ gazɛlɛ.

³ Nɛ mi tombo sɛ temɔɛnɔ 'da mi bɔa, nɛ wa he'de sɛ saki, nɛ wa be we nu Gale gbaa 'do tũnɔ kote do kama bɔa do 'bu nɛ gazɛlɛ ni.”

⁴ Otemɔɛnɔ 'da Gale bɔa ni, mɛ a te olivɛ bɔa, do mwinda bɔa kɛ ma yolo dɛ dati Gale, Nwa ngɔ nùi gɛ ni.

⁵ Kɔ fala kɛ mbe wele fa we dɛ 'dã mɔ do wa nde, nɛ nyɛa we ma hɔ sɛ kɔ nu wa, nɛ ma bɛlɛ Owi sɛnɛ wa. Gbãlã we, wi kɛ a fa we dɛ 'dã mɔ do wa, nɛ wa gbɛ sɛ a na mɛ ni.

⁶ Nɛ 'da fala kɛ wa gba sɛ olo nu Gale hã winɔ ni, wa sɛ do ngawi we ba nu wa hã li nza na, dɔ kolo tɛ́ gɔ gbaa na, wa gba olo nu Gale e do'do sɛ nɛ de. Nɛ wa sɛ 'bɔ do ngawi we kifi lìnɔ do tɔkɔ, do we tombo zɛlɛ tɛ kpi do kpi hã winɔ ngɔ nù gɛ, ɔ nɛ kɛ zã wa kɔ̃a ni.

⁷ Kɔ bia wenɔ 'da wa e do'do, nɛ gba sɔ̃ sa'de a yolo sɛ kɔ gba 'du kɔ̃ɛ, nɛ a hɔ nza we bi do wa. A nganda sɛ nɛ ngɔ wa, nɛ a gbɛ sɛ wa.

⁸ Nɛ wɔlɔ wa, ma ɔ sɛ dɛ li fanda tɛ kɔ gã le kɛ wa bɛ̃lɛ̃ zi do Nwa 'da wa ngɔ finda te ni. Wa sa li gã le ni do gba we na Sodɔmɛ, tabi Ezipeto.

⁹ Nɛ owele wa yolo sɛ kɔ nu fɛlɛ kulanɔ, do lɛnggɛnɔ, do nu kpalanɔ, do kɔ lenɔ vɛ, nɛ wa tɛ we zɔ wɔlɔ wa kɛ ma ɔ dɛ nza ni, gbaa 'do tũ talɛ do dɔ nɛ. Wa bɛ̃ sɛ na, Owele wa tɛ mì wɔlɔ wa gɔ.

¹⁰ Nɛ fie 'da winɔ bɔa ni, ma de sɛ tɛ winɔ ngɔ nù gɛ wena. Wa dɛ sɛ yangga, nɛ wa hã odia mɔ hã ngba wa, we duzu kɛ owinɔ bɔa kɛ wa gba zi olo nu Gale, nɛ wa hã zi ngamɔ hã winɔ ngɔ nù gɛ wena ni, wa fia ia.

¹¹ Nɛ 'do tũi talɛ do dɔ nɛ ni, nɛ Gale ufu bũ kpasi dɛ kɔ wɔlɔ wa, nɛ wa kulu ngɔ. Nɛ kili ba zi winɔ vɛ kɛ wa zɔa wa ni wena.

¹² Nɛ Owi gba olo nu Gale bɔa ni, wa zila wala gɛlɛ wele, ma wele hã wa do li nza i nganda wena na: “Nɛ kũ dɛ i nga!” Nɛ wa kũ dɛ li nza i do sanga kutunɔ dɛ li Owi sɛnɛ wa ni vɛ.

¹³ Nɛ do 'da fala nɛ ni, nɛ nùi tana nganda wena, nɛ kpo mbee 'bu gã le ni gbini, nɛ ma gbɛa Owele koto sambo do ti. Nɛ kili ba owanɔ kɛ wa 'bana ni, nɛ wa dɔngga Gale, kɛ a li nza i ni.

¹⁴ Bɔa ngamɛ la ia, nɛ nde talɛ ngamɛ ma hɔ sɛ ngangga ni.

Sambo mɔtũlĩ

¹⁵ 'Do nɛ, nɛ sambo anzɛ dama mɔtũlĩ 'da a. Nɛ wala gɛlɛ Owele wila nganda wena tɛ li nza i na: “Dɛa to nwa ngɔ nù gɛ ma hɔa dɛ tambala kɔ̃ Gale Nwa 'da lɛ, do Kristo kɛ a tumba a ni. Gale a dungu sɛ nwa kɔ sabɛlɛ do sabɛlɛ.”

¹⁶ Nɛ okpasa winɔ 'bu wa bɔa ngɔ wa nalɛ, kɛ wa dungu ngɔ kpongbo nwa 'da wa dati Gale ni, wa gu li wa nù, nɛ wa dɔnggɔ Gale

¹⁷ tɛ tɔ̃ na: “Aa Nwa Gale, mɔ do nganda vɛ̃, mɔ zɛ́ boe, nɛ mɔ sɔɛ gɛ boe. Lɛ hã iɔ̃nae hã mɔ, we kɛ mɔ bia ngawi 'da mɔ, nɛ mɔ dungu nwa ngɔ nùi gɛ.

¹⁸ Zã ogele winɔ nɔ̃lɔ̃ zi dɛ tɛ mɔ wena, nɛ nde tũi kɛ mɔ nɛ be do nɔ̃lɔ̃ zã 'da mɔ ni, ma wia ia. Mɛ a tũi kɛ mɔ nɛ 'bili do we 'da ofionɔ. Nɛ mɛ 'bɔ a tũ si do de mɔ hã owi dɛa tonɔ 'da mɔ, kɛ wa gba olo nu mɔ ni, do winɔ 'da mɔ vɛ̃, ogã winɔ do obe winɔ kɛ wa dɔnggɔ mɔ dɔngga ni. Mɛ a tũi kɛ mɔ nɛ kumu do winɔ kɛ wa 'danga zi nùi gɛ ni.”

¹⁹ Wa wila we ni do'do, nɛ nu tɔa Tɛmpɛloe 'da Gale kɔ li nza i ni hũi, nɛ mi ka mɔ kɔ tɔa i, nɛ mi zɔ sanduki kɛ ma be gba tɔkɛ Gale gba do winɔ 'da a ni. Nɛ kolo ma ngɔ nyɛ li ɛ do o dã nganda wena, nɛ nùi tana gbirr, nɛ kolo gbãlã mũlũ ma ngɔ tɛ nganda wena.