USU MƐNƆ 10 - WE NU GALE 1995

Anzɛ hã be 'buku hã Yoanɛ

¹ 'Do nɛ, nɛ mi nɛ ka mɔ, nɛ mi zɔ 'bɔ mbé gele anzɛ kpo, a nganda wena. A yula li nza i, nɛ a zĩlĩ dɛ nù nga. Gba kutu lɔmbɔ a vɛ, nɛ ndumbe linggi zu a takpa. Nɛ bula li a to nɛ́ wese ni, nɛ nyanga a ɔ nɛ bɛlɛduma kɛ ma nyɛ do we ni.

² Nɛ a 'bia be 'buku dɛ kɔ̃ a, mɛ a hũi li nɛ. A zĩ ngawili nyanga a ngɔ gba lì, nɛ a zĩ gale nyanga a ngɔ nga nùi.

³ Nɛ a he mɔ nganda wena ɔ nɛ gbɔgbɔ ni. Kɔ ngɔ tɛ hiamɛ 'da a nɛa we gɛ̃ nɛ, nɛ ua dã kolo sambo gese nu nɛ.

⁴ Wa gisa nu nɛ do'do, nɛ mi ma ngɔ kɔmɔ wenɔ kɛ ua dã kolenɔ wa tɔ̃a ni dɛ li mbɛti. Nɛ mi zele wala gɛlɛ wele do li nza i tɛ tɔ̃ hã mi na: “Mɔ tɛ kɔ̀mɔ̀ wenɔ kɛ ua dã kolenɔ sambo wa tɔ̃a ni gɔ, kɔ mɔ úsú dɛ kɔ sila mɔ, dɔ wele zélé gɔ.”

⁵ 'Do nɛ, nɛ anzɛ kɛ mi zɔa sɔ a tɛ yolo ngɔ gba lì do ngɔ nga nùi ni, a ɛfɛ ngawili kɔ̃ a dɛ li nza i,

⁶ nɛ a kana tɛ̃ a do zu li Gale kɛ a fai boe, nɛ a dɛa li nza, do nùi, do gba lìnɔ, do mɛnɔ falanɔ vɛ̃ ni. Nɛ anzɛ ni tɔ̃ na: “Ngba soe wia ia, mbé mɔ 'bɔ 'bɔa bina!

⁷ 'Da fala kɛ sambo anzɛ a dama sɛ mɔtũlĩ ni, nɛ Gale a dɛ sɛ usu linggamɛ 'da a ɔ nɛ kɛ a mbisa zɛ́ do owi gba do nu a, wi dɛa tonɔ 'da a ni.”

⁸ Nɛ 'do ki ni, nɛ mi zila 'bɔ wala gɛlɛ wi kɛ mi zila sɔ ma li nza i ni tɛ tɔ̃ hã mi na: “Mɔ nɛ́, kɔ mɔ bá be 'bulu kɛ li ma hũ hũi ni kɔ̃ anzɛ, kɛ a yolo ngɔ gba lì do ngɔ nga nùi ni.”

⁹ Nɛ mi nɛa 'da anzɛ ni, nɛ mi tɔ̃ hã a na, a hã be 'buki ni hã mi. Nɛ a tɔ̃ hã mi na: “Mɔ bá, kɔ mɔ nyɔ́ngɔ́ ma. Ma ɛ̃fɛ̃ sɛ nu mɔ ɔ nɛ nɔ gɔlɔ ni, kɔ mɔ gulu, nɛ ma sɛ a fã kɔ zã mɔ i.”

¹⁰ Nɛ mi ba be 'buki kɔ̃ a, nɛ mi fi nu mi, nɛ mi nyɔngɔ, nɛ ma ɛ̃ ɛ̃fɛ̃ nu mi wena. Nɛ mi gulu ma, nɛ ma fanga kɔ zã mi kɛrr.

¹¹ Nɛ wa tɔ̃ hã mi na: “Ma wia na, mɔ gba 'bɔ do nu Gale, nɛ mɔ tɔ̃ wenɔ ngɔ odɛlɛ nu fɛlɛ kulanɔ, do nu kpalanɔ, do lɛnggɛnɔ, do onwanɔ hã winɔ.”