USU MƐNƆ 1 - WE NU GALE 1995

¹ 'Buki gɛ, ma tɔ̃ lɛnggɛ ngɔ usu mɛnɔ kɛ Yezu Kristo bia hã Owi dɛa tonɔ 'da a, takɔ wa ĩ ti mɛnɔ kɛ ma hɔ sɛ ngangga gɛ ni. Gale bia ma hã Kristo dati, nɛ Kristo tumba anzɛ 'da a we be ma hã mi Yoanɛ, wi dɛa toe 'da a.

² Ma kɛ mi tɔ̃ lɛnggɛ mɛnɔ vɛ̃ mi zɔa ma ni. Mɛnɔ ni a we nu Gale, nɛ Yezu Kristo tɔ̃a gulu nɛ hã lɛ.

³ Wi kɛ a tɔlɔ wenɔ gɛ hã winɔ ni, a a wi yangga. Nɛ wanɔ kɛ wa zele ma, nɛ wa dɛ mbula nɛ ni, wa 'bɔ a wi yangga. Mba gɔ, ngba soe kɛ mɛnɔ ni ma nɛ hɔ nɛ ni kɔla ia.

Balɛ hã oeklezianɔ kɔ ole sambo

⁴ Mi Yoanɛ, mi tombo balɛ hã nɛ oeklezianɔ tɛ kɔ de sambo ngɔ nù Azi. E kɔ Gale kɛ a zɛ́ boe, nɛ a sɔɛ gɛ boe, nɛ a tɛ sɛ ni, a be dia zã hã nɛ, nɛ a dɛ na, nɛ ɔ do gɛa sila. E kɔ ohi winɔ sambo, kɛ wa yolo dati kpongbo nwa 'da Gale ni, wa be 'bɔ dia zã, nɛ wa hã gɛ̃a dungu hã nɛ.

⁵ Nɛ e kɔ Yezu Kristo, kɛ a tɔ̃ gulu we 'da Gale do gbãlã we, nɛ a a wi dati we tunu kɔ fio, nɛ a a Nwa ngɔ onwanɔ nù gɛ vɛ̃ ni, a be 'bɔ dia zã, nɛ a hã gɛ̃a dungu hã nɛ. Yezu Kristo kɔ̃a gɛnɛ lɛ, nɛ a fia we duzu lɛ, nɛ tɔkɔ tɛ a fua ku'da 'dã mɛnɔ zu lɛ.

⁶ Nɛ a ia lɛ do onganga kɔ le nwa 'da Baa a Gale, we dɛ to hã a. E kɔ Kristo ɔ do dɔ̃lɔ̃ li, do ngawi kɔ sabɛlɛ do sabɛlɛ! Amɛ.

⁷ Nɛ ĩ́ na, a a sanga kutunɔ tɛ tɛ nɛ, nɛ winɔ vɛ wa zɔ sɛ a. Gɛnɛ kɔ wanɔ kɛ wa dumu zi gbãlã ngu'du a ni, wa zɔ sɛ 'bɔ a. Nɛ owinɔ ngɔ nù gɛ vɛ, wa he sɛ kɔ̃a we a. Ma ɔ sɛ na mɛ ni! Amɛ.

⁸ Nwa Gale kɛ a do nganda vɛ, kɛ a zɛ́ boe, nɛ a sɔɛ gɛ boe, nɛ a tɛ sɛ ni, a tɔ̃a na: “Mi a Alfa do Omega.” Gulu nɛ na: “Ndo nyanga mɛnɔ vɛ̃ wi a mi, nɛ sɔkpɔ mɛnɔ vɛ 'bɔ a mi.”

Kristo bia tɛ̃ ɛ hã Yoanɛ kɔ yalɛ

⁹ Wi a mi nya nɛ Yoanɛ, kɛ lɛ mba do nɛ kpo dɛ kɔ Yezu ni. Lɛ tɛ kpa zɛlɛ tɛ do nɛ, nɛ lɛ tɛ kunu sila lɛ, nɛ lɛ do nɛ a wele le nwa 'da Gale. Wa ba zi mi do bɔlɔkɔ, nɛ wa tumba mi dɛ kɔ ngolo lì Patmosi, we kɛ mi bia we nu Gale, kɛ Yezu Kristo tɔ̃a gulu nɛ hã lɛ ni.

¹⁰ 'Da fala mi zi i mɔ ni, nɛ mbe ngba soe ɛngga kpo, nɛ ngawi 'da Hi Wi Santo lia kɔ mi, nɛ mi zele wala gɛlɛ wele do 'do mi, ma wele nganda wena ɔ nɛ giti mɔtũlũ ni

¹¹ tɛ tɔ̃ hã mi na: “Mɔ kɔ́mɔ́ mɛnɔ mɔ zɔ gɛ do mbɛti, nɛ mɔ tómbó ma hã oeklezianɔ kɔ lenɔ sambo gɛ: Efɛzɛ, Smirnɛ, Pɛrgamɛ, Tiatirɛ, Sardɛ, Filadɛlfi do Laodise.”

¹² Nɛ mi siki tɛ mi we zɔ wi wele we hã mi ni, nɛ mi zɔa omɔ a do mwindanɔ sambo, wa dɛa ma do mɔ mbali ni.

¹³ Nɛ dɛ gbogbo omɔ a do mwindanɔ ni, mi zɔa mɔ ɔ nɛ wele ni, nɛ nde a hi'da gba du tulu, ma zĩlĩ gbaa dɛ ngɔ nyanga a, nɛ a ɛnzɛ ngu'du a do 'dɛ mɔ mbali.

¹⁴ Mili zu a fɛnga nde nde ɔ nɛ tukia ni, nɛ gbali a nyɛ nɛ́ we ni.

¹⁵ Nɛ nyanga a ndele kpala kpala ɔ nɛ tũ mɔ bolo, kɛ wa fĩ li we gbaa, nɛ 'dɔlɔ nɛ hɔa kɔ nɛ ni. Nɛ wala gɛlɛ a dɔ̃lɔ̃ wuu ɔ nɛ sulu lì ni.

¹⁶ Nɛ a 'bia osɔla sambo do ngawili kɔ̃ a, nɛ du kɔya kɛ nu nɛ bɔa ni dɛ nu a. Nɛ bula li a to ɔ nɛ wese kɛ ma hɔa gbogbo zu wi ni.

¹⁷ Kɔ mi nɛa we zɔ a, nɛ mi te dɛ ti a ɔ nɛ fio ni. Nɛ a e ngawili kɔ̃ a ngɔ mi, nɛ a tɔ̃ hã mi na: “Mɔ tɛ dɛ̀ kili gɔ! Mi a mi ndua mɛnɔ vɛ, nɛ mi a mi sɔkpɔ sɛ 'bɔ ma vɛ.

¹⁸ Mi do kpasi! Mi fia zi, kɔ ngangga ni, mi do kpasi kɔ sabɛlɛ do sabɛlɛ. Mi do ngawi ngɔ fio, do ngɔ le 'da ofionɔ.

¹⁹ Kɔ mɔ kɔ́mɔ́ mɛnɔ mɔ zɔa ni, do kɛnɔ ma tɛ la nɛ ngangga ni, do kɛnɔ ma hɔ sɛ ni.

²⁰ Mi nɛ be gulu usu we ngɔ osɔlanɔ sambo, kɛ mi 'bia do ngawili kɔ̃ mi gɛ, do omɔ a do mwindanɔ sambo gɛ hã mɔ. Sɔlanɔ sambo gɛ, ma be oanzɛnɔ kɛ wa zɔ mɔ tɛ oeklezianɔ kɔ lenɔ sambo ni. Nɛ omɔ a do mwindanɔ sambo gɛ, ma be oeklezianɔ sambo ni.”