Zumanɔ 99 - WE NU GALE 1995

Gale a nwa kɛ a santo

¹ Gale 'da lɛ a nwa, a ia kpongbo nwa 'da a ngɔ okerubinɛ. We duzu ma, owinɔ wa tana kili, nɛ nùi ma yaka.

² Gale a gã wi tɛ kɔ le Sioni, a a nwa ngɔ onu kɔnggɔnɔ vɛ̃.

³ Wele vɛ̃ wa dɔnggɔ zu li a, kɛ ma gã wena, nɛ ma hã kili hã winɔ ni. Gbãlã we, a a santo!

⁴ Aa mɔ nwa kɛ mɔ do nganda vɛ̃, mɔ kɔ̃a mɔ kɛ ma ɔ bɔlɔ ni. Mɔ a mɔ 'dafa mɛnɔ ngɔ nù Israɛlɛ, nɛ mɔ a mɔ ia gbãlã we do bɔlɔ zu ngɔ nùi ni.

⁵ Lɛ dɔ́nggɔ́ NWA Gale 'da lɛ, lɛ gú nù dati kpongbo nwa 'da a. Gbãlã we, nwa a santo!

⁶ Mɔizɛ do Aroni, wa zi a onganganɔ 'da NWA, nɛ Samuɛlɛ zi a wi sambala a we winɔ. Owinɔ ni wa sa zi mɔ hã a, nɛ a kɔ́ nu wa.

⁷ A wele zi we hã wa kɔ lɔnggɔ zɛ̃ we, nɛ wa dɛ zi mbulanɔ a hã hã wa ni.

⁸ Aa NWA Gale 'da lɛ, mɔ gisa zi nu we hã owinɔ 'da mɔ, nɛ mɔ bia hã wa na, mɔ a Gale du sila, nɛ mɔ hã zi etumbu hã wa olo 'dã mɛnɔ 'da wa.

⁹ Lɛ dɔ́nggɔ́ NWA Gale 'da lɛ, lɛ gú nù, nɛ lɛ siki li lɛ si 'biti kala 'da a kɛ ma santo. Gbãlã we, NWA Gale 'da lɛ a santo!