Zumanɔ 96 - WE NU GALE 1995

Gale a nwa ngɔ owinɔ vɛ̃

¹ Aa nɛ, owinɔ nyanga nza gɛ vɛ̃, nɛ gá mbé zuma hã nwa, nɛ gá zuma we dɔnggɔ do a.

² Nɛ dɔnggɔ zu li nwa do zuma. Nɛ sámbálá a tũ kpo kpo, nɛ nɛ tɔ̃́ dɛ nza na, a a wi kpasa wi.

³ Nɛ bé dɔ̃lɔ̃ li 'da a sanga onu kɔnggɔ winɔ, nɛ nɛ tɔ̃́ sako ɔngbamɛnɔ a dɛa ni hã owinɔ vɛ̃.

⁴ NWA a gã wi, ma wia na lɛ dɔnggɔ a. Ma wia na owinɔ wa yu kili a, a nɛa ngɔ ogele galenɔ vɛ̃.

⁵ Ogalenɔ 'da ogele winɔ, wa vɛ̃ a mɔ yala iko. Nɛ nde NWA dɛa li nza.

⁶ Dɔ̃lɔ̃ li 'da a do gã wi 'da a yele kɛ zã a ngbaa, nɛ ngawi do dia wi 'da a dunu Tɛmpɛloe 'da a ngurr.

⁷ Aa nɛ, owinɔ ngɔ nù gɛ vɛ̃, nɛ dɔnggɔ NWA, nɛ nɛ tɔ̃ sako dɔ̃lɔ̃ li, do ngawi 'da a.

⁸ Nɛ tɛ́ hã nɛ sambala dɔ̃lɔ̃ li 'da a. Nɛ kálá dɔnggamɛnɔ 'da nɛ, nɛ nɛ le do ma kɔ Tɛmpɛloe 'da a.

⁹ Fala kɛ nɛ hɔ dati NWA kɛ a santo ni, nɛ nɛ bílí zu nɛ gbaa nɛ ma to nù. Nɛ, owinɔ ngɔ nù gɛ vɛ̃, nɛ táná kili dati a.

¹⁰ Nɛ tɔ̃ hã winɔ vɛ̃ na: “NWA a gã wi ngɔ mɛnɔ vɛ̃. Nùi ma yula nganda, nɛ ma yáká gɔ. NWA a 'bili sɛ ngbangga 'da owinɔ do bɔlɔ nɛ.”

¹¹ E kɔ li nza do nùi wa dɛ yangga. E kɔ gba lì do omɛnɔ vɛ̃ ti lì gɛ, wa he mɔ do yangga.

¹² E kɔ ofɔnɔ do Okpalɛnɔ vɛ̃ wa te salangga. Nɛ te zamɛnɔ vɛ̃ wa zɛ kaliã dati NWA,

¹³ kɛ a tɛ sɛ we dungu nwa ngɔ nù gɛ ni. A dɛ sɛ to nwa 'da a do bɔlɔ nɛ, nɛ a 'bili sɛ ngbangga 'da owinɔ do gbãlã we.