Zumanɔ 95 - WE NU GALE 1995

Zuma dɔnggɔ do Gale

¹ Aa nɛ, nɛ tɛ́ hã lɛ sambala NWA, wi kpasa lɛ. Lɛ gá zuma yangga hã Gale, wi amba zu lɛ.

² Lɛ nɛ́ dati a, nɛ lɛ tɔ̃ iɔ̃nae hã a, nɛ lɛ dɔnggɔ a do zuma yangga.

³ Mba gɔ, NWA a Gale kɛ a gã wena, a a gã nwa ngɔ ogalenɔ vɛ̃.

⁴ Mɛnɔ vɛ̃ ngɔ nù gɛ, yolo do go'do 'du gbangɔlɔ̃nɔ we hɔ zu ongala kalanɔ, ma ɔ ti mbula 'da a.

⁵ A a wele gba lì do nùi, we kɛ a dɛa ma do tɛ̃ a.

⁶ Aa nɛ, nɛ lé hã lɛ bílí zu lɛ nu dati NWA. Lɛ gú gba zugolo dati NWA kɛ a dɛa lɛ ni.

⁷ Mba gɔ, a a Gale 'da lɛ, nɛ lɛ a owinɔ 'da a, nɛ a a wi zɔ mɔ tɛ lɛ. Sɔɛ gɛ, nɛ zélé gɛlɛ a tɛ tɔ̃ na:

⁸ “Nɛ tɛ dɛ̃ nga zu ɔ nɛ kɛ oyaa nɛ wa dɛa zi ma, 'da fala kɛ wa tɛ li gba zɔ̃ Masa do Mɛriba ni gɔ.

⁹ Wa bɛ̃a zi we nu mi, nɛ wa yamba sila mi. Mɛ ni, nɛ nde wa zɔa mɛnɔ mi dɛa we wa ni vɛ̃.

¹⁰ Wa 'danga sila mi gbaa 'do 'bu sabɛlɛ nalɛ, nɛ mi tɔ̃ na: ‘Kɛnɔ gɛ a Owi vĩ zu iko, wa kɔ̃̀ we dɛ mbulanɔ 'da mi gɔ.’

¹¹ “Nɛ zã mi nɔ̃lã, nɛ mi zonggo tɛ mi na: ‘Wa lé sɛ ngɔ nùi kɛ mi 'dafa hã wa na, wa ɔmɔ tɛ wa ngɔ nɛ ni gɔ.’ ”