Zumanɔ 94 - WE NU GALE 1995

¹ Aa nwa, mɔ a Gale bili nu gbã. Mɔ bílí nu gbã olo 'dã mɛnɔ, hã winɔ wa zɔ.

² Mɔ kúlú ngɔ hã mɔ 'bílí ngbangganɔ ngɔ nù gɛ. Mɔ bílí nu gbã 'dã mɛ 'da owi gã zunɔ hã wa.

³ Aa NWA, o'dã winɔ wa nɛ dɛ yangga fai nde? Wa nɛ dɛ yangga gbaa soe ki nge nde?

⁴ Owi dɛ 'dã mɛnɔ wa wele 'dã we, nɛ wa dɔnggɔ tɛ wa ngɔ 'dã mɛnɔ 'da wa.

⁵ Wa zɛlɛ tɛ owinɔ 'da mɔ NWA, nɛ wa hã ngamɔ hã wa.

⁶ Wa 'bili gɛlɛ wi fio wilinɔ do ogɛnɛnɔ, nɛ wa gbɛ obe gulanɔ.

⁷ Nɛ wa tɔ̃ na: “NWA zɔ̃ mɛ lɛ dɛ gɛ gɔ. Gale 'da Yakɔbɔ ĩ́ ma gɔ.”

⁸ Aa nɛ, oyɔndɔ winɔ, li nɛ sɔ̃́. Nɛ, owi bi gbãlã zãnɔ, gbãlã zã nɛ nɛ siki soe ki nge nde?

⁹ NWA dɛa zala wele, nɛ nɛ lengge na a wè tɛ zele we gɔ nde? A a dɛa gbali wele, nɛ a wè tɛ zɔ mɔ gɔ nde?

¹⁰ A kɛ a kɔ'dɔ ogele winɔ ni, a wè do hã etumbu hã nɛ gɔ nde? A kɛ a be mɔ hã owinɔ vɛ̃ ni, a do hã zã bina nde?

¹¹ NWA ĩ ti linggamɔ zu winɔ, nɛ ma ɔ li a yala iko.

¹² Aa NWA, wi kɛ mɔ be mɔ hã a, nɛ mɔ bɔlɔ a do mbula 'da mɔ ni, a a wi yangga.

¹³ Do ngba soe ngamɔ, nɛ mɔ hã gɛ̃a dungu hã a, gbaa na o'dã winɔ wa te li bili do'do sɛ nɛ de.

¹⁴ Mba gɔ, mɔ NWA, mɔ lá fala owinɔ 'da mɔ gɔ, nɛ mɔ bɛ gɛnɛ wa gɔ.

¹⁵ Wa 'bili sɛ 'bɔ ngbangganɔ do bɔlɔ nɛ, nɛ odia winɔ wa kɔ̃ sɛ gɛnɛ nɛ.

¹⁶ Aa nɛ gɛ, wi kɛ a nɛ yolo 'do mi, we tɔ̃ ngbangga dɛ zu o'dã winɔ gɛ a wio nde?

¹⁷ Ɔ do kɛ NWA yòlò sɔ 'do mi gɔ, nɛ nu mi ma sanga sɔ ngbɛ ɛ, nɛ mi la sɔ dɛ kɔ le 'da ofionɔ i.

¹⁸ Fala kɛ mi he mɔ na: “Mi nɛ ti tia!”, nɛ mɔ NWA, mɔ yolo gba sala 'do mi do kɔ̃a zã 'da mɔ.

¹⁹ 'Da fala kɛ linggamɔ do 'bako dunu kɔ sila mi, nɛ mɔ nganda sila mi, nɛ mɔ hã yangga hã mi.

²⁰ NWA, mi ĩ na, o'dã wi 'bili wenɔ, kɛ wa dɛ 'dã mɔ olo li dɛ mbula ni, fo we mɔ mɔ tɛ wa bina.

²¹ Wa dãlã dɛ tɛ ode winɔ, nɛ wa fi wi dia gulu we li ngbangga.

²² Nɛ nde NWA Gale 'da mi, mɔ a gba ngbo amba bolo zu mi, mɔ a kpangba ta kele zu mi.

²³ Mɔ dɛ sɛ na, 'dã mɛ 'da wa te dɛ zu wa, nɛ mɔ gbɛ sɛ wa do kpo 'dã mɛnɔ wa dɛ ni. Mɔ NWA Gale 'da lɛ, mɔ kumu sɛ wa vɛ̃.