Zumanɔ 92 - WE NU GALE 1995

Zuma dɔnggɔ do NWA

¹ Zuma we ga do kɔ̃ tũ ɔmɔ tɛ wi.

² Aa NWA Gale kɛ mɔ nɛa ngɔ mɔ vɛ̃ ni, ma dia fɛ̃ na, lɛ hã iɔ̃nae hã mɔ, nɛ lɛ ga zuma we dɔnggɔ zu li mɔ.

³ Titole kpo kpo, nɛ lɛ sa mbula kɔ̃a zã 'da mɔ, nɛ do tũi, nɛ lɛ tɔ̃ hã winɔ na, mɔ a wi kɛ mɔ dɛ olo nu mɔ fai.

⁴ Lɛ kala gã kundu do be kundu, nɛ lɛ zɛ do zuma hã mɔ.

⁵ Aa NWA, mɛnɔ mɔ dɛa ni, ma hã yangga hã mi wena, mi zɛ kaliã, nɛ mi ga zuma yangga we duzu ma.

⁶ NWA, mɛnɔ mɔ dɛa ni, mɛ a gba mɔ, nɛ linggamɔ zu mɔ ma 'du wena.

⁷ Yɔndɔ wi wè we ĩ ma gɔ, nɛ wi bi gbãlã zã ĩ́ gulu nɛ gɔ.

⁸ Mɔ zɔ́ o'dã winɔ wa kpasa de wena, wa gã dɔ̃ dɔ̃ ɔ nɛ 'dã wɔkɔsɔ ni, nɛ nde do Sɔkpɔ nɛ, wa kumu sɛ vɛ̃.

⁹ Nɛ mɔ NWA Gale, mɔ a nwa ngɔ mɛnɔ vɛ̃ kɔ sabɛlɛ do sabɛlɛ.

¹⁰ Lɛ ĩ na, owi sɛnɛ mɔ NWA, wa fe sɛ, nɛ owinɔ vɛ̃ kɛ wa dɛ 'dã mɛnɔ ni, wa pɛsɛ sɛ.

¹¹ Mɔ dɛa na, mi nganda ɔ nɛ wili yele ni, nɛ mɔ wila nu mɔ tɛ mi do yangga.

¹² Mi zila hiamɔ gɛlɛ o'dã winɔ kɔ ngamɔ, nɛ mi zɔa owi sɛnɛ mi tɛ te li bolo.

¹³ Nɛ nde ode winɔ wa kpasa de wena ɔ nɛ 'bete ni, wa dɛndɛlɛ ɔ nɛ te sɛdrɛ ngɔ nù Libanɛ ni.

¹⁴ Wa ɔ nɛ te kɛ wa mi ma kɛ zã tɔa Tɛmpɛloe, tɛ kɔ ngbo 'da mɔ NWA Gale, nɛ ma gã, nɛ ma 'bɔ de wena ni.

¹⁵ Gɛnɛ kɔ ma dɛ gbɛlɛ, nɛ nde ma kóló gɔ, nɛ ma 'bana do ngawi, tɛ ko wala te fai.

¹⁶ Ki ni ma be na, NWA mɔ a wi bɔlɔ zu, mɔ dɛ́ yɔa ti dɛa mɔ gɔ, mɔ a kpangba ta kele zu mi.