Zumanɔ 91 - WE NU GALE 1995

Gale a wi zɔ mɔ tɛ lɛ

¹ Wi kɛ a usu tɛ̃ a ti kɔ̃ nwa, nɛ a kele tɛ̃ a do NWA Gale, kɛ a nɛa ngɔ mɔ vɛ̃, nɛ a do nganda vɛ̃ ni,

² a wia we tɔ̃ na: “NWA, mɔ a gba ngbo kɛ mi usu tɛ mi kɔ nɛ, mɔ a Gale 'da mi, mi gbini zã mi do mɔ.”

³ NWA kpasa sɛ mɔ kɔ zɛlɛ fio, a kpasa sɛ 'bɔ mɔ li bilinɔ wa ndɔ hã mɔ ni.

⁴ A zɔ sɛ mɔ tɛ mɔ, nɛ a usu sɛ mɔ ti sala 'baka a. Gale a wi kɛ a dɛ olo nu a fai, a kele sɛ zu mɔ ɔ nɛ ngele ni.

⁵ Mɔ dɛ́ sɛ kili ngamɛnɔ ma kpa wele do tũ ni gɔ, nɛ mɔ yú sɛ 'bɔ kili kpili, kɛ wa da do gba wese ni gɔ.

⁶ Kili 'dã zɛlɛ kɛ ma yɛnggɛ do ti tũ nɛ, do kili ngamɛ kɛ ma gbɛ wele do gbo gba wese ni, ma bá sɛ mɔ gɔ.

⁷ Gɛnɛ kɔ ngamɛnɔ ni gbɛ wele koto kpo, tabi ma gbɛ wele koto 'bu dɛ kɛ zã mɔ, nɛ nde mɔ kpo dɛ́ sɛ mɔ gɔ.

⁸ Mɔ ká mɔ, nɛ mɔ zɔ sɛ ngamɛ kɛ Gale bili do nu gbã hã o'dã winɔ ni.

⁹ Gbãlã we, Gale kɛ a nɛa ngɔ mɔ vɛ̃, a a wi kele zu mɔ, a a ta kɛ mɔ usu tɛ mɔ kɔ nɛ,

¹⁰ nɛ nde mɔ 'bako dɛ́ sɛ mɔ gɔ, nɛ ngamɔ kpo kɔ́lɔ́ sɛ do mɔ gɔ.

¹¹ Mba gɔ, Gale a a sɛ oanzɛnɔ 'da a na, wa zɔ́ mɔ tɛ mɔ kɔ yalinɔ 'da mɔ vɛ̃.

¹² Wa ba sɛ mɔ dɛ kɔ wa na, dɔ mɔ kɔ́ zu nyanga mɔ do ta gɔ.

¹³ Mɔ ma sɛ odã sa'de do ogɔ̃ ti nyanga mɔ, nɛ mɔ yɛnggɛ sɛ do ngɔ wa, nɛ nde mɔ kpo dɛ́ sɛ mɔ gɔ.

¹⁴ Gale na: “Mi kpasa sɛ a, we kɛ a nda'ba tɛ̃ a do mi, mi zɔ sɛ mɔ tɛ̃ a, we kɛ a ĩ ti mi de wena.

¹⁵ Fala kɛ a sa mɔ hã mi na, mi gbaka ɛ, nɛ mi kɔ̃ sɛ nu a, nɛ mi gbaka a. Mi dungu sɛ dɛ kɛ zã a do fala kɛ a kɔ 'bako ni, nɛ mi kpasa sɛ a, nɛ mi hã dɔ̃lɔ̃ li hã a.

¹⁶ Mi dɛ sɛ na, tũ kɔ̃ a dɛlɛ ngɔ nù gɛ, nɛ a dɛ sɛ yangga kpasi mi hã hã a ni.”