Zumanɔ 90 - WE NU GALE 1995

NALƐ 'BUKU ZUMANƆ (Zumanɔ 90—106) Wele fe 'da kala gɔ

1 Sambala da Mɔizɛ, wi 'da Gale

¹ Sambala da Mɔizɛ, wi 'da Gale Aa Nwa, mɔ a wi kele zu lɛ kɔ sabɛlɛ do sabɛlɛ.

² Dati kɛ na mɔ dɛ okalanɔ, do nùi, do nyanga nza vɛ̃ ni, nɛ nde mɔ zi fai a Gale, nɛ mɔ 'bana sɛ Gale 'da fala fai.

³ Mɔ tɔ̃ hã wele na, a kpolo tɛ̃ a dɛ tɛ nù, we kɛ a yula tɛ nù, nɛ a kifi nù.

⁴ Sabɛlɛ koto kpo ma dùlù li mɔ gɔ, ma la ɔ nɛ tũ kpo iko ni, ma la dɔ̃ ɔ nɛ sa kpo ni.

⁵ Mɔ dɛa na, kpasi 'da wele, ma Sɔkpɔ dɔ̃ ɔ nɛ yala titole ni, ma la 'da kala gɔ ɔ nɛ wɔkɔsɔ

⁶ kɛ ma gã do titole, nɛ ma do, nɛ do gɛ̃a wese, nɛ ma fe, nɛ ma kolo ni.

⁷ Nɔ̃lɔ̃ zã 'da mɔ ma hã gba kifi hã lɛ, dã 'da mɔ ma kumu lɛ.

⁸ Mɔ ia 'dã mɛnɔ 'da lɛ dɛ dati mɔ, nɛ mɔ kpo ùsù tɛ̃ ɛ li mɔ gɔ.

⁹ Nɔ̃lɔ̃ zã 'da mɔ dɛ na, dungu nza 'da lɛ ma dɛ dɔ, nɛ ma la 'da kala gɔ ɔ nɛ bũ ni.

¹⁰ Lɛ wia we ɔ 'bu sabɛlɛ sambo, nɛ winɔ wa nganda wena ni, wa ɔ 'bu sabɛlɛ ngbɛ'dɛ'dɛ. Nɛ nde kɔ sabɛlɛnɔ ni, lɛ kpa tati a ngamɔ do 'bako iko. Dungu nza 'da wele ma la dɔ̃ dɔ̃, nɛ ma e fala kpo.

¹¹ Wi ĩ ti ngawi nɔ̃lɔ̃ zã 'da mɔ a wio nde? Wi kɛ a dɛ kili mɔ wena, takɔ a yu dã 'da mɔ a wio nde?

¹² Mɔ bé hã lɛ na, dungu nza 'da lɛ dùlù gɔ, kɔ lɛ ĩ ni, nɛ lɛ kpa sɛ hã zã.

¹³ Aa Nwa, zã mɔ nɛ nɔ̃lɔ̃ dɛ tɛ lɛ fai nde? Mɔ kpóló tɛ mɔ dɛ 'da lɛ, mɔ ĩ 'bako hã lɛ Owi dɛa tonɔ 'da mɔ.

¹⁴ Mɔ bé kɔ̃a zã 'da mɔ hã lɛ tũ kpo kpo, nɛ lɛ ga sɛ zuma yangga kɔ dungu nza 'da lɛ vɛ̃.

¹⁵ Mɔ hã zi sape hã lɛ 'do nɛ nyɛlɛ wena. Kɔ ngangga gɛ, mɔ hã́ yangga hã lɛ, nɛ 'do nɛ nyɛlɛ tɛ 'bɔ we kɔ̃ do sabɛlɛ 'bakonɔ lɛ kpa zi ni.

¹⁶ E kɔ lɛ owi dɛa tonɔ 'da mɔ, lɛ zɔ gba mɛnɔ mɔ dɛ ma ni, nɛ obe zã lɛ wa ĩ ti dɔ̃lɔ̃ li 'da mɔ.

¹⁷ Aa NWA Gale 'da lɛ, mɔ bé dia zã 'da mɔ hã lɛ, mɔ dɛ́ na mɔ olo tonɔ 'da lɛ ma 'bana fai, ĩi, mɔ dɛ́ na ma 'bana fai.