Zumanɔ 9 - WE NU GALE 1995

NWA a kpasa sɛ Owi 'bakonɔ

¹ Zuma 'da Davidi

² Mi kɔ̃a we dɔnggɔ mɔ NWA do sila mi vɛ̃, nɛ mi tɔ̃ lɛnggɛ ɔngbamɛnɔ mɔ dɛa ni.

³ Aa NWA Gale, mɔ nɛa ngɔ mɛnɔ vɛ̃. Mi kɔ̃a we ga zuma do li mɔ, nɛ mi yɔ yɔla do yangga.

⁴ Owi sɛnɛ mi wa zɔa mɔ, nɛ wa kpolo tɛ wa do yu, nɛ wa tia, nɛ wa fe.

⁵ Mɔ a wi gɔnɔ we do bɔlɔ nɛ. Mɔ dungu nù ngɔ kpongbo nwa 'da mɔ, nɛ mɔ gɔnɔ dia we hã mi.

⁶ Mɔ ua dã zu ogele winɔ, nɛ mɔ kumu owinɔ wa bɛ̃a we dɛ olo nu mɔ ni, nɛ mɔ mbiti li wa ngɔ nù gɛ fai.

⁷ Mɔ mbiti Owi sɛnɛ lɛ, nɛ wa hɔa mɔ yala. Mɔ 'danga olenɔ 'da wa, nɛ ta zu wele ila ngɔ wa fai.

⁸ Nɛ nde Gale, mɔ a nwa 'da fala fai. Mɔ dungu nù ngɔ kpongbo nwa 'da mɔ, we gɔnɔ ngbangga 'da owinɔ.

⁹ Mɔ dɛ to nwa 'da mɔ do bɔlɔ nɛ, nɛ mɔ 'bili ngbangga 'da owinɔ do dia nɛ.

¹⁰ Aa NWA, mɔ ɔ nɛ gba ngbo ni, mɔ amba zu owinɔ do 'da fala ngamɔ, nɛ mɔ amba 'bɔ zu wi kɛ wa zɛlɛ tɛ̃ a ni.

¹¹ Owinɔ kɛ wa ĩ ti mɔ ĩ ni, wa gbini zã wa do mɔ. Mba gɔ, wele siki li a dɛ 'da mɔ NWA, nɛ nde mɔ bí gɛnɛ a gɔ.

¹² Nɛ gá zuma hã NWA, kɛ kpongbo nwa 'da a tɛ kɔ le Sioni ni. Nɛ nɛ tɔ̃ lɛnggɛ gba mɛnɔ a dɛa ni, hã nu kɔnggɔnɔ vɛ̃ wa zele ma.

¹³ NWA bili nu gbã hã Owi dɛ 'dã mɛnɔ, nɛ a ĩ 'bako hã winɔ kɛ wa zɛlɛ tɛ wa ni. Ta zu a élé ngɔ hiamɔ olo gɛlɛ wi 'bakonɔ gɔ.

¹⁴ Aa NWA, mɔ ĩ́ 'bako hã mi. Mɔ a wi kɛ mɔ kpasa mi kɔ fio, mɔ zɔ́ zɛlɛ tɛ kɛ Owi sɛnɛ mi, wa hã ma hã mi gɛ hã mɔ kpásá mi ti kɔ̃ wa.

¹⁵ Nɛ mi tɔ̃ sɛ gulu kɛ mi dɔnggɔ mɔ ni tɛ sanga Owi Sioni, nɛ mi dungu sɛ do yangga, we duzu kɛ mɔ kpasa mi ni.

¹⁶ Ogele winɔ wa gu zi kɔ̃, nɛ wa wele nɛ wa tia kɔ̃ɛ wa gu ma ni. Wa kpua gbanda do usu nɛ, nɛ wa wele nɛ wa fi tɛ wa li nɛ.

¹⁷ NWA bia tɛlɛ tɛ̃ ɛ hã wa, nɛ a 'bili we do bɔlɔ nɛ. Nɛ owinɔ kɛ wa bɛ̃a we dɛ olo nu a ni, wa tia li bilinɔ kɛ wa ndɔa ma ni.

¹⁸ Owinɔ kɛ wa bɛ̃a we dɛ olo nu Gale, do ogele winɔ vɛ̃, kɛ ta zu wa ila ngɔ Gale ni, wa la sɛ dɛ kɔ le 'da ofionɔ.

¹⁹ Nɛ nde ta zu Gale ma élé sɛ ngɔ wi 'bakonɔ gɔ fai. Owi sãnɔ wa gbini zã wa do a, nɛ nde olo nɛ ɔ̀ iko gɔ.

²⁰ Aa NWA, mɔ kúlú ngɔ hã mɔ dɛ mɔ. Mɔ mbá li ogele nu kɔnggɔnɔ dɛ dati mɔ, hã mɔ 'bili ngbangga 'da wa, nɛ mɔ tɛ kɔ̃̀ na, 'dã wi kpo kpasa li nɛ gɔ.

²¹ Aa NWA, mɔ dɛ́ na kili ba ogele nu kɔnggɔnɔ, takɔ wa ĩ́ na, wa a Owele iko.