Zumanɔ 89 - WE NU GALE 1995

Sambala ngba soe ngamɔ

¹ Zuma 'da Etanɛ

² Aa NWA, mi ga sɛ zuma hã mɔ fai, nɛ mi tɔ̃ sɛ lɛnggɛ kɔ̃a zã 'da mɔ. Mi tɔ̃ sɛ hã winɔ vɛ̃ kɛ wa ko sɛ wa 'do lɛ gɛ ni na, mɔ a wi kɛ mɔ dɛ olo nu mɔ hã owinɔ 'da mɔ fai.

³ Mi tɔ̃ dɛ nza na: Kɔ̃a zã 'da mɔ ma 'bana sɛ fai ɔ nɛ li nza ni, nɛ mɔ dɛ sɛ olo nu mɔ hã owinɔ 'da mɔ kɔ sabɛlɛ do sabɛlɛ.

⁴ Gale na: “Mi kpua mbulu hã wi mi saka a ni, mi kpua mbulu hã Davidi, wi toe 'da mi na,

⁵ 'da fala fai, mi e sɛ mbe be zã a kpo do nwa dɛ olo a, nɛ dɛa to nwa 'da a ma 'bana sɛ fai.”

⁶ E kɔ oanzɛnɔ wa dɔnggɔ mɔ NWA tɛ li nza i, we duzu ɔngbamɛnɔ mɔ dɛ ma ni. E kɔ wa dɔnggɔ dia zu li mɔ kɔ mba li ngba wi 'da wa.

⁷ Aa NWA, fo wi we kɔ̃ do mɔ tɛ li nza i bina. Sanga ogalenɔ nyanga nza gɛ vɛ̃, wele kpo wè kɔ̃ do mɔ gɔ.

⁸ Aa Gale, wa dɛ kili mɔ tɛ kɔ mba li ngba wi 'da oanzɛnɔ, wa dɛ kili mɔ nɛ ngɔ winɔ kɛ wa kɛ zã mɔ ni vɛ̃.

⁹ Aa NWA Gale ngɔ mɔ nyanga nza vɛ̃, fo wi nganda we kɔ̃ do mɔ bina. Mɔ NWA, mɔ dɛ mɛnɔ vɛ̃ do wala olo nɛ.

¹⁰ Mɔ e mbula ngɔ gba lì kɛ ma dɛ ngawi ni, nɛ mɔ dɛ na, ngele nɛ mbɔkɔ.

¹¹ Mɔ zi a mɔ dumu zã gba sɔ̃ sa'de li a a Rahabɛ ni, nɛ mɔ gbɛa a. Nɛ mɔ pɛsa Owi sɛnɛ mɔ do ngawi 'da mɔ.

¹² Wele li nza do nùi a mɔ mɔ, mɔ a mɔ dɛa nyanga nza, nɛ mɔ 'bɔ a mɔ dɛa mɛnɔ li nù gɛ vɛ̃.

¹³ Mɔ a mɔ dɛa nùi vɛ̃, yolo gbãlã ngɔ we hɔ ba gɔtɔ. Kala Tabɔrɛ do Hɛrmoni ma dɛ yangga, nɛ ma dɔnggɔ dia zu li mɔ.

¹⁴ Mɔ nganda wena, ngawi 'da mɔ la mɔ vɛ̃.

¹⁵ Gbãlã we do de dɛa mɛ 'da mɔ, ma nganda dɛa to nwa 'da mɔ. Nɛ bɔlɔ zu do kɔ̃a zã be tɛ̃ ɛ nza kɔ toe mɔ dɛ ni.

¹⁶ Aa NWA, owinɔ kɛ wa dɔnggɔ mɔ, nɛ wa ɔ dɛ kɔ yele ngbala kɛ zã mɔ ni, wa a wi yangga.

¹⁷ Wa dɛ yangga we kɛ mɔ a Gale 'da wa, nɛ wa dɔnggɔ tɛ wa tũ kpo kpo, we duzu bɔlɔ zui 'da mɔ.

¹⁸ Mɔ a mɔ hã gã ngawi 'da mɔ hã lɛ, nɛ mɔ a mɔ dɛ na, lɛ nɛ ngɔ owi sɛnɛ lɛ.

¹⁹ Mɔ NWA, mɔ a mɔ saka wi zɔ mɔ tɛ lɛ, mɔ Gale santo 'da lɛ obe Israɛlɛ, mɔ saka nwa hã lɛ.

²⁰ Mbe tũ kpo, nɛ mɔ wila we hã owinɔ 'da mɔ kɔ yalɛ na: “Mi saka zi mbe nga be zagbãlã kpo sanga nɛ, nɛ mi yula 'do a.

²¹ Mi saka Davidi, nɛ mi a nɔ santoe 'da mi zu a, nɛ mi ia a do wi toe 'da mi.

²² Mi yolo sɛ 'do a fai do sɔ̃a tɛ, nɛ ngawi 'da mi ma nganda sɛ a.

²³ Wi sɛnɛ a nɛ sɛ ngɔ a gɔ, nɛ wi dɛ nga zu hã́ sɛ sape hã a gɔ.

²⁴ Mi o sɛ sanga Owi sɛnɛ a dati a, nɛ mi gbɛ sɛ Owi handa a do'do.

²⁵ Mi kɔ̃ sɛ gɛnɛ a, nɛ mi dɛ sɛ olo nu mi hã a fai. Nɛ mi nganda sɛ dɛa to nwa 'da a.

²⁶ Mi dɛ sɛ 'bɔ na, a e mbula ngɔ nùi, yolo nu gba lì gbaa we hɔ nu fua lìnɔ.

²⁷ A tɔ̃ sɛ hã mi na: ‘Mɔ a Baa mi, nɛ mɔ a Gale 'da mi, nɛ mɔ a wi kpasa mi.’

²⁸ Nɛ mi, mi e sɛ a do kuti bulu be 'da mi, nɛ a nɛ sɛ ngɔ Onwanɔ ngɔ nù gɛ vɛ̃.

²⁹ Mi dɛ sɛ olo nu mi hã a fai, nɛ gba tɔkɛ 'da mi do a ma sɔ́kpɔ́ sɛ gɔ.

³⁰ 'Da fala fai, mi e sɛ mbe be zã a kpo do nwa dɛ olo a, nɛ dɛa to nwa 'da a sɛ do ndɔti nɛ bina, ma 'bana sɛ fai ɔ nɛ li nza ni.

³¹ “Fala kɛ obe zã a wa la fala dɛ mbula 'da mi, hã wa bɛ̃ gɛnɛ dɛ olo nu mi,

³² fala kɛ wa 'danga we nu mi, hã wa dɛ̀ olo mbulanɔ 'da mi gɔ,

³³ nɛ mi hã sɛ etumbu hã wa olo nga zui 'da wa, nɛ mi ba sɛ dɔndɔlɔ 'da mi, nɛ mi zɛ do wa.

³⁴ Nɛ nde mi bɛ̃́ sɛ gɛnɛ wa gɔ, nɛ mi lá sɛ fala dɛ olo nu mi hã wa gɔ.

³⁵ Mi 'dángá sɛ gba tɔkɛ 'da mi do wa gɔ, nɛ mi kpóló sɛ olo nu mi hã wa gɔ.

³⁶ Mi Gale, mi zonggo tɛ mi do zu li mi na, mi ɔ́lɔ́ sɛ Davidi fala kpo gɔ.

³⁷ Obe zã a wa sanza sɛ fai, nɛ mi zɔ sɛ mɔ tɛ dɛa to nwa 'da a, nɛ ma 'bana sɛ kɔ sabɛlɛ do sabɛlɛ ɔ nɛ wese ni.

³⁸ Ma sɛ do ndɔti nɛ bina, ma 'bana sɛ fai ɔ nɛ zɛkɛ kɛ mɛ a ngi temɔɛ 'da mi 'do kutinɔ i ni.”

³⁹ Nɛ nde zã mɔ nɔ̃lɔ̃ dɛ tɛ nwa kɛ mɔ saka a ni, nɛ mɔ bɛ̃a gɛnɛ a, nɛ mɔ fɛa kɔ̃ mɔ tɛ̃ a, nɛ a te nù.

⁴⁰ Mɔ 'danga gba tɔkɛ 'da mɔ do wi toe 'da mɔ, nɛ mɔ da dɔndɔlɔ nwa 'da a nù, nɛ mɔ faka dɛa to nwa 'da a do'do.

⁴¹ Mɔ gbini gba ngbo nu lenɔ 'da a dɛ nù, nɛ mɔ 'danga ngbonɔ ni vɛ̃.

⁴² Owi la walanɔ vɛ̃ wa kala mɔ tɛ̃ a la nɛ, nɛ owinɔ kɛ zã nùi 'da a ni wa fi tɔɛ zu a.

⁴³ Mɔ gisa ngawi 'da owi sɛnɛ a vɛ̃ dɛ olo nɛ, nɛ mɔ hã yangga hã wa.

⁴⁴ Mɔ li nu du kɔya 'da a, nɛ mɔ dɛa na a te li bolo.

⁴⁵ Mɔ fua ngawi to nwa 'da a do'do, nɛ mɔ ili kpongbo nwa 'da a, nɛ mɔ fi nù.

⁴⁶ Mɔ dɛa na, a dɛ gbɛlɛ ngɔ nga tɛ̃ a, nɛ mɔ hã sape hã a la li ngele.

⁴⁷ Aa NWA, mɔ nɛ usu tɛ mɔ hã lɛ fai nde? Nɔ̃lɔ̃ zã 'da mɔ kɛ ma bɛlɛ lɛ ɔ nɛ we gɛ, ma nɛ Sɔkpɔ soe ki nge nde?

⁴⁸ Mɔ kɔ̃, nɛ ta mɔ gba ngɔ mi, tũ dungu nza 'da mi ga gɔ. Mɔ dɛa lɛ Owele vɛ̃ na lɛ fe fio.

⁴⁹ Wi kɛ a 'bana sɛ nza fai a wio nde? Wi kɛ a wia we kpasa tɛ̃ a kɔ fio a wio nde?

⁵⁰ Aa nwa, dia zã 'da mɔ nɛa do nde? Mɔ kànà zi tɛ mɔ we dɛ olo nu mɔ hã Davidi gɔ nde?

⁵¹ NWA, mɔ lénggé do kɛ ogele winɔ, wa mɔmɔ mi wi toe 'da mɔ gɛ. Nɛ ta mɔ tɛ èlè ngɔ dĩ tole sape mi ba gɛ gɔ.

⁵² Aa NWA, owi sɛnɛ mɔ wa fi tɔɛ zu wi kɛ mɔ saka a, nɛ mɔ ia a do nwa ni. A ma ngɔ la nɛ, nɛ wa fi gbɛlɛgbɛsɛ zu a.

⁵³ Lɛ dɔ́nggɔ́ nwa 'da fala fai. Amɛ! E kɔ ma ɔ na mɛ ni.