Zumanɔ 88 - WE NU GALE 1995

Wi 'bako ala nu a hã Gale

¹ Zuma 'da Kore. Wi 'dafa ma a Hemane.

² Aa NWA Gale, mɔ a wi kpasa mi, mi sa mɔ hã mɔ tũ do gba wese, nɛ mi ala nu mi hã mɔ na, mɔ gbaka mi.

³ Mɔ gɛ́ zala mɔ, hã mɔ zélé sambala ala nui 'da mi.

⁴ 'Bako 'daa gã wena, mi a nyanga mi dɛ nu kɔ̃.

⁵ Ngawi 'da mi ia vɛ̃, wa tɔlɔ mi sanga owinɔ wa dɔ̃ɔ do fio ni.

⁶ Wa la mi dɛ sanga ofionɔ, ɔ nɛ kɛ wa la wɔlɔ winɔ ti zunu ni. Mɔ lénggé 'bɔ do owɔlɔnɔ ni gɔ, nɛ mɔ dɛ́ mɔ kpo we gala wa gɔ.

⁷ Mɔ fi mi go'do gba 'du kɔ̃, tɛ kɔ gba tũ 'da ofionɔ.

⁸ Nɔ̃lɔ̃ zã 'da mɔ zĩlĩ dɛ ngɔ mi, nɛ ma linggi mi ɔ nɛ ngele lì ni.

⁹ Mɔ fua Owi nanɔ 'da mi tɛ mi do'do, nɛ wa kɔ̃̀ 'bɔ we dungu kɛ zã mi gɔ. 'Bako zĩ mi takpa, nɛ fo wala na, mi hɔ nza kɔ nɛ bina.

¹⁰ Gbali mi kpa 'bako gbaa, nɛ ma mbɔkɔ do'do. Aa NWA, mi ɛfɛ kɔ̃ mi dɛ 'da mɔ, nɛ mi sa mɔ hã mɔ tũ kpo kpo.

¹¹ NWA, mɔ dɛ ɔngbamɔ we ofionɔ dɛa nde? Wa kulu sɛ ngɔ we dɔnggɔ mɔ nde?

¹² Wa wia we tɔ̃ lɛnggɛ kɔ̃a zã 'da mɔ ti zunu i nde? Wala tɔ̃ sako bɔlɔ zui 'da mɔ kɔ le 'da ofionɔ i boe nde?

¹³ Wele le kɔ gba tũ 'da ofionɔ ia, nɛ nde a ĩ́ 'bɔ ti ɔngbamɛnɔ mɔ dɛ ni gɔ. Wele le kɔ le ila tɛ 'da ofionɔ, nɛ ta zu a ele ngɔ bɔlɔ zui 'da mɔ vɛ̃.

¹⁴ Nɛ nde mi, mi sa mɔ hã mɔ NWA na, mɔ gbaka mi. Mi sambala mɔ titole kpo kpo.

¹⁵ Aa NWA, mɔ bɛ̃a gɛnɛ mi we ge nde? Mɔ kɔ̃̀ we zɔ mi ngɔ li mɔ gɔ we ge nde?

¹⁶ Yolo do be tɛ mi, mi a wi 'bako, nɛ mi a nyanga mi dɛ nu kɔ̃ iko. Mɔ hã ngamɔ hã mi wena, nɛ mi mbɔka, nɛ zu mi vĩ do'do.

¹⁷ Nɔ̃lɔ̃ zã 'da mɔ bɛlɛ mi ɔ nɛ we ni, mɔ bi mi nganda wena, nɛ mɔ gbɛa mi.

¹⁸ Dã 'da mɔ linggi mi zĩ takpa, nɛ ma gulu zu mi ɔ nɛ gba lì ni.

¹⁹ Mɔ fua oyali ngba mi kɛ zã mi vɛ̃, mi ɔ tati a dɛ kɔ gba tũ iko.