Zumanɔ 86 - WE NU GALE 1995

Sambala 'da wi kɛ a kɔ ngamɔ

1 Sambala 'da Davidi

¹ Sambala 'da Davidi Aa NWA, mɔ gɛ́ zala mɔ, hã mɔ kɔ̃ nu mi, we kɛ mi a wi sã, mi a wi 'bako.

² Mɔ kpásá mi kɔ fio, we kɛ mi a wi dɛ olo nu mɔ. Mi a wi dɛa toe 'da mɔ, mi gbini zã mi do mɔ Gale 'da mi, mɔ kpásá mi.

³ Aa NWA, mi sa mɔ hã mɔ tũ kpo kpo, mɔ ĩ́ 'bako hã mi.

⁴ Aa NWA, mi a wi toe 'da mɔ, mi siki li mi dɛ 'da mɔ, mɔ hã́ yangga hã mi.

⁵ Mɔ NWA, mɔ a wi dia sila, nɛ mɔ 'bɔ a wi mbɔkɔ li. Mɔ be dia zã 'da mɔ hã owinɔ vɛ̃ kɛ wa sambala mɔ ni.

⁶ Aa NWA, mɔ gɛ́ zala mɔ, hã mɔ zele sambala ala nui 'da mi.

⁷ Do fala kɛ mi kɔ ngamɔ, nɛ mi sa mɔ hã mɔ, nɛ mɔ kɔ̃ nu mi.

⁸ Sanga ogalenɔ vɛ̃, fo wi we kɔ̃ do mɔ NWA bina, nɛ fo 'bɔ wi dɛ mɛnɔ mɔ dɛa ni bina.

⁹ Mɔ a mɔ dɛa nu fɛlɛ kulanɔ vɛ̃, nɛ wa tɛ sɛ we gu nù ti mɔ, we dɔnggɔ dɔ̃lɔ̃ li 'da mɔ NWA.

¹⁰ We kɛ ngi Gale wi a mɔ zu mɔ kpo, mɔ gã wena, nɛ mɔ a wi dɛ oɔngbamɔ.

¹¹ Aa NWA, mɔ bé mbula 'da mɔ hã mi, nɛ mi dɛ sɛ olo nu mɔ fai. Mɔ ngándá sila mi, takɔ mi dɛ kili mɔ.

¹² Aa NWA Gale 'da mi, mi kɔ̃a we sambala mɔ do sila mi kpo, nɛ mi dɔnggɔ dɔ̃lɔ̃ li 'da mɔ kɔ sabɛlɛ do sabɛlɛ.

¹³ Mɔ do gã kɔ̃a zã we mi, nɛ mɔ fua mi kɔ fɛna fio.

¹⁴ Aa Gale, owi wali wa fele li wa dɛ tɛ mi, nɛ nde wa lènggè do mɔ gɔ.

¹⁵ Nɛ nde mɔ NWA, kɛ mɔ a Gale mbɔkɔ li, do dia zã, do du sila, mɔ dunu do kɔ̃a zã do bɔlɔ zu,

¹⁶ mɔ síkí li mɔ dɛ 'da mi, nɛ mɔ ĩ́ 'bako hã mi. Mɔ ha ngawi hã mi, nɛ mɔ kpasa mi.

¹⁷ Aa NWA, mɔ bé dia zã 'da mɔ hã mi, mɔ gálá mi, nɛ mɔ kpasa mi, hã owi sɛnɛ mi wa zɔ ní, nɛ sape ma ba sɛ li wa.