Zumanɔ 85 - WE NU GALE 1995

Obe Israɛlɛ wa sambala Gale na a gbaka lo

¹ Zuma 'da Kore

² Aa NWA, mɔ ĩ zi 'bako hã nùi 'da mɔ, nɛ mɔ kala obe zã Yakɔbɔ kɔlɔ 'duli, nɛ mɔ gese wa dɛ di ni.

³ Mɔ fua ku'da 'dã mɛnɔ zu owinɔ 'da mɔ, nɛ mɔ ila 'dã mɛnɔ 'da wa vɛ̃.

⁴ Mɔ kunu zi sila mɔ, nɛ mɔ la fala dɛ nɔ̃lɔ̃ zã hã wa.

⁵ Aa Gale, mɔ a wi kpasa lɛ, mɔ gésé ngawi 'da lɛ dɛ olo nɛ, nɛ mɔ tɛ bà mãlã lɛ dɛ kɔ sila mɔ fai gɔ.

⁶ Zã mɔ nɛ nɔ̃lɔ̃ dɛ tɛ lɛ fai nde? Dã 'da mɔ sɔ́kpɔ́ sɛ gɔ fai nde?

⁷ Mɔ ha sɛ ngawi hã lɛ owinɔ 'da mɔ, takɔ lɛ kpa yangga we dɔnggɔ mɔ.

⁸ Aa NWA, mɔ gbáká lɛ, mɔ bé dia zã 'da mɔ hã lɛ.

⁹ Mi zele we kɛ NWA Gale tɔ̃ ni, a kpua mbulu hã lɛ owinɔ 'da a na, fala kɛ lɛ kpòlò tɛ lɛ tɛ dɛ mɔ yɔnda gɔ, nɛ a hã sɛ gɛ̃a dungu hã lɛ.

¹⁰ Owinɔ kɛ wa dɛ kili NWA dɛa ni, NWA dá'bá tɛ̃ a we kpasa wa gɔ. A be sɛ dɔ̃lɔ̃ li 'da a hã lɛ, nɛ a kpasa sɛ lɛ.

¹¹ Na mɛ ni, Gale kɔ̃a gɛnɛ obe Israɛlɛ, nɛ obe Israɛlɛ wa dɛ olo nu Gale, nɛ ma lo ngbɛ ɛ. Obe Israɛlɛ wa gbini zã wa do Gale, nɛ a hã sɛ dungu fio hã wa.

¹² Obe Israɛlɛ wa gbini zã wa do Gale, nɛ yolo do nù nga, wa ka mɔ dɛ ngɔ we fa a, nɛ Gale kɛ a dɛ olo nu a hã obe Israɛlɛ ni, a ka mɔ dɛ nù nga we zɔ wa.

¹³ NWA do tɛ̃ a ngboo, a hã sɛ dia dungu hã lɛ, nɛ nùi 'da lɛ ma ko sɛ odia kpalɛ.

¹⁴ Owi bɔlɔ zu wa kpe dati NWA, nɛ wa fi wala hã a.