Zumanɔ 84 - WE NU GALE 1995

Zuma 'da owinɔ wa si dɛ Yeruzalɛmɛ

¹ Zuma 'da Kore

² Aa mɔ, NWA ngɔ mɔ nyanga nza vɛ̃, mi zɔa Tɛmpɛloe 'da mɔ, nɛ ma de tɛ mi wena.

³ Sila mi ɔ ngɔ ngbũu, nɛ mi do wɔ we le kɔ nɛ. Mi ga zuma yangga hã mɔ Gale, wele kpasi, nɛ mi ga ma do sila mi vɛ̃.

⁴ Gɛnɛ kɔ osɔlɛanɔ, nɛ nde wa ɔ kɔ Tɛmpɛloe, nɛ odandɛanɔ wa a benɔ 'da wa kɔ tɔa ni, nɛ wa ɔ dɛ kɛ zã gbagalanɔ 'da mɔ, NWA ngɔ mɔ nyanga nza vɛ̃, kɛ mɔ a nwa 'da mi do Gale 'da mi ni.

⁵ Yangga wena we owinɔ kɛ wa ɔ kɔ Tɛmpɛloe 'da mɔ ni, wa wia we dɔnggɔ mɔ 'da fala fai.

⁶ Mɛ a yangga wena we owinɔ kɛ ngawi 'da wa yolo kɔ̃ mɔ, nɛ wa do wɔ we la dɛ Yeruzalɛmɛ ni.

⁷ Wa nɛa we la do kɔ kula gbangɔlɔ̃ɛ kɛ te bomienɔ hɔ kɔ nɛ ni, nɛ mɔ Gale mɔ dɛa na, fala ni kifi dɛka lì, nɛ kuti kolonɔ tɛ, nɛ lì yolo di ni.

⁸ Kɛ wa tɛ la nɛ dɛ Sioni i, we hɔ dati Gale ni, nɛ nde ngawi 'da wa gã dɛ dati gã fai.

⁹ Aa NWA Gale, kɛ mɔ do nganda vɛ̃, mɔ zélé sambala 'da mi. Aa Gale 'da Yakɔbɔ, mɔ gɛ́ zala mɔ hã mi.

¹⁰ Aa Gale, mɔ zɔ̀ mɔ tɛ nwa 'da lɛ, mɔ wélé nu mɔ tɛ nwa kɛ mɔ saka a na, a kele zu lɛ ni.

¹¹ Mi zɔa na, ɔ kɔ Tɛmpɛloe 'da mɔ tũ kpo, ma dia nɛa ngɔ ɔ gele fala tũ koto kpo. Ɔ dɛ 'do gbangga nu tɔa 'da mɔ Gale 'da mi, ma dia nɛa ngɔ ɔ kɔ tɔa 'da o'dã winɔ.

¹² Aa NWA Gale, mɔ a wese, mɔ hã sa fala do kpasi hã lɛ. Mɔ kɔ̃a gɛnɛ lɛ, nɛ mɔ kpɔ kɔ̃ mɔ ti lɛ do dɔ̃lɔ̃ li. Mɔ hã dia 'dɔkɔlɔ hã owinɔ, kɛ dɛa to tɛ wa ɔ bɔlɔ ni.

¹³ Aa NWA do nganda vɛ̃, yangga wena we owinɔ kɛ wa gbini zã wa do mɔ ni.